Yohanɛɛsɩ 20:1-31
20 Kpɩtaʋ kajalaɣ kɩyakʋ ñɩŋgʋ wiye lɛ, Maarɩɩ Magdalaa tʋ kɔɔ pɩlaʋ* yɔɔ lɔŋ, alɩwaatʋ ndʋ pɩtɩñandɩta yɔ, nɛ ɛna se pɛtɛm kuluu pɩyɛ pɩlaʋ* yɔɔ.
2 Nɛ ese nɛ ewolo Siimɔɔ Pɩyɛɛrɩ nɛ tɔmkpɛlɩkɩyʋ lɛlʋ, weyi Yesu kaakɩlɩ sɔɔlʋʋ yɔ pɔ-cɔlɔ, nɛ eheyi-wɛ se: “Palɩzɩ Kɩbaɣlʋ pɩlaʋ taa, nɛ ɖɩɩsɩŋ ɖenɖe pasɩ-ɩ yɔ.”
3 Ðɩnɛ ɛlɛ Pɩyɛɛrɩ nɛ tɔmkpɛlɩkɩyʋ lɛlʋ ɛnʋ pakʋyɩ nɛ powoki pɩlaʋ yɔɔ.
4 Pa-naalɛ papaɣzɩ seu, ɛlɛ tɔmkpɛlɩkɩyʋ lɛlʋ ɛnʋ ese nɛ ɛɖɛɛ Pɩyɛɛrɩ yɔɔ nɛ ɛlɛyɩ-ɩ talʋʋ pɩlaʋ yɔɔ.
5 Eluzi ɛ-tɩ lɛ, ɛna pɩsaŋ pɩlaʋ taa, ɛlɛ ɛtɩsʋʋ kɩ-taa.
6 Nɛ Siimɔɔ Pɩyɛɛrɩ ɖɔɖɔ talɩ, nɛ ɛsʋʋ pɩlaʋ taa. Nɛ ɛna pɩsaŋ, pasɩ-ɩ peeɖe.
7 Pɩsaʋ ŋgʋ paahuuzi ɛ-ñʋʋ yɔɔ yɔ kɩtaawɛɛ pɩsaŋ hɔɔlasɩ lɛɛsɩ cɔlɔ, ɛlɛ pekpiyi-kʋ nɛ pasɩɩ hɔɔlʋʋ.
8 Ðɩnɛ ɛlɛ tɔmkpɛlɩkɩyʋ lɛlʋ weyi ɛɛlɛyɩ talʋʋ pɩlaʋ yɔɔ yɔ ɛsʋʋ ɖɔɖɔ, nɛ ɛna nɛ etisi.
9 Mbʋ pʋyɔɔ yɔ pataanɩtɩ mayaɣ ŋga kɔtɔŋ se pɩwɛɛ se efemni sɩɖaa taa yɔ, kɔ-tɔbʋʋ.
10 Nɛ tɔmkpɛlɩkɩyaa pɩsɩ nɛ pekpe pɛ-tɛ.
11 Ɛlɛ Maarɩɩ ñasɩŋ awayɩ pɩlaʋ cɔlɔ nɛ ewiɣ. Ɛwɛɛ nɛ ewiɣ lɛ, eluzi ɛ-tɩ se ɛcɔnɩ pɩlaʋ taa,
12 nɛ ɛna Ɛsɔ tiyiyaa naalɛ, posu tokonaa kʋhʋlʋmaa nɛ pacaɣ ɖenɖe paahɩzɩ Yesu tomnaɣ yɔ, kʋɖʋm kaacaɣ ɛ-ñʋʋ ɖeɖe nɛ lɛlʋ ɛ-nɩŋgbanzɩ ɖeɖe.
13 Nɛ pɔpɔzɩ-ɩ se: “Halʋ, ɛbɛ yɔɔ ŋwiɣ?” Ecosi-wɛ se: “Pakpaɣ man-Kɩbaɣlʋ nɛ pɛɖɛna, nɛ maasɩŋ ɖenɖe pasɩ-ɩ yɔ.”
14 Ɛyɔɔdɩ tɔm ndʋ nɛ pɩtɛ lɛ, ekisini ɛ-wayɩ nɛ ɛna Yesu sɩŋ peeɖe, ɛlɛ etaaɖiɣzina se Yesu pɩɩkɛnaa.
15 Yesu pɔzɩ-ɩ se: “Halʋ, ɛbɛ yɔɔ ŋwiɣ? Anɩ ŋñɩnɩɣ?” Ɛmaɣzaɣ se pɩɩkɛ kaɖaɣ yɔɔ cɔnɩyʋ na, pʋyɔɔ eheyi-i se: “Ðajaa, ye ŋkpaɣ-ɩ yɔ, heyi-m ɖenɖe ŋsɩ-ɩ yɔ, nɛ mowolo mankpaɣ-ɩ.”
16 Yesu yaa-ɩ se: “Maarɩɩ!” Ɛlɛ kisaa lɛ, ɛyaa-ɩ Ebree taa se: “Rabuunii!” (pʋ-tɔbʋʋ se “Wɩlɩyʋ!”)
17 Yesu heyi-i se: “Yebi-m ñɔnʋʋ, mbʋ pʋyɔɔ yɔ mantɩkpatɩ Caa cɔlɔ. Ɛlɛ wolo mon-koobiya cɔlɔ nɛ ŋheyi-wɛ se: ‘Mankpaɣ man-Caa nɛ mɩ-Caa cɔlɔ, nɛ mɛ-Ɛsɔ nɛ mɩ-Ɛsɔ cɔlɔ.’”
18 Maarɩɩ Magdalaa tʋ wolo tɔmkpɛlɩkɩyaa cɔlɔ nɛ eheyi-wɛ se: “Mana Kɩbaɣlʋ!” Nɛ ɛkɛdɩ-wɛ tɔm ndʋ Yesu heyi-i yɔ.
19 Kpɩtaʋ kajalaɣ kɩyakʋ ñɩŋgʋ wiye, wɩsɩ tɛm ɖʋʋ lɛ, tɔmkpɛlɩkɩyaa kaɖɩ ɖɩɣa ŋga ka-taa paawɛɛ yɔ kɔ-nɔnɔsɩ, mbʋ pʋyɔɔ yɔ sɔɔndʋ kpaɣaɣ-wɛ nɛ Yuuda mba; ɛlɛ Yesu kɔɔ nɛ ɛsɩŋ pɛ-hɛkʋ taa nɛ eheyi-wɛ se: “Laŋhɛzɩyɛ ɛwɛɛ mɩ-cɔlɔ.”
20 Ɛyɔɔdɩ tɔm ndʋ lɛ, ɛwɩlɩ-wɛ e-nesi nɛ ɛ-hʋyʋʋ. Ðɩnɛ ɛlɛ tɔmkpɛlɩkɩyaa taa la leleŋ se pana Kɩbaɣlʋ.
21 Yesu tasɩ-wɛ heyuu se: “Laŋhɛzɩyɛ ɛwɛɛ mɩ-cɔlɔ. Ɛzɩ Caa tiyuu-m yɔ, ma ɖɔɖɔ mentiyiɣ-mɩ.”
22 Ɛtɛm tɔm ndʋ yɔɔdʋʋ lɛ, ehosi pɔ-yɔɔ nɛ eheyi-wɛ se: “Ɩmʋ fezuu kiɖeɖeu.
23 Ye ikpeɣ nɔɔyʋ ɛ-kɩwɛɛkɩm yɔ, pekpeɣ-i pʋ; ye itikpeɣ nɔɔyʋ ɛ-kɩwɛɛkɩm kɔyɔ, patikpeɣ-i pʋ.”
24 Ɛlɛ Tomaa, Hiu nɛ Naalɛ taa kʋɖʋm, weyi payaɣ se Ðom yɔ, ɛtaawɛɛ pɔ-cɔlɔ alɩwaatʋ ndʋ Yesu kɔma yɔ.
25 Pʋyɔɔ tɔmkpɛlɩkɩyaa lalaa wɛɛ nɛ peheyiɣ-i se: “Ðɩna Kɩbaɣlʋ!” Ɛlɛ eheyi-wɛ se: “Ye mantɩna e-nesi taa ñɩma pɔŋ nɛ mɛlɛkɩ me-niye ñɩma pɔŋ taa nɛ mansʋzɩ me-nesi ɛ-hʋyʋʋ tɛɛ yɔ, maakaɣ tisuu kpa.”
26 Kɩyakɩŋ lutozo wayɩ, ɛ-tɔmkpɛlɩkɩyaa tasɩ kpeɣluu ɖɩɣa taa nɛ pakaɖɩ nɔnɔsɩ, nɛ Tomaa kaawɛ pɔ-cɔlɔ. Yesu kɔɔ, ŋgʋ paakaɖɩ nɔnɔsɩ, nɛ ɛsɩŋ pɛ-hɛkʋ taa nɛ ɛtɔ se: “Laŋhɛzɩyɛ ɛwɛɛ mɩ-cɔlɔ.”
27 Pʋwayɩ lɛ eheyi Tomaa se: “Ðʋ ñe-niye cɩnɛ, nɛ ŋcɔnɩ me-nesi, nɛ ŋkpaɣ ñe-nesi nɛ ŋlɛkɩ ma-hʋyʋʋ tɛɛ, nɛ ŋyele pɩtʋʋ nɛ ŋtisi.”
28 Tomaa cosi-i se: “Man-Kɩbaɣlʋ nɛ mɛ-Ɛsɔ!”
29 Yesu heyi-i se: “Ŋna-m yɔɔ ŋtisaa? Koboyaɣ tɩnaa kɛlɛ mba patɩna ɛlɛ petisiɣ yɔ.”
30 Toovenim taa lɛ, Yesu labɩ maamaaci lakasɩ* lɛɛsɩ sakɩyɛ tɔmkpɛlɩkɩyaa ɛsɩndaa, nzɩ patɩma-sɩ takayaɣ kikpiyaɣ kanɛ ka-taa yɔ.
31 Ɛlɛ pama sɩnɛ se pɩsa nɛ itisi se Yesu kɛnɩ Krɩstʋ, Ɛsɔ Pɩyalʋ, nɛ tisuu mbʋ pʋyɔɔ lɛ, ɩpɩzɩ nɛ ihiɣ wezuu ɛ-hɩɖɛ yɔɔ.
Pɩ-tɛɛ tɔm
^ Yaa “pɩlaʋ ŋgʋ kɩ-yɔɔ pɔtɔzʋʋ yɔ.”
^ Yaa “pɩlaʋ ŋgʋ kɩ-yɔɔ pɔtɔzʋʋ yɔ.”
^ Piye piye, “labɩ yʋsasɩ.”
