3 Yohanɛɛsɩ 1:1-14
1 Ma abalʋ weyi ɛsʋtʋyaa yɔ,* mamaɣnɩ takayaɣ kanɛ man-kʋsɔɔlʋ Gayuusi, weyi mɔnsɔɔlɩ-ɩ toovenim taa yɔ.
2 Man-kʋsɔɔlʋ, mantɩmɩɣ se piɖeni-ŋ pɩtɩŋa pɩ-taa nɛ ŋwɛɛ alaafɩya, ɛzɩ lɛɛlɛɛyɔ pɩwɛʋ nɛ piɖeɣni-ŋ* yɔ.
3 Mbʋ pʋyɔɔ yɔ man-taa labɩ leleŋ siŋŋ alɩwaatʋ ndʋ koobiya kɔma nɛ palɩzɩ aseɣɖe toovenim tɔm ndʋ ŋɖɔkaa yɔ tɩ-yɔɔ yɔ, ɛzɩ ŋwɛʋ nɛ ŋɖɔŋ toovenim taa yɔ.
4 Nabʋyʋ fɛyɩ nɛ pɩhaɣ-m taa leleŋ siŋŋ nɛ pɩkɩlɩ pʋnɛ:* se manɩɩ se men-piya wɛɛ nɛ sɩɖɔŋ toovenim taa.
5 Man-kʋsɔɔlʋ, ŋwɩlɩ ñe-siɣsiɣ wɛtʋ mbʋ ŋlakɩ koobiya yɔ pɩ-taa, paa pɛkɛ-ŋ agɔma yɔ.
6 Palɩzɩ aseɣɖe ñɔ-sɔɔlɩm yɔɔ ɛgbɛyɛ ɛsɩndaa. Mentendi-ŋ, sɩɩ-wɛ nɛ pɔɖɔ pa-nʋmɔʋ ɛzɩ pɩmʋnaʋ Ɛsɔ ɛsɩndaa yɔ.
7 Mbʋ pʋyɔɔ yɔ ɛ-hɩɖɛ yɔɔ palɩwa, nɛ patɩmʋ nabʋyʋ ajɛɛ taa mba cɔlɔ.
8 Pʋyɔɔ pɩkɛnɩ-ɖʋ kɩjɛyʋʋ se ɖɩmʋ ɛyaa mba ɛgɔndʋ camɩyɛ, se pɩsa nɛ ɖɩpɩsɩ mba pa nɛ wɛ pɛkpɛndɩɣ nɛ palakɩ tʋmɩyɛ toovenim taa yɔ.
9 Mama tɔm natʋyʋ ɛgbɛyɛ, ɛlɛ Diyotrefɛɛsɩ weyi ɛsɔɔlɩ wɛnʋʋ kajalaɣ lone pɛ-hɛkʋ taa yɔ, ɛɛmʋʋ mbʋ payɩ pɩlɩnɩ ɖɔ-cɔlɔ yɔ nɛ ñamtʋ.
10 Mbʋ yebina nɛ ye mɔnkɔma yɔ, mankaɣ yebu nɛ pɔtɔzɩ tʋma wena eɖiɣni labʋ yɔ a-yɔɔ, ɛzɩma ɛyɛlɩɣnɩ tɔm kɩdɛkɛdɩtʋ ɖɔ-yɔɔ yɔ. Ɛlɛ lakasɩ nzɩ sɩtɩmaɣ-ɩ, ekiziɣ ɖɔɖɔ koobiya mʋʋ nɛ ñamtʋ; nɛ mba pɔsɔɔlɩ-wɛ mʋʋ yɔ, ɛñɩnɩɣ se ɛɖaŋ-wɛ nɛ ɛlɩzɩ-wɛ ɛgbɛyɛ taa.
11 Man-kʋsɔɔlʋ, taamaɣzɩnɩ mbʋ pɩfɛyɩ ɖeu yɔ, ɛlɛ maɣzɩnɩ mbʋ pɩwɛ ɖeu yɔ. Weyi ɛlakɩ mbʋ pɩwɛ ɖeu yɔ ɛlɩnɩ Ɛsɔ cɔlɔ. Weyi ɛlakɩ mbʋ pɩfɛyɩ ɖeu yɔ, ɛtɩna Ɛsɔ.
12 Pa-tɩŋa, nɛ halɩ pɩkpɛndɩnɩ toovenim maɣmaɣ pɔyɔɔdɩ tɔm kɩbandʋ Demetriyuusi yɔɔ. Toovenim taa lɛ, ɖa ɖɔɖɔ ɖiɖiɣni lɩzʋʋ aseɣɖe ɛ-yɔɔ, nɛ ŋsɩm mbʋ se aseɣɖe nɖɩ ɖɩlɩzɩɣ yɔ ɖɩkɛ toovenim.
13 Maawɛnɩ tɔm sakɩyɛ se mama-ŋ, ɛlɛ mantɩsɔɔlɩ se mowolo pɩ-yɔɔ nɛ mama-ŋ nɛ kɩmamaʋ nɛ tɔlɩm.
14 Ɛlɛ mantaɣ liu se piileɖiɣ lɛ mankaɣ-ŋ naʋ, nɛ ɖɩkaɣ ɖama yɔɔdɩnʋʋ nɛ nɔɔ.
Tɛtɛ nɛ ŋwɛɛnɩ laŋhɛzɩyɛ.
Taabalaa tiyiɣni-ŋ pɛ-sɛtʋ. Yaa taabalaa hɩla kʋɖʋm kʋɖʋm nɛ ŋcɛlɩ-wɛ mɛn-sɛtʋ.
Pɩ-tɛɛ tɔm
^ Yaa “ɛgbɛyɛ taa ɛzʋtʋyʋ.”
^ Yaa “piɖeɣni ña-kalɩzaɣ.”
^ Pɩpɩzɩɣ pɩkɛ, “Nabʋyʋ fɛyɩ se mɛwɛɣnɩ ɛsɩmɩyɛ pɩ-yɔɔ nɛ pɩkɩlɩ se.”
