Abalaa nɛ halaa sakɩyɛ cakɩ ɖama cɔlɔ pʋcɔ nɛ pɔɖɔkʋʋ nesi. Nabɛyɛ lakɩ mbʋ mbʋ pʋyɔɔ yɔ pamaɣzɩɣ se pɩsɩɣnɩ-wɛ nɛ pana se pamʋnɩ ɖama yaa patɩmʋnɩ ɖama; nɛ pamaɣzɩɣ ɖɔɖɔ se piyeki nɛ piɖeni-wɛ pe-nesi ɖɔkʋʋ taa. Ɛzɩ pɩkɛ lɩmaɣzɩyɛ kɩbanɖɛ se halʋ nɛ abalʋ pacaɣ ɖama cɔlɔ pʋcɔ pɔɖɔkɩ nesi na?

Tɔm ñʋʋ kʋnɛ kɩ-taa ɖɩkaɣ cosuu tɔm tʋnɛ tɩ-yɔɔ

•  Suwe Bibl yɔɔdʋʋ?

•  Ye ña nɛ nɔɔyʋ ɩwɛ ɖama cɔlɔ yɔ pɩsɩɣnɩ-ŋ se ŋñɔɔzɩ ña-tɩ nɛ ŋɖɔkɩ nesi na?

•  Ye ña nɛ nɔɔyʋ ɩwɛ ɖama cɔlɔ yɔ pɩsɩɣnɩ-mɩ se ɩtɔsɩ liidiye na?

•  Ye ña nɛ nɔɔyʋ ɩwɛ ɖama cɔlɔ yɔ pɩsɩɣnɩ-ŋ se ŋtaaɖɔkɩ nesi nɛ weyi ɛtɩmʋnɩ-ŋ yɔ?

•  Nabʋyʋ wɛɛ se pɩpɩzɩɣ pɩsɩnɩ-ŋ nɛ ŋtɩlɩ weyi ɛmʋnɩ-ŋ yɔ?

 Suwe Bibl yɔɔdʋʋ?

•   Bibl ɖʋ paɣtʋ se ye halʋ nɛ abalʋ patɩɖɔkɩ nesi yɔ pataasʋʋnɩ ɖama. Kɩɖaʋ nakʋyʋ yɔ. Kɩyɔɔdʋʋ se: «Ikizi kʋzʋʋ kɩdɛkɛdʋʋ.» (1 Tesalooniiki mba 4:3; 1 Kɔrɛntɩ mba 6:18) Paɣtʋ ndʋ titukuuni ɖɔɖɔ halʋ nɛ abalʋ, mba pɛwɛ ɖama cɔlɔ yɔ paa paɖʋ pa-taa se pakaɣ nesi ɖɔkʋʋ yɔ. a Bibl paɣtʋ kandɩyɩɣ halʋ nɛ abalʋ pɔ-yɔɔ se hoɣa ŋga patɩɖʋna yɔ kataakɔɔ; nɛ tɩkandɩyɩɣ pɔ-yɔɔ ɖɔɖɔ se kala lɛɛna wena mba pɛwɛ ɖama cɔlɔ nɛ patɩɖɔkɩ nesi yɔ pakatɩɣ yɔ ataatalɩ-wɛ.

•   Ɛsɔ labɩnɩ nesi ɖɔkʋʋ ɖʋtʋ. Alɩwaatʋ ndʋ ɛlabɩ nesi ɖɔkʋʋ ɖʋtʋ yɔ ɛyɔɔdaa se: «Abalʋ kaɣ yebu ɛ-caa nɛ e-ɖoo nɛ ɛñɔɔnɩ ɛ-halʋ, nɛ pakaɣ pɩsʋʋ tomnaɣ kʋɖʋmaɣ.» (Kiɖe Tɛɛ Tɔm 2:24) Alɩwaatʋ ndʋ halʋ nɛ abalʋ pɔɖɔkʋʋ nesi nɛ poɖuuni ɖama yɔ piyeki se pɔ-hɔʋ ɛwɛɛnɩ tigiɖe kɩbanɖɛ nɛ sɔɔlɩm wɛɛ kɩ-taa.

 Ye ña nɛ nɔɔyʋ ɩwɛ ɖama cɔlɔ yɔ pɩsɩɣnɩ-ŋ se ŋñɔɔzɩ ña-tɩ nɛ ŋɖɔkɩ nesi na?

 Nabɛyɛ cosuu se ɛɛɛ. Pamaɣzɩɣ se ye halʋ nɛ abalʋ pɛwɛ ɖama cɔlɔ nɛ pɛkpɛndɩɣ nɛ palakɩ ɖɩɣa tʋma yɔ pɩsɩɣnɩ-wɛ nɛ pana ɖama wɛtʋ. Ɛlɛ mbʋ pɩ-tɔm cɛyaa nɛ pɩpɩzɩɣ pɩsɩna nɛ piɖeni nabɛyɛ pe-nesi ɖɔkʋʋ taa yɔ mbʋ lɛ ɖuutu ndʋ palakɩ ɖama yɔ.

 Ɛbɛ pɩzɩɣ pɩsɩnɩ halʋ nɛ abalʋ nɛ pɛkpɛlɩkɩ ɛzɩma pɔñɔɔnɩ ɖama alɩwaatʋ kɩbandʋ nɛ kʋñɔŋ alɩwaatʋ taa yɔ? Alɩwaatʋ ndʋ halʋ nɛ abalʋ pacakɩ ɖama cɔlɔ se pʋcɔ nɛ pɔɖɔkɩ nesi yɔ pa-taa paa weyi pɩzɩɣ nɛ ɛkpaɣ lɩmaɣzɩyɛ se paya ɖama; ye mbʋ pɩtɩkɛ nʋmɔʋ kɩbaŋʋ ŋgʋ kiyeki se piɖeni-wɛ pe-nesi ɖɔkʋʋ taa yɔ. Ɛlɛ pa-taabalɩyɛ cɛyɩsɩɣ ye pɔɖɔŋ ɖuutu ndʋ palabɩ ɖama yɔ tɩ-yɔɔ nɛ pɛkpɛndɩɣ se palʋbɩnɩ kala wena pakatɩɣ yɔ.

 Tobi lɛ: Ye halʋ nɛ abalʋ palɩzaa se pacakɩ ɖama cɔlɔ pʋcɔ nɛ pɔɖɔkɩ nesi yɔ, mbʋ ɛzɩ pɩɩsɩnɩ-wɛ nɛ pɔɖɔkɩ nesi lɛ, pɩsɩɣnɩ-wɛ se paya ɖama na.

 Bibl paɣtʋ kiɖe: «Mbʋ payɩ ɛyʋ ɖuu yɔ, mbʋ ɖɔɖɔ ɛkaɣ kʋm.»—Galaatii mba 6:7.

 Ye ña nɛ nɔɔyʋ ɩwɛ ɖama cɔlɔ yɔ pɩsɩɣnɩ-mɩ se ɩtɔsɩ liidiye na?

 Nabɛyɛ cosuu se ɛɛɛ. Ɛgbɛyɛ naɖɩyɛ labɩ akɔnta Etaazuunii ɛjaɖɛ taa nɛ ɖɩna se ye pakpaɣ ɛyaa 10 yɔ, mba palɩzaa se pacakɩ ɖama cɔlɔ nɛ pʋcɔ pɔɖɔkɩ nesi yɔ pa-taa 4 labɩ mbʋ, mbʋ pʋyɔɔ yɔ pamaɣzaa se ye palabɩ mbʋ yɔ pɩsɩɣnɩ-wɛ se pɔtɔsɩ liidiye. Mba pacaɣ ɖama cɔlɔ se pʋcɔ nɛ pɔɖɔkɩ nesi yɔ, palabɩ mbʋ nɛ pʋwayɩ pɔpɔzɩ-wɛ tɔm lɛ, pa-taa sakɩyɛ yɔɔdaa se pakatɩɣ liidiye kʋñɔŋ nɛ pʋyɔɔ lɛ patɩñɔɔzɩtɩ pa-tɩ se pɔɖɔkɩ nesi.

 Mba palɩzɩɣ se pacakɩ ɖama cɔlɔ pʋcɔ nɛ pɔɖɔkɩ nesi yɔ pɩkɔŋnɩ-wɛ kala lɛɛna sakɩyɛ, kɔzɩ kɔzɩ halaa. Kɩɖaʋ nakʋyʋ yɔ: Ðoŋ ɖoŋ lɛ halʋ nɛ abalʋ payaɣ ɖama nɛ pɩtɛ lɛ, halʋ cɔŋnɩnɩ piya yɔɔ e-ɖeke.

 Tobi lɛ: Mba pacakɩ ɖama cɔlɔ se pʋcɔ pɔɖɔkɩ nesi yɔ kala wena pakatɩɣ yɔ acɛzɩ wazasɩ nzɩ pamaɣzɩɣ se pehikiɣ yɔ.

 Bibl paɣtʋ kiɖe: «Ma Yehowa, mɛkɛnɩ ñɛ-Ɛsɔ, Weyi ɛwɩlɩɣ-ŋ tɔm se pɩwazɩ ña-maɣmaɣ yɔ.»—Izaayii 48:17.

 Ye ña nɛ nɔɔyʋ ɩwɛ ɖama cɔlɔ yɔ pɩsɩɣnɩ-ŋ se ŋtaaɖɔkɩ nesi nɛ weyi ɛtɩmʋnɩ-ŋ yɔ?

 Nabɛyɛ cosuu se ɛɛɛ. Ɛlɛ takayaɣ nakɛyɛ yɔɔdaa se: «Ðoŋ ɖoŋ lɛ mba pacakɩ ɖama cɔlɔ se pʋcɔ nɛ pɔɖɔkɩ nesi yɔ kiɖe tɛɛ lɛ paaɖiɣziɣna se pɩkaɣ-wɛ wɛʋ kaɖɛ se paya ɖama pʋwayɩ.» (Fighting for Your Marriage.) Ɛbɛ yɔɔ? Mbʋ pʋyɔɔ yɔ, mba pacakɩ ɖama cɔlɔ se pʋcɔ nɛ pɔɖɔkɩ nesi yɔ, alɩwaatʋ wɛɣ nɛ tɩɖɛɣ lɛ pa-taa nabɛyɛ pɩzɩɣ nɛ peɖiɣzina se hɔɔlɩŋ weyi ɩ-taa patɩmʋnɩ ɖama yɔ ɩɖɔ sakɩyɛ. Ŋgʋ alɩwaatʋ ndʋ tɩ-taa lɛ, pɩtɩla pɛwɛnɩ ɖɩɣa kpɩnɛ nɖɩ pa-tɩŋa pɔsɔɔlɩ siŋŋ yɔ, yaa pɛkpɛndaa nɛ pakɩndɩ liidiye naɖɩyɛ yaa halʋ haɣ hoɣa ŋga patɩɖʋna yɔ. Ñɩnɩyaa yɔɔdaa se piyeki nɛ paapɩzɩɣ se paya ɖama nɛ pɩkɛnɩ-wɛ kɩjɛyʋʋ se pacaɣ ɖama cɔlɔ mbʋ pʋyɔɔ yɔ kɩlabɩm nabʋyʋ fɛyɩ. b Takayaɣ ŋga kɔyɔɔdaa se tɔm ndʋ tɩ-tɔbʋʋ lɛ se: «Halaa nɛ abalaa mba pacakɩ ɖama cɔlɔ se pʋcɔ nɛ pɔɖɔkɩ nesi yɔ paa pɩwɛɛ se pa-taa nabɛyɛ ɩya ɖama yɔ paapɩzɩɣ se pala mbʋ, ɛlɛ pɛtɛzɩɣ nesi ɖɔkʋʋ mbʋ pʋyɔɔ yɔ mbʋ papɩzɩɣ nɛ pala.»

 Tobi lɛ: Ye ña nɛ nɔɔyʋ ɩcaɣ ɖama cɔlɔ se pʋcɔ nɛ ɩɖɔkɩ nesi yɔ, mbʋ ɛzɩ pɩɩsɩnɩ-ŋ nɛ ŋkpaɣ lɩmaɣza kɩbana lɛ pɩpɩzɩɣ piyele nɛ pɩwɛ-ŋ kaɖɛ se ŋcɛ ɛyʋ ɛnʋ ye ŋkɔm nɛ ŋna se ɛtɩmʋnɩ-ŋ yɔ.

 Bibl paɣtʋ kiɖe: «Lɔŋsɩnɖʋ naɣ kaɖɛ nɛ ɛmɛlɩɣ, ɛlɛ weyi ɛfɛyɩnɩ lɛɣtʋ yɔ, ɛwɛɣ ɖɛʋ yɔɔ yem nɛ ehikiɣ ɖɩ-kɛzɛɣa.»—Aduwa 22:3.

 Nabʋyʋ wɛɛ se pɩpɩzɩɣ pɩsɩnɩ-ŋ nɛ ŋtɩlɩ weyi ɛmʋnɩ-ŋ yɔ?

 Kala wena ŋpɩzɩɣ nɛ ŋkatɩ ye ña nɛ nɔɔyʋ ɩcaɣ ɖama cɔlɔ se pʋcɔ nɛ ɩɖɔkɩ nesi yɔ ŋpɩzɩɣ nɛ ŋfɛɛ-yɛ nɛ ŋla mbʋ pɩpɩzɩɣ pɩsɩnɩ-ŋ nɛ piɖeni-ŋ ñe-nesi ɖɔkʋʋ taa yɔ. Ɛzɩma tɩyɛ? Ye ŋɖɔŋ lɔŋ weyi Bibl tasɩɣ nesi ɖɔkʋʋ hɔɔlʋʋ taa yɔ ɩ-yɔɔ yɔ. Kpaɣ alɩwaatʋ nɛ ŋtɩlɩ ɛyʋ weyi ŋñɩnɩɣ se ña nɛ ɩ ɩɖɔkɩ nesi yɔ camɩyɛ pʋcɔ nɛ ña nɛ ɩ ɩkpɛndɩ nɛ ɩwɛɛ ɖama cɔlɔ ɛzɩ halʋ nɛ ɛ-walʋ yɔ. Weyi ŋlɩzɩɣ se ña nɛ ɩ ɩɖɔkɩ nesi yɔ ye ña nɛ ɩ ɩwɛnɩ kaɖʋsɩ nɛ tisuu kʋɖʋmam yɔ pɩwɛɣ ɖeu nɛ pɩkɩlɩ se e-keɖewa eseɣtini-ŋ nɛ ŋlɩzɩ-ɩ.

 Lɔŋ tasʋʋ mbʋ pɩpɩzɩɣ pɩsɩnɩ-ŋ nɛ ŋsɩɩ ñe-nesi ɖɔkʋʋ tigiɖe camɩyɛ nɛ ŋhiɣ koboyaɣ yɔ ɩwɛ Bibl taa. c Bibl taa paɣtʋ kila pɩzɩɣ asɩnɩ-ŋ nɛ . . .

•   ŋtaacaɣ kʋzʋʋ kɩdɛkɛdʋʋ wezuu

•   ŋwɛɛnɩ wɛtʋ kɩbandʋ ndʋ tɩsɩɣnɩ-ŋ se ŋkɛ walʋ yaa halʋ kɩbanʋ yɔ

•   ŋtɩlɩ weyi ña nɛ ɩ ɩɖanɩɣ ɖama yɔ ɛ-wɛtʋ ndʋ tɩwɩlɩɣ se ɩpɩzɩɣ iwolo ɖanɩyɛ yɔɔ yaa ɩcɛ ɖama yɔ

 Pɩsa nɛ ŋtɩlɩ nɛ pɩkpaɖɩ pɩlɩɩnɩ tɔm tʋnɛ tɩ-yɔɔ lɛ, wolo jw.org hɔɔlʋʋ «Nesi ɖɔkʋʋ nɛ hɔʋ taa wezuu caɣʋ» taa.

 Bibl paɣtʋ kiɖe: «Ɛsɔ fezuu ɖiyina nɛ pama Masɩ kpeekpe nɛ sɩwazɩɣ se pawɩlɩ tɔm.»—2 Timootee 3:16.