Paa pɩnaɣ ŋga pamɩyɩsɩɣ lɩm piya evelisi nzɩ pafalɩsɩ-sɩ toovenim taa yɔ. Ña yɔ, ŋwɛɛ nɛ ŋmaɣzɩɣ ɛzɩma ŋkpɛzɩ nɩŋgbaŋaɣ ŋga yɔ pɩ-yɔɔ? Ye mbʋ yɔ pɩpɔzʋʋ se ŋtɩlɩ mbʋ tɩ haʋ nɛ lɩm mɩyɩsʋʋ pɛkɛnaa yɔ.

•  Ɛbɛ lɩm mɩyɩsʋʋ kɛnaa?

•  Ɛbɛ tɩ haʋ kɛnaa?

•  Ɛbɛ yɔɔ lɩm mɩyɩsʋʋ tɔm cɛyaa?

•  Ndʋ ña-ɖaɣʋnaa yɔɔdaa yɔ

•  Tɔm kulubutu nɛ toovenim

 Ɛbɛ lɩm mɩyɩsʋʋ kɛnaa?

 Bibl taa lɛ, lɩm mɩyɩsʋʋ tɩkɛ lɩm pɩyʋʋ ɛyʋ tomnaɣ yɔɔ yem ɛlɛ pɩkɛ e-tomnaɣ kpeekpe mɩyɩsɩɣ lɩm tɛɛ. Nɛ sɔnzɩ nzɩ sɩ-tɔbʋʋ nɩʋ wɛ ŋgee kpem.

•   Ɛzɩma pamɩyɩsɩɣ no-tomnaɣ kpeekpe lɩm tɛɛ yɔ, pɩwɩlɩɣ ɛyaa kpeekpe se ŋŋtasɩɣ labʋ ña-maɣmaɣ ñɔ-sɔɔlɩm ñe-wezuu caɣʋ taa.

•   Ɛzɩma palɩzɩɣ-ŋ nɛ lɩm tɛɛ yɔ, pɩwɩlɩɣ se ŋpaɣzɩɣ caɣʋ wezuu kɩfalʋʋ ŋgʋ kɩ-taa ŋlakɩ Ɛsɔ sɔɔlɩm yɔ.

 Alɩwaatʋ ndʋ pamɩyɩsɩɣ-ŋ lɩm yɔ, ŋwɩlɩɣ ɛyaa kpeekpe ɛsɩndaa se Yehowa mʋnɩna se ɛɖʋ paɣtʋ pɩlɩɩnɩ kɩbam nɛ kɩdɛkɛdɩm pɔ-yɔɔ nɛ ŋɖuwaa se ŋkaɣ labʋ mbʋ payɩ ɛpɔzʋʋ-ŋ yɔ.

 Maɣzɩ tɔm tʋnɛ tɩ-yɔɔ: Ɛbɛ yɔɔ ŋsɔɔlaa se ŋwɩlɩ ɛyaa kpeekpe ɛsɩndaa se ŋha ña-tɩ Yehowa se ŋla ɛ-sɔɔlɩm? Kalɩ 1 Yohanɛɛsɩ 4:19 nɛ Natʋ 4:11.

 Ɛbɛ tɩ haʋ kɛnaa?

 Pʋcɔ nɛ pamɩyɩsɩ-ŋ lɩm lɛ, pɩpɔzʋʋ se ŋha ña-tɩ Yehowa alɩwaatʋ ndʋ ŋwɛɣ ñe-ɖeke yɔ. Ɛzɩma ŋpɩzɩɣ nɛ ŋla mbʋ?

 Pɩwɛɛ se ŋla adɩma naayɛ nɛ ŋheyi Yehowa a-taa se ŋkaɣ labʋ ɛ-sɔɔlɩm tamtam, nɛ paa ɛbɛ ɛkaɣ labʋ nɛ paa ɛbɛ lalaa ɛlɩzaa se palakɩ yɔ, ña lɛ, mbʋ ɛkaɣ-ŋ pɔzʋʋ yɔ mbʋ ŋkaɣ labʋ.

 Lɩm mɩyɩsʋʋ kaɣnɩ yebu nɛ ɛyaa lalaa tɩlɩ se ŋkpaɣ ña-tɩ nɛ ŋha Yehowa alɩwaatʋ ndʋ ŋŋwɛ ñe-ɖeke yɔ. Piyeki nɛ lalaa tɩlɩ se ŋkizi ña-tɩ nɛ lɛɛlɛɛyɔ lɛ, ŋpɩsɩ Yehowa pʋyʋ.—Maatiyee 16:24.

 Maɣzɩ tɔm tʋnɛ tɩ-yɔɔ: Ɛbɛ yɔɔ ñe-wezuu caɣʋ wɛɣ ɖeu nɛ pɩkpaɖɩ ye ŋha ña-tɩ Yehowa yɔ? Kalɩ Izaayii 48:17, 18 nɛ Ebree mba 11:6.

 Ɛbɛ yɔɔ lɩm mɩyɩsʋʋ tɔm cɛyaa?

 Yesu ɖʋ paɣtʋ se pamɩyɩsɩ lɩm ɛ-tɔmkpɛlɩkɩyaa. (Maatiyee 28:19, 20) Ye mbʋ, pɩcɛyaa se pamɩyɩsɩ lɩm Krɩstʋ mba. Toovenim taa lɛ Bibl wɩlɩɣ se lɩm mɩyɩsʋʋ yekina nɛ ɛyʋ hiɣ ñʋʋ yabʋ.—1 Pɩyɛɛrɩ 3:21.

 Paa mbʋ yɔ, ɛzɩma ŋsɔɔlɩ Yehowa nɛ ɛzɩma ña nɛ ɩ mɩ-taabalɩyɛ mʋ ñɩm ñɛ-ɛsɩndaa yɔ mbʋ pɩwɛɛ se pituyi-ŋ nɛ pamɩyɩsɩ-ŋ lɩm. Pɩwɛɛ se na-lɩmaɣza ɛla nɔɔ kʋɖʋmaɣ nɛ keɣa maɖʋ ñɩna. Ɛmawa se: “Malakɩ ɛzɩma nɛ mɛnsɛɛ Kɩbaɣlʋ kɩbam mbʋ ɛlabɩ-m yɔ pɩ-yɔɔ? . . [Mayaɣ] Kɩbaɣlʋ hɩɖɛ; mɔnɖɔŋ mbʋ monɖuuni Kɩbaɣlʋ ɛyaa samaɣ kpeekpe ɛsɩndaa yɔ, pɩ-yɔɔ.”—Keɣa 115:12-14.

 Maɣzɩ tɔm tʋnɛ tɩ-yɔɔ: Kɩbam mbʋ Yehowa labɩ-ŋ nɛ ɛzɩma ŋpɩzɩɣ nɛ ŋwɩlɩ ñɛ-ɛsɩmɩyɛ pɩ-yɔɔ? Kalɩ Wayɩ wayɩ paɣtʋ 10:12 nɛ Roma mba 12:1.