2 Kɔrɛntɩ mba 5​:​1-21

  • Ðisuu ɖɩjaɣyɛ nɖɩ ɖɩwɛ ɛsɔdaa yɔ (1-10)

  • Ceɣu tʋmɩyɛ (11-21)

    • Wonuu kɩlɩzʋʋ kɩfalʋʋ (17)

    • Krɩstʋ lone taa caɣyaa (20)

5  Mbʋ pʋyɔɔ yɔ ɖɩsɩm mbʋ se ye ɖa-ɖɩɣa ŋga kɛwɛ tɛtʋ yɔɔ yɔ, kizinziku kʋnɛ, pɔyɔkɩ-kʋ yɔ,* ɖɩwɛɣnɩ kuduyuu nakʋyʋ ŋgʋ kɩlɩnɩ Ɛsɔ cɔlɔ yɔ, ɖɩɣa ŋga patɩma-kɛ nɛ nesi yɔ, ŋga kɛwɛɣ ɛsɔdaa tamtam yɔ.  Mbʋ pʋyɔɔ yɔ toovenim taa lɛ, ɖɩwɛɛ nɛ ɖimuzuu ɖɩɣa* kanɛ ka-taa, nɛ ɖe-liu wɛɛ pɩŋŋ se ɖɩkpaɣ ŋga pɔñɔɔzaa nɛ pasɩɩ-ɖʋ yɔ nɛ ɖisuu, ŋga kalɩnɩ ɛsɔdaa yɔ,  se pɩsa nɛ alɩwaatʋ ndʋ ɖisuu-kɛ yɔ, pataana-ɖʋ ndaakpeɖe.  Toovenim taa lɛ, ɖa mba ɖɩwɛ kizinziku kʋnɛ kɩ-tɛɛ yɔ, ɖimuzuu, nɛ pɩnɩɣ-ɖʋ, mbʋ pʋyɔɔ yɔ ɖɩtɩsɔɔlɩ se ɖɩhɔzɩ kʋnɛ yɔ, ɛlɛ ɖɩsɔɔlaa se ɖɩtɩnɩ lɛɛkʋ kɩ-yɔɔ, se pɩsa nɛ wezuu li mbʋ pɩsɩkɩ yɔ.  Nɛ weyi ɛñɔɔzɩ-ɖʋ wezuu ŋgʋ yɔ, ɛnʋ lɛ Ɛsɔ, ɛnʋ hanɩ-ɖʋ fezuu se pɩkɛ mbʋ pɩkɔŋnɩ ɛsɩndaa yɔ pɩ-yʋsaɣ.  Pʋyɔɔ paa ɛzɩmtaa lɛ, ɖɩwɛ abalɩtʋ siŋŋ nɛ ɖɩnawa se alɩwaatʋ ndʋ ɖɩkpɛndɩ ɖɩwɛnɩ ɖo-tomnaɣ yɔ,* ɖiposini Kɩbaɣlʋ,  mbʋ pʋyɔɔ yɔ ɖɩɖɔŋnɩ tisuu, ɖɩɩɖɔŋnɩ mbʋ pɩnaɣ yɔ.  Ɛlɛ ɖɩwɛ abalɩtʋ siŋŋ, nɛ pɩkɩlɩ-ɖʋ ɖeu se ɖiposini tomnaɣ nɛ ɖɩwɛɛ Kɩbaɣlʋ cɔlɔ.  Mbʋ yebina nɛ paa ɖɩwɛ ɛ-cɔlɔ yaa ɖiposini-i yɔ, ɖa-kaɖʋwa lɛ se ɖɔ-tɔm ɛkɛdɩnɩ-ɩ. 10  Mbʋ pʋyɔɔ yɔ pɩwɛɛ se ɖa-tɩŋa ɖɩlɩɩ Krɩstʋ tɔm ɖɩhʋyɛ ɛsɩndaa, nɛ pɩsa nɛ pɛhɛyɩ paa weyi lakasɩ nzɩ ɛlaba alɩwaatʋ ndʋ ɛɛwɛ tomnaɣ taa yɔ sɩ-yɔɔ, paa sɩkɛ kɩbanzɩ yaa kɩdɛkɛdɩsɩ yɔ. 11  Ðɩtɩlɩ Kɩbaɣlʋ sɔɔndʋ seu, pʋyɔɔ lɛ ɖɩwɛɛ nɛ ɖiseɣtiɣ ɛyaa, ɛlɛ Ɛsɔ sɩm-ɖʋ camɩyɛ. Paa mbʋ yɔ, mantaɣ liu se mɩ-ɛhʋyɛ sɩnɩ-mɩ nɛ ɩtɩlɩ-ɖʋ camɩyɛ ɖɔɖɔ. 12  Ðɩɩɖaɣnɩɣ ɖa-tɩ sam mɩ-cɔlɔ, ɛlɛ ɖiseɣtiɣ-mɩ se ɩkʋndɩ ɖɔ-yɔɔ, nɛ ɩpɩzɩ icosi mba pakʋndʋʋ mbʋ pɩnaɣ ɛsa yɔɔ yem yɔ pɩ-yɔɔ, ɛlɛ paakʋndʋʋ mbʋ pɩwɛ laŋɩyɛ taa yɔ pɩ-yɔɔ yɔ. 13  Mbʋ pʋyɔɔ yɔ ye ɖa-ñʋŋ taa ɩcɔwa yɔ, Ɛsɔ yɔɔ pɩwɛ mbʋ; ye ɖa-maɣzɩm ɛwɛ ɖeyi ɖeyi yɔ, mɩ-yɔɔ yɔɔ pɩwɛ mbʋ. 14  Mbʋ pʋyɔɔ yɔ sɔɔlɩm mbʋ Krɩstʋ wɛna yɔ piseɣtiɣ-ɖʋ, mbʋ pʋyɔɔ yɔ tɔm tʋnɛ tɩ-yɔɔ ɖitisiɣ, se ɛyʋ kʋɖʋm sɩbɩ ɛyaa tɩŋa yɔɔ; mbʋ pʋyɔɔ yɔ, ɛyaa tɩŋa kaasɩba. 15  Nɛ ɛsɩbɩ ɛyaa tɩŋa yɔɔ se pɩsa nɛ mba pɛwɛ wezuu yɔ, pataatasɩ caɣʋ wezuu pa-tɩ yɔɔ, ɛlɛ pacaɣ-kʋ weyi ɛsɩbɩ pɔ-yɔɔ nɛ pefezi-i yɔ ɛ-yɔɔ. 16  Pʋyɔɔ lɛ, kpaɣnɩ lɛɛlɛɛyɔ lɛ, ɖɩɩsɩŋ nɔɔyʋ tomnaɣ yɔɔ. Paa ɖɩɩsɩm Krɩstʋ tomnaɣ yɔɔ nɛ pɩɖɛɛ yɔ, toovenim taa lɛ, ɖɩɩtasɩɣ-ɩ sɩm mbʋ. 17  Pʋyɔɔ lɛ, ye nɔɔyʋ nɛ Krɩstʋ pɛwɛ nɔɔ kʋɖʋmaɣ yɔ, ɛkɛ wonuu kɩlɩzʋʋ kɩfalʋʋ; wondu kɩbɩndʋ ɖɛwa; ɩna, wondu kɩfatʋ lɩwa. 18  Ɛlɛ pɩtɩŋa payɩ pɩlɩnɩ Ɛsɔ cɔlɔ, ɛnʋ weyi ɛtɩŋnɩ Krɩstʋ yɔɔ nɛ eyele se ɖa nɛ ɩ ɖiceɣ, nɛ ɛcɛlɩ-ɖʋ ceɣu tʋmɩyɛ yɔ, 19  pʋ-tɔbʋʋ se Ɛsɔ tɩŋaɣnɩ Krɩstʋ yɔɔ nɛ ɛ nɛ ɛjaɖɛ peceɣu, nɛ ɛtaatasɩɣ kpaɣʋ pa-kɩwɛɛkɩm nɛ ɛlakɩnɩ tʋmɩyɛ, nɛ ɛɖʋzɩ ɖe-nesi tɛɛ ceɣu tɔm. 20  Pʋyɔɔ lɛ, ɖɩkɛ lone taa caɣyaa Krɩstʋ lone taa, nɛ pɩwɛ ɛzɩ Ɛsɔ wɛɛ nɛ ɛtɩŋɩɣnɩ ɖɔ-yɔɔ nɛ etendiɣ ɛyaa yɔ. Krɩstʋ lone taa, ɖitendiɣ ɛyaa se: “Iyele nɛ mɩ nɛ Ɛsɔ iceɣ.” 21  Weyi ɛtɩtɩlɩ kɩwɛɛkɩm yɔ, ɛpɩsɩ-ɩ kɩwɛɛkɩm* ɖɔ-yɔɔ, se pɩsa nɛ pɩtɩŋnɩ ɛ-yɔɔ lɛ, ɖɩpɩsɩ siɣsiɣ tɩnaa Ɛsɔ ɛsɩndaa.

Pɩ-tɛɛ tɔm

Yaa “kɩyɔlaa yɔ.”
Yaa “ɖɩjaɣyɛ.”
Piye piye, “ɖɩwɛnɩ ɖa-ɖɩɣa tomnaɣ taa yɔ.”
Yaa “kɩwɛɛkɩm kɩlaʋ.”