Galaatii mba 1:1-24
1 Ma Pɔɔlɩ, pɩtɩlɩɩnɩ ɛyaa cɔlɔ nɛ pɩtɩtɩŋnɩ ɛyʋ nɔɔyʋ yɔɔ nɛ mɛnkɛ apostoloo, ɛlɛ pɩtɩŋnɩ Yesu Krɩstʋ nɛ Caa Ɛsɔ, weyi efezi Krɩstʋ nɛ sɩɖaa taa yɔ pɔ-yɔɔ,
2 ma nɛ koobiya mba payɩ pɛwɛ mɔn-cɔlɔ yɔ, ɖetiyiɣni takayaɣ kanɛ Galaatii agbaa:
3 Tɛtɛ nɛ ɩwɛɛnɩ lootiye nɛ laŋhɛzɩyɛ nɖɩ ɖɩlɩnɩ ɖa-Caa Ɛsɔ nɛ Kɩbaɣlʋ Yesu Krɩstʋ pɔ-cɔlɔ yɔ.
4 Ɛcɛlɩ ɛ-tɩ ɖa-kɩwɛɛkɩm yɔɔ se pɩsa nɛ eholi-ɖʋ ɛjaɖɛ yɔɔ ɖʋtʋ kɩdɛkɛdɩtʋ* tʋnɛ ti-nesi tɛɛ, ɛzɩ ɖɛ-Ɛsɔ nɛ ɖa-Caa sɔɔlʋʋ yɔ,
5 ɛnʋ weyi pɩwɛɛ se pasamɩ-ɩ tamtam yɔ. Amɛn.
6 Pɩlakɩ-m piti se Weyi ɛtɩŋnɩ Krɩstʋ lootiye yɔɔ nɛ ɛyaa-mɩ yɔ, iɖiɣni-i haʋ siɣye lɛɛ lɛɛ* nɛ ɩpɩsɩɣnɩ tɔm kɩbandʋ lɛɛtʋ yɔɔ.
7 Pɩtɩkɛ se tɔm kɩbandʋ lɛɛtʋ natʋyʋ wɛɛ; ɛlɛ nabɛyɛ wɛɛ nɛ peliɣtiɣ-mɩ nɛ pañɩnɩɣ se pɛlɛɣzɩ Krɩstʋ yɔɔ tɔm kɩbandʋ.
8 Ɛlɛ paa ɖa yaa Ɛsɔ tiyiyu nɔɔyʋ ɛlɩnɩ ɛsɔdaa nɛ esusuu-mɩ tɔm natʋyʋ se tɩkɛ tɔm kɩbandʋ nɛ tɩwɛɛ ndɩ nɛ tɔm kɩbandʋ ndʋ ɖiisusi-mɩ yɔ, pɔlɔ ɛ-yɔɔ nɔɔ kɩdɛkɛdaɣ.
9 Ɛzɩ ɖɩyɔɔdʋʋ nɛ pɩɖɛɛ yɔ, mantasɩɣ yɔɔdʋʋ lɛɛlɛɛyɔ se: Ye nɔɔyʋ esusuu-mɩ tɔm natʋyʋ se tɩkɛ tɔm kɩbandʋ nɛ tɩwɛɛ ndɩ nɛ tɔm ndʋ tɩ-yɔɔ itisaa yɔ, pɔlɔ ɛ-yɔɔ nɔɔ kɩdɛkɛdaɣ.
10 Toovenim taa lɛ, ɛyaa yaa Ɛsɔ mañɩnɩɣ lɛɛlɛɛyɔ se mɔn-tɔm ɛkɛdɩna? Yaa mañɩnɩɣ se ɛyaa ɩsɔɔlɩ mɔn-tɔm? Ye halɩ nɛ sɔnɔ ɛyaa maañɩnaɣ se pɔsɔɔlɩ mɔn-tɔm yɔ, mantaakɛ Krɩstʋ yom.
11 Mbʋ pʋyɔɔ yɔ koobiya, mɔnsɔɔlaa se ɩtɩlɩ se tɔm kɩbandʋ ndʋ monsusi-mɩ yɔ, tɩtɩlɩɩnɩ ɛyaa cɔlɔ;
12 mbʋ pʋyɔɔ yɔ pɩtɩkɛ ɛyʋ nɔɔyʋ cɔlɔ mamʋ-tʋ, nɛ patɩwɩlɩ-m tʋ kɩwɩlʋ, ɛlɛ Yesu Krɩstʋ tɩŋnɩ natʋ natʋyʋ yɔɔ na nɛ ɛwɩlɩ-m tʋ.
13 Toovenim taa lɛ, ɩnɩ ɖɔnɛ nɖɩ mɔnɖɔŋaɣ ɖooo lɔŋ Yuuda mba Ɛsɔ sɛtʋ taa yɔ ɖɩ-tɔm, se manazaɣ kadadayaɣ Ɛsɔ ɛgbɛyɛ nɛ mañɩnaɣ se manɖɩzɩ-ɖɩ;
14 nɛ mowokaɣni ɛsɩndaa siŋŋ Yuuda mba Ɛsɔ sɛtʋ taa nɛ pɩkɩlɩ man-ɖaɣʋnaa sakɩyɛ mɛ-ɛjaɖɛ taa, mbʋ pʋyɔɔ yɔ maawɛ kpekpeka siŋŋ man-caanaa sɔnzɩ taa.
15 Ɛlɛ Ɛsɔ weyi ɛlɩzɩ-m mon-ɖoo lotu taa nɛ ɛtɩŋnɩ e-lootiye yɔɔ nɛ ɛya-m yɔ, alɩwaatʋ ndʋ ɛmaɣzaa se pɩwɛ ɖeu se
16 ɛtɩŋnɩ mɔ-yɔɔ nɛ ɛlɩzɩ ɛ-Pɩyalʋ nɛ ɛwɩlɩ, se pɩsa nɛ monsusi ajɛɛ ɛ-yɔɔ tɔm kɩbandʋ lɛ, mantɩpɔzɩ ɛyʋ nɔɔyʋ* lɔŋ tasʋʋ kpaagbaa;
17 nɛ mantɩkpa ɖɔɖɔ Yeruzalɛm, mba paakɛ apostoloowaa pʋcɔ nɛ pɩtalɩɣnɩ-m yɔ pɔ-cɔlɔ, ɛlɛ mowobi Arabii, nɛ pʋwayɩ lɛ, manpɩsɩ Damaasɩ.
18 Nɛ pɩnzɩ naadozo wayɩ lɛ, mankpa Yeruzalɛm se mana Sefaasɩ,* nɛ mancaɣ ɛ-cɔlɔ kɩyakɩŋ 15.
19 Ɛlɛ mantɩna apostoloowaa lalaa taa nɔɔyʋ nɛ pɩtasɩnɩ Kɩbaɣlʋ neu Yakubu.
20 Lɛɛlɛɛyɔ, tɔm ndʋ menɖiɣni-mɩ maʋ yɔ tɩ-hɔɔlʋʋ taa lɛ, Ɛsɔ kɛ aseɣɖe tʋ se maacɛtɩɣ.
21 Pʋwayɩ lɛ, mowolo Siirii nɛ Siliisii ageeta taa.
22 Ɛlɛ Krɩstʋ tɔmkpɛlɩkɩyaa mba pɛwɛ Yuudee agbaa taa yɔ, patɩnatɩ mɛ-ɛsɩndaa nɛ pana.
23 Panɩɣaɣ kɩnɩʋ yem se: “Abalʋ weyi ɛnazaɣ-ɖʋ ɖooo lɛ yɔ, lɛɛlɛɛyɔ eɖiɣni susuu tisuu mbʋ ɛñɩnaɣ ɖooo lɔŋ se ɛɖɩzɩ yɔ, pɩ-yɔɔ tɔm kɩbandʋ.”
24 Nɛ mɔ-yɔɔ lɛ, papaɣzɩ Ɛsɔ sam.
Pɩ-tɛɛ tɔm
^ Yaa “eholi-ɖʋ pɩnzɩ kɩdɛkɛdɩsɩ.” Cɔnɩ Tɔm pee sɔsɔna tɔbʋʋ lɩzʋʋ.
^ Yaa “iɖiɣni-i posinuu lɛɛ lɛɛ.”
^ Piye piye, “mantɩpɔzɩ tomnaɣ nɛ calɩm.”
^ Ɛnʋ payaɣ ɖɔɖɔ se Pɩyɛɛrɩ.
