Yohanɛɛsɩ 17:1-26
17 Yesu yɔɔdɩ tɔm ndʋ, nɛ ɛkpazɩ ɛ-ɛsa nɛ ɛsɔdaa lɛ, ɛtɔ se: “Caa, ñɩɣyʋʋ talaa. Sa ña-pɩyalʋ se pɩsa nɛ ña-pɩyalʋ samɩ-ŋ,
2 ɛzɩ ŋhaʋ-ɩ ɖoŋ tomnasɩ* tɩŋa yɔɔ yɔ, se pɩsa nɛ ɛha wezuu maatɛŋ mba payɩ ŋcɛlɩ-ɩ yɔ.
3 Wezuu maatɛŋ kɛlɛ se pɛwɛɛ nɛ patɩlɩɣ-ŋ,* ña Ɛsɔ toovenim tʋ kʋɖʋm koŋ, nɛ weyi ŋtiyi-i yɔ, Yesu Krɩstʋ.
4 Mansamɩ-ŋ tɛtʋ yɔɔ, mbʋ pʋyɔɔ yɔ mɛntɛm tʋmɩyɛ nɖɩ ŋɖʋ-m se mala yɔ.
5 Pʋyɔɔ lɛɛlɛɛyɔ lɛ, Caa, samɩ-m ñɔ-cɔlɔ nɛ samtʋ ndʋ maawɛnɩ ñɔ-cɔlɔ pʋcɔ nɛ ɛjaɖɛ wɛʋ yɔ.
6 “Malɩzɩ ña-hɩɖɛ nɛ mawɩlɩ ɛyaa mba ŋlɩzɩ ɛjaɖɛ yɔɔ nɛ ŋcɛlɩ-m yɔ.* Ñaatɩnɩ-wɛ, nɛ ŋcɛlɩ-m wɛ, nɛ pɔɖɔm ñɔ-tɔm yɔɔ.*
7 Lɛɛlɛɛyɔ lɛ, patɩlaa se mbʋ payɩ ŋcɛlɩ-m yɔ, pɩlɩnɩ ñɔ-cɔlɔ;
8 mbʋ pʋyɔɔ yɔ mɛncɛlɩ-wɛ tɔm ndʋ ŋcɛlɩ-m yɔ, nɛ petisi tɩ-yɔɔ nɛ patɩlɩ toovenim taa se mɔnkɔm ɛzɩ ño-lone taa caɣyʋ yɔ, nɛ petisi se ñetiyini-m.
9 Mantɩmɩɣ pɔ-yɔɔ; maatɩmɩɣ ɛjaɖɛ yɔɔ, ɛlɛ mantɩmɩɣ mba ŋcɛlɩ-m yɔ pɔ-yɔɔ, mbʋ pʋyɔɔ yɔ pɛkɛ ña-pʋyʋ;
10 nɛ mbʋ payɩ mɛwɛna yɔ pɩkɛ ña-pʋyʋ, nɛ ña-pʋyʋ kɛ man-pʋyʋ, nɛ pasamɩ-m pɛ-hɛkʋ taa.
11 “Mantɩtasɩ wɛʋ ɛjaɖɛ yɔɔ, ɛlɛ mba lɛ pɛwɛ ɛjaɖɛ yɔɔ, nɛ mɔnkɔŋ ñɔ-cɔlɔ. Caa kiɖeɖeu, cɔnɩ pɔ-yɔɔ ña-hɩɖɛ maɣmaɣ yɔɔ, nɖɩ ŋcɛlɩ-m yɔ, se pɩsa nɛ pɛkpɛndɩ kʋɖʋm* ɛzɩ ɖɩkpɛndʋʋ kʋɖʋm* yɔ.
12 Maawɛ pɔ-cɔlɔ lɛ, mɔncɔŋnaɣ pɔ-yɔɔ ña-hɩɖɛ maɣmaɣ yɔɔ, nɖɩ ŋcɛlɩ-m yɔ; nɛ mankandɩyɩ pɔ-yɔɔ nɛ pa-taa nɔɔyʋ tile ye pɩtɩkɛ ɖɩzʋʋ pɩyalʋ ɖeke yɔ, se pɩsa nɛ mayaɣ taa tɔm la.
13 Ɛlɛ lɛɛlɛɛyɔ mɔnkɔŋ ñɔ-cɔlɔ, nɛ mɔyɔɔdʋʋ tɔm ndʋ ɛjaɖɛ yɔɔ, se pɩsa nɛ man-taa leleŋ wɛɛ pilim pa-taa.
14 Mɛncɛlɩ-wɛ ñɔ-tɔm, ɛlɛ ɛjaɖɛ paɖɩ-wɛ, mbʋ pʋyɔɔ yɔ patɩkɛ ɛjaɖɛ yɔɔ mba, ɛzɩ ma ɖɔɖɔ mantɩkɛ ɛjaɖɛ yɔɔ tʋ yɔ.
15 “Maapɔzʋʋ-ŋ se ŋkʋsɩ-wɛ ɛjaɖɛ yɔɔ, ɛlɛ mɔnpɔzʋʋ-ŋ se kañatʋ tʋ yɔɔ lɛ, ŋcɔnɩ pɔ-yɔɔ.
16 Patɩkɛ ɛjaɖɛ yɔɔ mba, ɛzɩ ma ɖɔɖɔ mantɩkɛ ɛjaɖɛ yɔɔ tʋ yɔ.
17 Tɩŋnɩ toovenim yɔɔ nɛ ŋpɩsɩ-wɛ kele kele;* ñɔ-tɔm kɛ toovenim.
18 Ɛzɩ ŋtiyuu-m ɛjaɖɛ yɔɔ yɔ, ma ɖɔɖɔ mentiyi-wɛ ɛjaɖɛ yɔɔ.
19 Mɔnɖɔkʋʋ men-kele kele wɛtʋ pɔ-yɔɔ, se pɩsa nɛ mba ɖɔɖɔ lɛ, pɩtɩŋnɩ toovenim yɔɔ nɛ papɩsɩ kele kele.
20 “Maatɩmɩɣ panɛ pe-ɖeke pɔ-yɔɔ na, ɛlɛ mantɩmɩɣ ɖɔɖɔ mba panɩɣ pɔ-tɔm nɛ pɛwɛɛnɩ tisuu mɔ-yɔɔ yɔ pɔ-yɔɔ,
21 se pɩsa nɛ pa-tɩŋa pɛkpɛndɩ kʋɖʋm ɛzɩ, Caa, ma nɛ ŋ ɖɩwɛʋ nɔɔ kʋɖʋmaɣ nɛ ma nɛ wɛ ɖɩwɛɛ nɔɔ kʋɖʋmaɣ yɔ, se mba ɖɔɖɔ lɛ, ɖa nɛ wɛ ɖɩwɛɛ nɔɔ kʋɖʋmaɣ, se pɩsa nɛ ɛjaɖɛ tisi se ŋtiyi-m.
22 Mɛncɛlɩ-wɛ samtʋ ndʋ ŋcɛlɩ-m yɔ, se pɩsa nɛ pɛkpɛndɩ kʋɖʋm ɛzɩ ɖa ɖɔɖɔ ɖɩkpɛndʋʋ kʋɖʋm yɔ.
23 Ma nɛ wɛ ɖɩwɛ nɔɔ kʋɖʋmaɣ, nɛ ma nɛ ŋ ɖɩwɛɛ nɔɔ kʋɖʋmaɣ, se pɩsa nɛ pɛwɛɛ nɔɔ kʋɖʋmaɣ siŋŋ,* nɛ ɛjaɖɛ tɩlɩ se ŋtiyi-m nɛ ŋsɔɔlɩ-wɛ ɛzɩ ŋsɔɔlʋʋ-m ɖɔɖɔ yɔ.
24 Caa, mɔnsɔɔlaa se mba ŋcɛlɩ-m yɔ pɛwɛɛ mɔn-cɔlɔ ɖenɖe mɛwɛɛ yɔ, se pɩsa nɛ pana man-samtʋ ndʋ ŋha-m yɔ, mbʋ pʋyɔɔ yɔ ŋŋsɔɔlɩ-m pʋcɔ nɛ pasɩɣ ɛjaɖɛ tigiɖe.
25 Caa siɣsiɣ tʋ, toovenim taa lɛ ɛjaɖɛ tɩsɩmɩ-ŋ, ɛlɛ ma lɛ mansɩmɩ-ŋ, nɛ panɛ pasɩm mbʋ se ŋtiyi-m.
26 Meyeba nɛ patɩlɩ ña-hɩɖɛ nɛ mankaɣ yebu nɛ patɩlɩ-ɖɩ, se pɩsa nɛ sɔɔlɩm mbʋ ŋsɔɔlɩnɩ-m yɔ, pɩwɛɛ pa-taa nɛ ma nɛ wɛ ɖɩwɛɛ nɔɔ kʋɖʋmaɣ.”
Pɩ-tɛɛ tɔm
^ Yaa “ɛyaa.”
^ Yaa “pɛwɛɛ kpɛlɩkʋʋ yɔɔ nɛ patɩlɩɣ-ŋ.”
^ Yaa “Meyeba nɛ ɛyaa mba ŋlɩzɩ ɛjaɖɛ yɔɔ nɛ ŋcɛlɩ-m yɔ, patɩlɩ ña-hɩɖɛ.”
^ Yaa “nɛ pañam ñɔ-tɔm.”
^ Yaa “nɛ pɛwɛɛ nɔɔ kʋɖʋmaɣ.”
^ Yaa “ɛzɩ ɖɩwɛʋ nɔɔ kʋɖʋmaɣ.”
^ Yaa “nɛ ŋlɩzɩ-wɛ nɛ hɔɔlʋʋ.”
^ Yaa “nɛ pɛtɛzɩ wɛʋ nɔɔ kʋɖʋmaɣ.”
