Galaatii mba 6:1-18
6 Koobiya, paa ɛyʋ nɔɔyʋ ɛkpɛzɩ nɩŋgbaŋaɣ kɩdɛkɛdaɣ nakɛyɛ pʋcɔ nɛ eɖiɣzina yɔ, mɩ mba ɩpɩ fezuu taa yɔ ɩñaɣ pana nɛ ɩñɔɔzɩ ɛyʋ ɛnʋ nɛ hɛɛɛ wɛtʋ. Ɛlɛ ñɛ-ɛsɩyɛ ɛwɛɛ ña-maɣmaɣ ñɔ-yɔɔ, se pɩtaala nɛ ña ɖɔɖɔ lɛ pɩtakɩ-ŋ.
2 Iwolo pɩ-yɔɔ nɛ ɩsɩɣlɩɣ ɖama sʋʋtʋ, ɖɩnɛ ɛlɛ ɩkaɣ yebu nɛ Krɩstʋ paɣtʋ la.
3 Mbʋ pʋyɔɔ yɔ, ye nɔɔyʋ ɛmaɣzɩɣ se ɛkɛ pʋyʋ nɔɔyʋ ŋgʋ ɛtɩkɛ nabʋyʋ yɔ, epeɣziɣ ɛ-tɩ kipeɣzu.
4 Ɛlɛ paa weyi lɛ, ewili ɛ-maɣmaɣ ɛ-lakasɩ taa, ɖɩnɛ ɛlɛ ɛkaɣ naʋ mbʋ pɩ-yɔɔ pɩwɛɛ se ɛ-taa ɛla leleŋ nɛ ɛ-maɣmaɣ ɛ-tɩ yɔ, nɛ pɩtaakɛnɩ ɛzɩma ɛkɛdɩɣ ɛ-tɩ nɛ ɛyʋ lɛlʋ yɔ.
5 Mbʋ pʋyɔɔ yɔ paa weyi lɛ, ɛkaɣ sɩɣlʋʋ ɛ-maɣmaɣ ɛ-sʋʋtʋ.
6 Pɩtasɩ lɛ, weyi peɖiɣni-i wɩlʋʋ tɔm yɔ, ɛ nɛ weyi ɛwɩlɩɣ tɔm ndʋ yɔ, pakaa wondu kɩbandʋ kpeekpe.
7 Itaapeɣzi mɩ-tɩ:* Paawoŋuu Ɛsɔ. Mbʋ pʋyɔɔ yɔ, mbʋ payɩ ɛyʋ ɖuu yɔ, mbʋ ɖɔɖɔ ɛkaɣ kʋm;
8 mbʋ pʋyɔɔ yɔ weyi eɖuu se pɩwazɩ e-tomnaɣ yɔ, ɛkaɣ kʋm e-tomnaɣ taa mbʋ pɩɖazaa yɔ, ɛlɛ weyi eɖuu se pɩwazɩ fezuu yɔ, ɛkaɣ kʋm fezuu taa wezuu maatɛŋ.
9 Pʋyɔɔ lɛ, ɖitaayele labʋ mbʋ pɩwɛ ɖeu yɔ, mbʋ pʋyɔɔ yɔ alɩwaatʋ talɩɣ lɛ, ɖɩkaɣ kʋm ye pɩtɩnɩɩ-ɖʋ yɔ.*
10 Pʋyɔɔ lɛ, alɩwaatʋ ndʋ payɩ ɖɩwɛnɩ waɖɛ yɔ, ɖɩla ɛyaa tɩŋa mbʋ pɩwɛ ɖeu yɔ, ɛlɛ kɔzɩ kɔzɩ lɛ mba ɖa nɛ wɛ ɖɩka tisuu yɔ.
11 Ɩna ɛzɩma mama-mɩ nɛ ma-maɣmaɣ me-nesi nɛ pɩpaɣlɩ camɩyɛ kpooluu kpooluu yɔ.
12 Mba payɩ pɔsɔɔlaa se pana-wɛ se pɛkɛ kɩbama tomnaɣ taa yɔ, mba ñɩnɩɣna se pañɩɣ mɩ-yɔɔ nɛ iyele nɛ pɛpɛlɩ-mɩ, palakɩ mbʋ, mbʋ pʋyɔɔ yɔ paañɩnɩɣ se Krɩstʋ tɛ nazɩm sizika* yɔɔ lɛ panazɩ-wɛ.
13 Mbʋ pʋyɔɔ yɔ halɩ mba pɛpɛlɩɣ-wɛ yɔ pa-maɣmaɣ paaɖɔŋ Paɣtʋ yɔɔ, ɛlɛ pañɩnɩɣ se pɛpɛlɩ-mɩ nɛ pɩsa nɛ pana nabʋyʋ mi-tomnaɣ yɔɔ nɛ pakʋndɩnɩ-pʋ.
14 Ɛlɛ ma lɛ tɛtɛ nɛ mantaakʋndɩ wiɖiyi, ye pɩtɩkɛ ɖa-Kɩbaɣlʋ Yesu Krɩstʋ tɛ nazɩm sizika* yɔɔ kɔyɔ, weyi ɛ-yɔɔ pɩtɩŋnaa nɛ pakʋ ɛjaɖɛ* mɔ-yɔɔ, nɛ pakʋ-m* ɖɔɖɔ ɛjaɖɛ yɔɔ yɔ.
15 Mbʋ pʋyɔɔ yɔ, pɛlɩtʋ tɩkɛ pʋyʋ nɛ kɩdɩbɛlɩtʋ tɩkɛ pʋyʋ ɖɔɖɔ, ɛlɛ wonuu kɩlɩzʋʋ kɩfalʋʋ kɛnɩnɩ pʋyʋ.
16 Piyele nɛ mba payɩ pɔɖɔŋ wezuu caɣʋ paɣtʋ tʋnɛ tɩ-yɔɔ camɩyɛ yɔ, laŋhɛzɩyɛ nɛ pʋtɔdɩyɛ naʋ pɛwɛɛ pɔ-yɔɔ, ɛɛɛ, Ɛsɔ tɛ Izrayɛɛlɩ yɔɔ.
17 Kpaɣnɩ lɛɛlɛɛyɔ lɛ, nɔɔyʋ ɛtaaca-m tɔm, mbʋ pʋyɔɔ yɔ mon-tomnaɣ yɔɔ nɛ yʋsasɩ nzɩ sɩwɩlɩɣ se mɛnkɛ Yesu yom yɔ.
18 Koobiya, ɖa-Kɩbaɣlʋ Yesu Krɩstʋ lootiye ɛwɛɛ fezuu ŋgʋ ɩlɩzɩɣ nɛ ɩwɩlɩɣ yɔ kɩ-cɔlɔ. Amɛn.
Pɩ-tɛɛ tɔm
^ Pɩpɩzɩɣ pɩkɛ, “Itaayele nɛ nɔɔyʋ peɣzi-mɩ.”
^ Yaa “ye ɖɩtɩlɔ nɛ ɖise yɔ.”
^ Cɔnɩ Tɔm pee sɔsɔna tɔbʋʋ lɩzʋʋ.
^ Cɔnɩ Tɔm pee sɔsɔna tɔbʋʋ lɩzʋʋ.
^ Yaa “nɛ paka ɛjaɖɛ sizika yɔɔ.”
^ Yaa “pakamɩ-m sizika yɔɔ.”
