Sɔnɔ sukulibiya sakɩyɛ lakɩ sukuli “sukuli ɖaŋ” ŋgʋ kɩwɛ ŋgee yɔ kɩ-taa; sukuli ɖaŋ ŋgʋ lɛ pa-maɣmaɣ pa-ɖɩsɩ. Ye mbʋ pɩwɛ ñɔ-hɔɔlʋʋ taa yɔ, ɛbɛ ŋpɩzɩɣ nɛ ŋla nɛ ŋkpɛlɩkɩ tɔm camɩyɛ? Lɔŋ tasʋʋ mbʋ pɩkɔŋ yɔ, pɩpɩzɩɣ nɛ pɩsɩnɩ-ŋ. a

•  Lɔŋ tasʋʋ kagbanzɩ mbʋ pɩpɩzɩɣ nɛ pɩsɩnɩ-ŋ yɔ

•  Ndʋ ña-ɖaɣʋnaa yɔɔdaa yɔ

 Lɔŋ tasʋʋ kagbanzɩ mbʋ pɩpɩzɩɣ nɛ pɩsɩnɩ-ŋ yɔ

•   La ɖʋtʋ camɩyɛ. Ñaɣ pana nɛ ŋwɛɛnɩ evemiye taa ɖʋtʋ kɩbandʋ nɛ pɩwɛɛ ɛzɩ ŋkaɣ wobu sukuli ɖaŋ maɣmaɣ taa yɔ. Lɩzɩ alɩwaatʋ ndʋ ŋkaɣ labʋ sukuli tʋma, ɖɩɣa taa tʋma nɛ tʋma lɛɛna wena a-tɔm cɛyaa yɔ. Ŋpɩzɩɣ ŋlɛɣzɩ ɖʋtʋ ndʋ ŋlaba yɔ ye pɩpɔzʋʋ yɔ.

   Bibl paɣtʋ kiɖe: “Pɩtɩŋa pɩɖɔ camɩyɛ nɛ pʋtʋʋzɩ cɔlɩɩɩ.”—1 Kɔrɛntɩ mba 14:40.

   “Paa evemiye nɖɩ lɛ, la ɖʋtʋ ɛzɩ ŋkaɣ wobu sukuli maɣmaɣ ɖaŋ taa yɔ. Lɩzɩ alɩwaatʋ ndʋ tɩ-yɔɔ ŋkaɣ labʋ tʋmɩyɛ yɔ.”—Katie

   Suwe ŋmaɣzɩɣ? Ɛbɛ yɔɔ pɩwɛɣ ɖeu se ŋma ɖʋtʋ ndʋ ŋlaba yɔ takayaɣ nakɛyɛ taa, nɛ ŋla ɖɔɖɔ ña-tʋmɩyɛ lone nɖɩ ɖɩ-taa ŋpɩzɩɣ nɛ ŋna camɩyɛ yɔ?

•   Ðɔ paɣtʋ ndʋ ŋɖʋ ña-tɩ yɔ tɩ-yɔɔ. Ɛyʋ weyi ɛpɩwa yɔ, ɛnɩɣ pɩ-taa se pɩpɔzʋʋ se ɛla tʋmɩyɛ nɖɩ ɛɖʋwa se ɛlakɩ yɔ, paa e-liu ɛfɛyɩ se ɛlabɩ-ɖɩ yɔ. Ye mbʋ taatɔ se ŋkaɣ tʋmɩyɛ nɖɩ labʋ pʋwayɩ.

   Bibl paɣtʋ kiɖe: “Ɩla tʋmɩyɛ nɛ ɛsɩyɛ kɩsɛɛmɩyɛ, ɩtaala feendu.”—Roma mba 12:11.

   “Mbʋ pɩkɩlɩ kaɖɛ yɔ lɛ se ŋɖɔ paɣtʋ ndʋ ŋɖʋ ña-tɩ yɔ tɩ-yɔɔ. Pɩwɛ kɛlɛʋ se ŋhiɣ kawanaɣ nɛ ŋtɔ se ŋkaɣ labʋ tʋmɩyɛ pʋwayɩ. Toovenim taa lɛ, ŋŋkaɣ-ɖɩ labʋ. Piyeki nɛ ŋcaɣ wayɩ.”—Alexandra

   Suwe ŋmaɣzɩɣ? Paa evemiye nɖɩ, ye ŋlakɩ ño-sukuli taa tʋma alɩwaatʋ kʋɖʋmtʋ yɔɔ nɛ lone kʋɖʋmɖɩyɛ taa yɔ, ɛzɩma pɩsɩɣnɩ-ŋ nɛ ŋɖɔ paɣtʋ ndʋ ŋɖʋ ña-tɩ yɔ tɩ-yɔɔ?

•   Ñɩnɩ lone nɖɩ ɖɩ-taa ŋlakɩ ña-tʋma yɔ. Wɛɛnɩ wondu ndʋ payɩ pɩpɔzʋʋ se ŋlabɩnɩ tʋmɩyɛ yɔ. Yele nɛ ɖenɖe ŋlakɩ tʋmɩyɛ yɔ, pɩmʋnɩ camɩyɛ, ɛlɛ pɩtaakɛ lone nɖɩ ɖiyeki se ɖom ɛkpaɣ-ŋ kɛlɛʋ yɔ. Pɩkɛ tʋmɩyɛ labʋ lone, pɩtɩkɛ lone nɖɩ taa ŋhɛzɩɣ yaa ŋɖou yɔ. Ye ŋŋpɩzɩɣ se ŋhiɣ lone naɖɩyɛ nɖɩ ɖɩ-taa ŋpɩzɩɣ nɛ ŋla sukuli tʋma ɖeke yɔ, pɩtɩla tʋma ana a-alɩwaatʋ talɩɣ lɛ, ŋpɩzɩɣ nɛ ŋñɔɔzɩ tɔɔnaɣ ɖɩlaɖɛ yaa ɖaŋ ŋkʋ kɩ-taa ŋhɩnɩɣ yɔ nɛ pɩwɛ ɛzɩ kpɛlɩkʋʋ lone yɔ.

   Bibl paɣtʋ kiɖe: “Ɛyʋ waka tʋ lɩmaɣza ɖɔʋ.”—Aduwa 21:5.

   “Ñɔɔzɩ ñɛ-tɛ basket pombo, video game waa, nɛ ña-cɩmʋʋ nɛ ŋsɩɩ ɖoli; ɖezi ñɛ-tɛ pɔrtaabɩlɩ. Pɩcɛyaa se aleɣya wondu ɩtaawɛɛ lone nɖɩ ɖɩ-taa ŋkpɛlɩkɩɣ yɔ.”—Elizabeth

   Suwe ŋmaɣzɩɣ? Lɛɣzɩtʋ ndʋ ŋpɩzɩɣ nɛ ŋla lone nɖɩ ɖɩ-taa ŋlakɩ tʋmɩyɛ yɔ ɖɩ-taa nɛ pɩsɩnɩ-ŋ nɛ ŋkpɛlɩkɩ camɩyɛ?

•   Ka ñʋʋ tʋmɩyɛ nɖɩ ŋlakɩ yɔ ɖɩ-yɔɔ. Ka ñʋʋ tʋmɩyɛ nɖɩ ŋɖʋwa se ŋlakɩ yɔ ɖɩ-yɔɔ nɛ taayele nɛ tʋma lɛɛna hɔ ña-lɩmaɣza. Ye ŋwɛɛ nɛ ŋñakɩ pana se ŋla tʋma sakɩyɛ kpaagbaa yɔ, pɩpɩzɩɣ nɛ piyiɣdi-ŋ nɛ ña-tʋmɩyɛ ɛɛkaɣ ɖɔm camɩyɛ.

   Bibl paɣtʋ kiɖe: “Ɩlabɩnɩ mɩ-alɩwaatʋ tʋmɩyɛ camɩyɛ.”—Efɛɛzɩ mba 5:16.

   “Ye mɛn-tɛ pɔrtaabɩlɩ ɛwɛ mɔn-cɔlɔ yɔ, pɩwɛɣ-m kaɖɛ se manka ñʋʋ nɛ tʋmɩyɛ nɖɩ malakɩ yɔ. Mɛwɛɛkɩɣ ma-alɩwaatʋ nɛ malakɩ mbʋ pɩɩwazɩɣ-m pʋyʋ yɔ.”—Olivia

   Suwe ŋmaɣzɩɣ? Alɩwaatʋ ndʋ ŋkpakɩɣ nɛ ŋlakɩnɩ tʋmɩyɛ naɖɩyɛ yɔ, ŋpɩzɩɣ nɛ ŋsuyi tɩ-yɔɔ pazɩ pazɩ?

•   Wɛɛnɩ hɛzʋʋ alɩwaatʋ. Ŋpɩzɩɣ nɛ ŋkʋyɩ nɛ ŋɖɔ, ŋsaa cɛɛcɛ pazɩ yaa ŋhɔ ña-tɩ pazɩ. Halɩ ŋpɩzɩɣ nɛ ŋla aleɣya naayɛ nɛ pɩkpazɩ-ŋ ɖoŋ. Ɛlɛ takayaɣ ŋga payaɣ se School Power yɔ, kɔyɔɔdaa se: “Ñaɣ pana nɛ ŋtɛzɩ ña-tʋmɩyɛ nɛ pʋcɔ. Hɛzʋʋ alɩwaatʋ kaɣ-ŋ wazʋʋ nɛ pɩkɩlɩ ye ŋnawa se ŋtɛm ña-tʋmɩyɛ yɔ.”

   Bibl paɣtʋ kiɖe: “Hɛzʋʋ nikpiɖe tɛɛ ɖo kɩlɩ ɖeu nesi naalɛ tɛɛ ɖo nɛ tʋmɩyɛ nɛ fezuu kʋñɔŋ.”—Eklesɩyastɩ 4:6.

   “Ðoŋ ɖoŋ sukuli taa ɖɩkpɛlɩkɩɣ ɛzɩma ɖɩma cɩmʋʋ nakʋyʋ yaa ɛzɩma ɖɩlɩzɩ anjaʋwaa yɔ. Kpaɣnɩ alɩwaatʋ ndʋ ɖiyebi wobu sukuli yɔ, mana tʋma ana a-wazaɣ. Pɩwɛ ɖeu se pɩtasɩnɩ tɔm kpɛlɩkʋʋ lɛ, ɖɩlakɩ tʋma lɛɛna wena akpazɩɣ-ɖʋ ɖoŋ yɔ.”—Taylor

   Suwe ŋmaɣzɩɣ? Hɛzʋʋ mbʋ pɩwɛ se ŋmʋ nɛ pɩsɩnɩ-ŋ nɛ ŋhiɣ ɖoŋ kpazʋʋ nɛ ŋɖaɣnɩ pazʋʋ tʋmɩyɛ camɩyɛ?