1 Pɩyɛɛrɩ 5:1-14
5 Pʋyɔɔ lɛ, ma weyi mɛnkɛ ɛzʋtʋyʋ ɛzɩ mɩ yɔ, Krɩstʋ kʋñɔmɩŋ tɛ aseɣɖe tʋ nɛ weyi ɛkaɣ hiɣu ɖɔɖɔ samtʋ ndʋ pakaɣ tɩ-yɔɔ kuluu yɔ, mentendiɣ* ɛzʋtʋyaa mba pɛwɛ mɩ-hɛkʋ taa yɔ se:
2 Iɖiyi Ɛsɔ ewiɖe nɖɩ pɛcɛlɩ-mɩ se ɩcɔnɩ ɖɩ-yɔɔ yɔ, ɩla tʋmɩyɛ nɖɩ ɛzɩ ɛgbɛyɛ yɔɔ cɔnɩyaa yɔ,* pɩtaakɛnɩ kɩjɛyʋʋ, ɛlɛ ɩlabɩ-ɖɩ nɛ laŋɩyɛ faaa Ɛsɔ ɛsɩndaa; pɩtaakɛnɩ mulum kɛzɛɣa yɔɔ, ɛlɛ ɩlabɩ-ɖɩ nɛ sɔɔlɩm faaa;
3 ɩtaapɩsɩ kɩbaɣlaa mba pɛkɛ Ɛsɔ ñɩm yɔ pɔ-yɔɔ, ɛlɛ ɩpɩsɩ mba pahaɣ ewiɖe kɩɖaŋ kɩbaŋ yɔ.
4 Nɛ alɩwaatʋ ndʋ palɩzɩɣ ninɖiɣyu sɔsɔ nɛ pawɩlɩ yɔ, ɩkaɣ mʋʋ samtʋ hulaɣ ŋga kaacadɩɣ yɔ.
5 Mbʋ ɖɔɖɔ mɩ evebiya, iluzi mɩ-tɩ mba pasʋtʋyaa* yɔ pɛ-tɛɛ. Ɛlɛ mɩ-tɩŋa payɩ, iluzi mɩ-tɩ* ɖama tɛɛ, mbʋ pʋyɔɔ yɔ Ɛsɔ kaɖɩɣnɩ tɩ kpazɩyaa, ɛlɛ ɛlakɩ lootiye mba poluzuu pa-tɩ yɔ.
6 Pʋyɔɔ lɛ, iluzi mɩ-tɩ Ɛsɔ nesi ɖoŋ ñɩnzɩ tɛɛ, se pɩsa nɛ ɛkpazɩ-mɩ alɩwaatʋ kɩbandʋ yɔɔ,
7 nɛ ɩɖʋzɩ* mɩ-nɩɣzɛ kpeekpe e-nesi tɛɛ, mbʋ pʋyɔɔ yɔ ɛcɔŋnɩ mɩ-yɔɔ.
8 Ɩɖɔkɩ mɩ-maɣzɩm, ifeŋiɣ! Mi-koyindu Eleeu cɔʋ ɛzɩ mʋʋzʋʋ* ŋgʋ kɩmakɩ kubusi yɔ, nɛ ɛñɩnɩɣ se ɛtɔɔ nɔɔyʋ.*
9 Ɛlɛ ɩkaɖɩnɩ-ɩ, ɩɖɔkɩ kpam tisuu taa, mbʋ pʋyɔɔ yɔ ɩsɩm mbʋ se mi-koobiya kpeekpe ɖiɣni katʋʋ kʋñɔmɩŋ kʋɖʋmɩŋ ɛnɩ ɛjaɖɛ yɔɔ.
10 Ɛlɛ ɩtɛŋ kʋñɔmɩŋ tɔɔʋ alɩwaatʋ pazɩ lɛ, lootiye kpeekpe tɛ Ɛsɔ, weyi ɛya-mɩ ɛ-tamtam samtʋ taa mɩ nɛ Krɩstʋ mɩ-nɔɔ kʋɖʋmaɣ labʋ taa yɔ, ɛ-maɣmaɣ ɛkaɣ-mɩ tɛzʋʋ falɩsʋʋ. Ɛkaɣ labʋ nɛ ɩɖɔkɩ kpam, ɛkaɣ labʋ nɛ ɩkpa ɖoŋ, ɛkaɣ yebu nɛ ɩka camɩyɛ.
11 Ɛnʋ tɩnɩ ɖoŋ tamtam. Amɛn.
12 Mantɩŋnɩ Silɩvɛɛ,* weyi ɛkɛ koobu siɣsiɣ tʋ mɛ-ɛsɩndaa yɔ ɛ-yɔɔ nɛ mama-mɩ tɔm pazɩ se mankpazɩ-mɩ ɖoŋ nɛ malɩzɩ-mɩ aseɣɖe siŋŋ se lootiye nɖɩ Ɛsɔ labɩ-mɩ yɔ, ɖɩkɛ toovenim. Ɩɖɔkɩ mɩ-tɩ kpam ɖɩ-taa.
13 Halʋ* weyi ɛwɛ Babilɔɔnɩ yɔ, weyi palɩzɩ-ɩ ɛzɩ mɩ ɖɔɖɔ yɔ, etiyiɣni-mɩ ɛ-sɛtʋ, nɛ man-pɩyalʋ Maarkɩ ɖɔɖɔ tiyiɣni-mɩ ɛ-sɛtʋ.
14 Ɩsɛɛ ɖama nɛ lɩkpaɣzaɣ yɔɔ mʋzʋʋ mbʋ pɩ-taa sɔɔlɩm wɛɛ yɔ.
Tɛtɛ nɛ mɩ mba payɩ mɩ nɛ Krɩstʋ ɩwɛ nɔɔ kʋɖʋmaɣ yɔ, ɩwɛɛnɩ laŋhɛzɩyɛ.
Pɩ-tɛɛ tɔm
^ Yaa “mansazɩɣ.”
^ Yaa “ɩcɔnɩ ɖɩ-yɔɔ camɩyɛ.”
^ Yaa “iluzi mɩ-tɩ ɛzʋtʋyaa.”
^ Yaa “ɩta tɩ luzuu.” Piye piye, “isuu tɩ luzuu.”
^ Piye piye, “ɩpɛɖɩ.”
^ Yaa “ɛñɩnɩɣ nɔɔyʋ se ɛtɔɔ.”
^ Yaa “ɛñɩnɩɣ nɔɔyʋ se ɛtɔɔ.”
^ Ɛnʋ payaɣ ɖɔɖɔ se Silaasɩ.
^ Grɛɛkɩ taa lɛ, palabɩnɩ tɔm piye naɖɩyɛ tʋmɩyɛ cɩnɛ nɛ pɩwɩlɩɣ se halʋ tɔm pɔyɔɔdʋʋ, nɛ pɩtʋʋ fɛyɩ se pɩsɩŋnɩ ɛgbɛyɛ nɖɩ ɖɩwɛ Babilɔɔnɩ yɔ.
