Fileemɔɔ 1:1-25
1 Ma Pɔɔlɩ, salaka tʋ Krɩstʋ Yesu yɔɔ, nɛ ɖo-koobu Timootee, ɖetiyiɣni takayaɣ kanɛ ɖo-koobu kʋsɔɔlʋ Fileemɔɔ weyi ɖa nɛ ɩ ɖɩlakɩ tʋmɩyɛ yɔ,
2 nɛ ɖo-koobu halɩñɩnʋ Afiya, nɛ Arɩsiipu weyi ɛkɛ Krɩstʋ sɔɔja ɛzɩ ɖa yɔ, nɛ ɛgbɛyɛ nɖɩ ɖɩwɛ ña-ɖɩɣa taa yɔ:*
3 Tɛtɛ nɛ ihiɣ lootiye nɛ laŋhɛzɩyɛ nɖɩ ɖɩlɩnɩ ɖa-Caa Ɛsɔ nɛ Kɩbaɣlʋ Yesu Krɩstʋ pɔ-cɔlɔ yɔ.
4 Mɛnsɛɣ mɛ-Ɛsɔ paa ɛzɩmtaa se ɛlabaɣ lɛ alɩwaatʋ ndʋ mɔntɔzʋʋ ñɔ-yɔɔ ma-adɩma taa yɔ,
5 mbʋ pʋyɔɔ yɔ, mɛwɛɛ nɛ manɩɣ pɔyɔɔdʋʋ ñe-tisuu nɛ sɔɔlɩm mbʋ ŋwɛnɩ Kɩbaɣlʋ Yesu nɛ ɛyaa kiɖeɖema tɩŋa yɔɔ yɔ pɩ-tɔm.
6 Mantɩmɩɣ se tisuu mbʋ ña nɛ lalaa ɩkawa yɔ, piseɣti-ŋ nɛ ŋtɩlɩ paa pʋyʋ kɩbanʋ weyi ɖɩwɛna pɩtɩŋnɩ Krɩstʋ yɔɔ yɔ.
7 Mbʋ pʋyɔɔ yɔ, koobu, mehiɣ taa leleŋ nɛ laŋɩyɛ hɛzʋʋ siŋŋ alɩwaatʋ ndʋ manɩ ñɔ-sɔɔlɩm tɔm yɔ, mbʋ pʋyɔɔ yɔ ŋhɛzɩ ɛyaa kiɖeɖema laŋa.
8 Lɩmaɣzɩyɛ nɖɩ ɖɩ-yɔɔ lɛ, paa mɛwɛnɩ waɖɛ ma nɛ Krɩstʋ ɖɔ-nɔɔ kʋɖʋmaɣ labʋ taa se meheyi-ŋ kpayɩ se ŋla mbʋ pɩmʋnaa kɔyɔ,
9 sɔɔlɩm yɔɔ lɛ, ma Pɔɔlɩ mentendiɣ-ŋ kitenduu, mbʋ pʋyɔɔ yɔ mansʋtʋyaa, nɛ lɛɛlɛɛyɔ ɖɔɖɔ lɛ mɛnkɛ salaka tʋ Krɩstʋ Yesu yɔɔ.
10 Mentendiɣ-ŋ man-pɩɣa Onezim yɔɔ, weyi manpɩsɩ ɛ-caa alɩwaatʋ ndʋ mɛwɛ salaka taa yɔ.*
11 Ðooo lɛ, ɛtaawɛ-ŋ wazaɣ, ɛlɛ lɛɛlɛɛyɔ lɛ, ɛwɛ ma nɛ ŋ wazaɣ.
12 Manpɩsɩɣnɩ-ŋ ɩ, ɛɛɛ, ɛnʋ weyi mɔnsɔɔlɩ-ɩ siŋŋ yɔ.*
13 Maasɔɔlaa se mansɩɩ-ɩ mɔn-cɔlɔ cɩnɛ nɛ ɛɖʋ-m lɩm ño-lone taa alɩwaatʋ ndʋ mɛwɛ salaka taa tɔm kɩbandʋ yɔɔ yɔ.
14 Ɛlɛ mantɩsɔɔlɩ se mala nabʋyʋ nɛ ŋtitisi pɩ-yɔɔ, se pɩsa nɛ tʋmɩyɛ kɩbanɖɛ nɖɩ ŋlakɩ yɔ, ŋtaalabɩ-ɖɩ ɛzɩ pañɩɣ ñɔ-yɔɔ kɩñɩɣʋ yɔ, ɛlɛ ŋlabɩ-ɖɩ nɛ ña-laŋɩyɛ faaa.
15 Pʋtɔma yɔ, pʋyɔɔ ɖeyi ɖeyi ese alɩwaatʋ pazɩ, se pɩsa nɛ ɛpɩsɩ nɛ ɛwɛɛ ñɔ-cɔlɔ tam,
16 nɛ ɛtaatasɩ wɛʋ ɛzɩ yom yɔ, ɛlɛ ɛkɛ weyi ɛkɩlɩ yom yɔ. Ɛpɩsɩ koobu kʋsɔɔlʋ, kɔzɩ kɔzɩ mɛ-ɛsɩndaa; ɛlɛ ñɛ-ɛsɩndaa lɛ, ɛpɩsɩ koobu kʋsɔɔlʋ tomnaɣ taa nɛ Kɩbaɣlʋ taa nɛ pɩkɩlɩ.
17 Ye mbʋ, ye ŋnawa se mɛnkɛ ña-taabalʋ yɔ, mʋ-ɩ camɩyɛ ɛzɩ ɛzɩma ŋmʋʋ ma-maɣmaɣ yɔ.
18 Pɩtasɩ lɛ, ye ɛɛlabɩ-ŋ kɩdɛkɛdɩm nabʋyʋ yaa ɛɛtɔɔ-ŋ kɩmɩyɛ naɖɩyɛ yɔ, yele nɛ pɩpɩsɩ man-sʋʋtʋ.
19 Ma Pɔɔlɩ, ma-maɣmaɣ mamaɣnɩ-ŋ nɛ me-nesi: Mankaɣ-ŋ pʋ hɛyʋʋ—nɛ maacazɩɣ yɔɔdʋʋ kɩmɩyɛ nɖɩ ŋwɛnɩ-m yɔ ɖɩ-tɔm, nɖɩ lɛ ña-maɣmaɣ.
20 Ɛɛɛ, koobu, Kɩbaɣlʋ taa lɛ, sɩnɩ-m mbʋ; hɛzɩ ma-laŋɩyɛ Krɩstʋ taa.
21 Mantaɣ liu se ŋkaɣ labʋ mbʋ, mbʋ yebina nɛ mamaɣ-ŋ takayaɣ kanɛ, nɛ manawa se ŋkaɣ labʋ nɛ pɩcɛzɩ ndʋ mɔyɔɔdaa yɔ.
22 Pɩtasɩ lɛ, ñɔɔzɩ-m ɖɩzʋyɛ, mbʋ pʋyɔɔ yɔ mantaɣ liu se mɩ-adɩma yɔɔ lɛ, pakaɣ-m yebu nɛ manpɩsɩ mɩ-cɔlɔ.
23 Epafraasɩ, weyi ɛkɛ salaka tʋ ɛzɩ ma, ɛ nɛ Krɩstʋ Yesu pɔ-nɔɔ kʋɖʋmaɣ labʋ taa yɔ, etiyiɣni-ŋ ɛ-sɛtʋ;
24 Maarkɩ, Aristaarkɩ, Demaasɩ nɛ Luka, mba ma nɛ wɛ ɖɩlakɩ tʋmɩyɛ yɔ, petiyiɣni-ŋ ɖɔɖɔ pɛ-sɛtʋ.
25 Kɩbaɣlʋ Yesu Krɩstʋ lootiye ɛwɛɛ fezuu ŋgʋ ɩlɩzɩɣ nɛ ɩwɩlɩɣ yɔ kɩ-cɔlɔ.
Pɩ-tɛɛ tɔm
^ Yaa “nɛ koobiya mba palakɩ kediɣzisi ña-ɖɩɣa taa yɔ.”
^ Piye piye, “alɩwaatʋ ndʋ pɔhɔkɩ-m yɔ.”
^ Piye piye, “weyi ɛkɛ ma-maɣmaɣ ma-laŋɩyɛ yɔ.”
