Ebree mba 4:1-16
4 Ye mbʋ, ɛzɩma lidaʋ tɔm ɖaɣnɩ wɛʋ se ɖɩpɩzɩɣ nɛ ɖɩsʋʋ ɛ-hɛzɩyɛ taa yɔ pʋyɔɔ lɛ, ɖɩkpa ɖa-tɩ* nɛ pɩtaala se nɔɔyʋ wɛ mɩ-taa nɛ ɛtɩmʋnɩ lidaʋ tɔm ndʋ.
2 Mbʋ pʋyɔɔ yɔ posusi-ɖʋ ɖɔɖɔ tɔm kɩbandʋ ɛzɩ paasusuu-wɛ yɔ; ɛlɛ tɔm ndʋ panɩwa yɔ tɩtɩwazɩ-wɛ, mbʋ pʋyɔɔ yɔ pataawɛɛnɩ tisuu ɛzɩ mba pewelisaa yɔ.
3 Mbʋ pʋyɔɔ yɔ ɖa mba ɖɩwɛnɩ tisuu yɔ, ɖɩsʋʋ hɛzɩyɛ taa, ɛzɩ ɛyɔɔdʋʋ yɔ: “Pʋyɔɔ monɖuu man-pana taa se: ‘Paakaɣ sʋʋ mɛ-hɛzɩyɛ taa,’” paa ɛ-tʋma kaatɛma kpaɣnɩ alɩwaatʋ ndʋ pasɩ ɛjaɖɛ tigiɖe yɔ.
4 Mbʋ pʋyɔɔ yɔ, ɛyɔɔdɩ ɖoli kɩyakʋ lʋbɛ ñɩŋgʋ yɔɔ tɔm tʋnɛ: “Nɛ Ɛsɔ hɛzɩnɩ ɛ-tʋma tɩŋa kɩyakʋ lʋbɛ ñɩŋgʋ wiye,”
5 nɛ ɛtasɩ yɔɔdʋʋ cɩnɛ se: “Paakaɣ sʋʋ mɛ-hɛzɩyɛ taa.”
6 Pʋyɔɔ lɛ, ɛzɩma pɩkazɩ nabɛyɛ se pasʋʋ ɖɩ-taa, nɛ ɛzɩma mba pacalɩ-wɛ tɔm kɩbandʋ susuu yɔ pa-kaañamtʋ yɔɔ lɛ, patɩsʋʋ ɖɩ-taa yɔ pʋyɔɔ lɛ,
7 ɛtasɩ ɖʋʋ kɩyakʋ nakʋyʋ alɩwaatʋ ndʋ ɛyɔɔdɩ Daviid keɣa taa alɩwaatʋ sakɩyɛ pʋwayɩ yɔ se: “Sɔnɔ”; ɛzɩ paayɔɔdʋʋ nɛ pɩɖɛɛ yɔ: “Sɔnɔ ye iwelisiɣ ɛ-nɔɔ yɔ, ɩtaala nɛ mɩ-laŋa sʋʋ kpɩzɩŋ.”
8 Mbʋ pʋyɔɔ yɔ, ye Yozuwee kaasʋnɩ-wɛ hɛzɩyɛ lone naɖɩyɛ taa yɔ, Ɛsɔ taayɔɔdɩ kɩyakʋ lɛɛkʋ tɔm pʋwayɩ.
9 Ye mbʋ, pɩkazɩ Ɛsɔ samaɣ sabaatɩ hɛzɩyɛ naɖɩyɛ.
10 Mbʋ pʋyɔɔ yɔ ɛyʋ weyi ɛsʋ Ɛsɔ hɛzɩyɛ taa yɔ, ɛhɛzɩnɩ ɖɔɖɔ ɛ-maɣmaɣ ɛ-tʋma, ɛzɩ Ɛsɔ hɛzɩnʋʋ ɛ-maɣmaɣ ɛ-ñɩna yɔ.
11 Pʋyɔɔ lɛ, ɖɩla mbʋ payɩ ɖɩpɩzɩɣ yɔ nɛ ɖɩsʋʋ hɛzɩyɛ nɖɩ ɖɩ-taa, se pɩsa nɛ nɔɔyʋ ɛtaatɔlɩ kaañamtʋ kʋɖʋmtʋ ndʋ tɩ-taa.
12 Mbʋ pʋyɔɔ yɔ, Ɛsɔ tɔm wɛ wezuu nɛ tɩwɛɛ ɖoŋ pɩŋŋ, nɛ tɩwɛ lɔŋ nɛ pɩkɩlɩ paa laɣɖɛ* nɖɩ ɖɩwɛ lɔŋ ceemenje yɔ, nɛ tɩsʋʋ nɛ halɩ tɩtayɩɣ kalɩzaɣ* nɛ fezuu* pa-taa, nɛ ɖɩdanɖɛ nɛ mɔɔ taa num pa-taa, nɛ tɩpɩzɩɣ tɩtɩlɩ lɩmaɣza nɛ ɖʋtʋ ndʋ tɩwɛ laŋɩyɛ taa yɔ.
13 Nɛ wonuu kɩlɩzʋʋ nakʋyʋ fɛyɩ se kɩmɛlaa nɛ ɛɛnaɣ-kʋ, ɛlɛ pɩtɩŋa pɩwɛ ndaakpeɖe nɛ pɩnaɣ kaɣlaa weyi pɩwɛɛ se ɖɩlabɩ-ɩ akɔnta yɔ ɛ-ɛsɩndaa.
14 Ye mbʋ, ɖɩwɛnɩ cɔjɔ sɔsɔ kɩlɩm, weyi ɛkpa ɛsɔdaa yɔ, Ɛsɔ Pɩyalʋ Yesu, pʋyɔɔ lɛ, ɖɩɖɔkɩ tɔm ndʋ ɖɩyɔɔdʋʋ kaɣlaa se ɖɩwɛnɩ tisuu ɛ-yɔɔ yɔ kpam.
15 Mbʋ pʋyɔɔ yɔ, pɩtɩkɛ cɔjɔ sɔsɔ weyi ɛɛpɩzɩɣ nɛ ɛnɩɩ ɖɛ-ɛjandʋ taa yɔ ɖɩwɛna, ɛlɛ weyi pɩtakɩ-ɩ hɔɔlɩŋ tɩŋa taa ɛzɩ pɩtakʋʋ-ɖʋ yɔ ɛnʋ ɖɩwɛna, ɛlɛ ɛfɛyɩnɩ kɩwɛɛkɩm nabʋyʋ.
16 Ye mbʋ, iyele nɛ ɖɩtɩŋnɩ kaalɛyɩtʋ yɔɔdaɣ yɔɔ nɛ ɖɩñɔtɩnɩ lootiye kewiyaɣ kpelaɣ, nɛ papɩzɩ pana ɖa-pʋtɔdɩyɛ nɛ ɖihiɣ lootiye, nɛ pɩsɩnɩ-ɖʋ alɩwaatʋ kɩbandʋ yɔɔ.
Pɩ-tɛɛ tɔm
^ Piye piye, “ɖɩwɛɛ sɔɔndʋ taa.”
^ Yaa “abalɩsɩɣa.”
^ Cɔnɩ Tɔm pee sɔsɔna tɔbʋʋ lɩzʋʋ.
^ Cɔnɩ Tɔm pee sɔsɔna tɔbʋʋ lɩzʋʋ.
