1 Kɔrɛntɩ mba 16:1-24
16 Piyele nɛ mbʋ pɩwɛɛ se pɔcɔɔ ɛyaa kiɖeɖema yɔ pɩ-hɔɔlʋʋ taa lɛ, ɩpɩzɩɣ nɛ ɩɖɔ paɣtʋ ndʋ manɖʋ Galaatii agbaa yɔ tɩ-yɔɔ.
2 Paa kpɩtaʋ ŋgʋ kɩ-kajalaɣ evemiye wiye lɛ, pɩwɛɛ se mɩ-taa paa weyi ɛsɩɩ nabʋyʋ kɩjaʋ pɩlɩɩnɩ mbʋ ɛwɛna yɔ pɩ-cɔlɔ, se pɩsa nɛ pataacɔɔ nabʋyʋ alɩwaatʋ ndʋ mantalɩɣ yɔ.
3 Ɛlɛ mantalɩɣ lɛ, mankaɣ tiyuu abalaa mba ɩyɔɔdʋʋ pɔ-tɔm mɩ-takayɩsɩ taa se ɩtaɣ-wɛ liu yɔ se pakpaɣ mɩ-kʋjɔʋ faaa ñɩŋgʋ nɛ powoni Yeruzalɛm.
4 Ɛlɛ, ye mamaɣzɩɣ se pɩpɔzʋʋ se ma ɖɔɖɔ mowolo yɔ, ma nɛ wɛ ɖɩkaɣ wobu peeɖe.
5 Ɛlɛ mankaɣ kɔm mɩ-cɔlɔ alɩwaatʋ ndʋ mɛntɛzɩɣ Masedonii yɔ, mbʋ pʋyɔɔ yɔ mankaɣ tɛzʋʋ Masedonii;
6 nɛ pɩtɩla yɔ mankaɣ caɣʋ mɩ-cɔlɔ yaa halɩ mankaɣ wɛʋ mɩ-cɔlɔ niŋkaɣ alɩwaatʋ taa, se pɩsa nɛ ɩsɩ-m pazɩ ɖenɖe mankaɣ wobu yɔ.
7 Mbʋ pʋyɔɔ yɔ, lɛɛlɛɛyɔ mantɩsɔɔlɩ se mana-mɩ ɖɛʋ taa yem, mbʋ pʋyɔɔ yɔ, mantaɣ liu se mankaɣ caɣʋ mɩ-cɔlɔ alɩwaatʋ natʋyʋ pazɩ, ye Yehowa* ɛha nʋmɔʋ yɔ.
8 Ɛlɛ mancakɩ Efɛɛzɩ nɛ pɩkɔɔ pɩtalɩ Pantekooti Kazandʋ,
9 mbʋ pʋyɔɔ yɔ, patʋlɩ-m nɔnɔɔ sɔsɔɔ nakɛyɛ se pɩsa nɛ mala Ɛsɔ sɛtʋ tʋmɩyɛ, ɛlɛ koyindinaa sakɩyɛ wɛɛ.
10 Nɛ ye Timootee ɛtalaa yɔ, iyele nɛ sɔɔndʋ ɛtaakpa-ɩ nɛ nabʋyʋ, ɛwɛɣ mɩ-hɛkʋ taa lɛ; mbʋ pʋyɔɔ yɔ ɛwɛɛ nɛ ɛlakɩ Yehowa* tʋmɩyɛ ɛzɩ ma yɔ.
11 Pʋyɔɔ lɛ, nɔɔyʋ etaanimi-i. Ɩsɩɩ-ɩ laŋhɛzɩyɛ taa, se pɩsa nɛ ɛkɔɔ mɔn-cɔlɔ, mbʋ pʋyɔɔ yɔ ma nɛ koobiya ɖɩɖaŋɩ-ɩ.
12 Piyele nɛ ɖo-koobu Apoloosi yɔ, mentendi-i siŋŋ se ɛkɔɔ mɩ-cɔlɔ, ɛ nɛ koobiya. Ɛtaasɔɔlɩ se ɛkɔɔ lɛɛlɛɛyɔ, ɛlɛ ɛkaɣ kɔm alɩwaatʋ ndʋ ehikiɣ waɖɛ yɔ.
13 Ɩcaɣnɩ mɩ-ɛsa, ɩɖɔkɩ kpam tisuu taa, ɩwɛɛ abalɩtʋ, ɩkpa ɖoŋ.
14 Mbʋ payɩ ɩlakɩ yɔ, ɩlabɩ-pʋ nɛ sɔɔlɩm.
15 Lɛɛlɛɛyɔ koobiya, menseɣtiɣ-mɩ: Ɩsɩm mbʋ se Stefanaasɩ ɖɩɣa taa mba kɛnɩ Akayii taa kajalaɣ pee nɛ paha pa-tɩ nɛ paɖʋ lɩm ɛyaa kiɖeɖema.
16 Mɩ ɖɔɖɔ iwolo pɩ-yɔɔ nɛ iluzi mɩ-tɩ ɛyaa mba pɛwɛ pa-tɩyɛ nɛ mba payɩ pɛwɛ nɔɔ kʋɖʋmaɣ nɛ palakɩ tʋmɩyɛ siŋŋ yɔ pɛ-tɛɛ.
17 Ɛlɛ man-taa wɛ leleŋ nɛ ɛzɩma Stefanaasɩ nɛ Fɔrtunaatuusi nɛ Akayikuusi pɛwɛ mɔn-cɔlɔ yɔ, mbʋ pʋyɔɔ yɔ paasɩnɩ-m alɩwaatʋ ndʋ ɩfɛyɩ mɔn-cɔlɔ yɔ.
18 Mbʋ pʋyɔɔ yɔ, pɛhɛzɩ ma-laŋɩyɛ nɛ mɩ-ñɩnɖɛ.* Pʋyɔɔ lɛ, ɩwɩlɩ ɛyaa mba pɛwɛ ɛzɩ mba yɔ mɩ-ɛsɩmɩyɛ.
19 Aazii agbaa tiyiɣni-mɩ a-sɛtʋ. Akiila nɛ Prisɩka nɛ ɛgbɛyɛ nɖɩ ɖɩwɛ pa-ɖɩɣa taa yɔ,* pɛsɛɣ-mɩ nɛ taa leleŋ Kɩbaɣlʋ taa.
20 Koobiya tɩŋa sɛɣ-mɩ. Ɩsɛɛ ɖama nɛ lɩkpaɣzaɣ yɔɔ mʋzʋʋ mbʋ pɩwɛ kele kele yɔ.
21 Ma Pɔɔlɩ mɛn-sɛtʋ yɔ, ma-maɣmaɣ me-nesi tɛɛ sɛtʋ.
22 Ye nɔɔyʋ ɛtɩsɔɔlɩ Kɩbaɣlʋ yɔ, pɔlɔ ɛ-yɔɔ nɔɔ kɩdɛkɛdaɣ. Hayɩ ɖa-Kɩbaɣlʋ, kɔɔ!
23 Tɛtɛ nɛ Kɩbaɣlʋ Yesu lootiye wɛɛ mɩ-cɔlɔ.
24 Tɛtɛ nɛ mɔn-sɔɔlɩm wɛɛ mi-kpeekpe mɩ-cɔlɔ mɩ nɛ Krɩstʋ Yesu mɩ-nɔɔ kʋɖʋmaɣ labʋ taa.
Pɩ-tɛɛ tɔm
^ Cɔnɩ Tɔm pee sɔsɔna tɔbʋʋ lɩzʋʋ.
^ Cɔnɩ Tɔm pee sɔsɔna tɔbʋʋ lɩzʋʋ.
^ Piye piye, “pɛhɛzɩ men-fezuu nɛ mɩ-ñɩŋgʋ.”
^ Yaa “nɛ koobiya mba palakɩ kediɣzisi pa-ɖɩɣa taa yɔ.”
