Bibl tɔm cosuu

 Ɛsɔ ɖʋ-ɖʋ hɩɖɛ nɛ ɛha-ɖʋ tɩ-yɔɔ wɛʋ lɩzʋʋ waɖɛ. Ɛha-ɖʋ waɖɛ se ɖa-maɣmaɣ ɖɩkpaɣ lɩmaɣza. Pɩtɩkɛ ɛnʋ lɩzɩɣnɩ mbʋ pɩtalɩɣ-ɖʋ yɔ nɛ ɛtɩɖʋ ɖɔɖɔ mbʋ ɖɩkaɣ labʋ ɖe-wezuu caɣʋ taa yɔ nɛ ɛsɩɩ. Yele nɛ ɖɩna ndʋ Bibl yɔɔdʋʋ yɔ.

•   Ɛsɔ lɩzɩ ɛyaa ɛ-lɛzʋʋ. (Kiɖe Tɛɛ Tɔm 1:26) Ðɩnɩɣzɩnɩ ɖa-Lɩzɩyʋ mbʋ pʋyɔɔ yɔ ɖɩpɩzɩɣ nɛ ɖɩlɩzɩ wɛtʋ kɩbandʋ ɛzɩ sɔɔlɩm nɛ siɣsiɣ wɛtʋ nɛ ɖɩwɩlɩ; ɛlɛ kpɩna ñaapɩzɩɣ nɛ awɛɛnɩ wɛtʋ ndʋ. Nɛ ɛzɩ ɖa-Lɩzɩyʋ yɔ ɖɩwɛnɩ tɩ-yɔɔ wɛʋ lɩzʋʋ waɖɛ.

•   Sakɩyɛ taa lɛ ɖalɩzɩɣnɩ mbʋ ɖɛ-tɛ cee wayɩ kaɣ kɛʋ yɔ. Bibl seɣtiɣ-ɖʋ se ‘ɖɩlɩzɩ wezuu . . . ɖiwelisi Ɛsɔ nɔɔ taa tɔm,’ pʋ-tɔbʋʋ lɛ se ɖɩlɩzɩ se ɖɩñaŋ ɛ-paɣtʋ. (Wayɩ Wayɩ Paɣtʋ 30:19, 20) Ye ɖɩtaawɛɛnɩ tɩ-yɔɔ wɛʋ lɩzʋʋ waɖɛ yɔ lɔŋ taasʋʋ mbʋ pɩtaawɛɛnɩ tɔbʋʋ nɩʋ nɛ halɩ pɩtaamʋna. Mbʋ ɛzɩ Ɛsɔ kaañɩɣ ɖɔ-yɔɔ se ɖɩɖɔ ndʋ ɛyɔɔdʋʋ yɔ tɩ-yɔɔ lɛ, eseɣtiɣ-ɖʋ nɛ sɔɔlɩm se: «Ye ŋŋtisaɣ nɛ ŋwelisiɣ man-paɣtʋ! Ðɩnɛ ɛlɛ ña-laŋhɛzɩyɛ kaapɩsɩ ɛzɩ pɔɔ yɔ.»—Izaayii 48:18.

•   Ɛsɔ tɩla ɖʋtʋ natʋyʋ nɛ ɛsɩɩ nɛ tiyeki se piɖeni-ɖʋ yaa pitaaɖeni-ɖʋ. Ye ŋsɔɔlaa se piɖeni-ŋ yɔ pɩwɛɛ se ŋla tʋmɩyɛ nɛ kpekpeka. Bibl yɔɔdʋʋ se: «Mbʋ payɩ ñe-nesi pɩzɩɣ labʋ yɔ, labɩ-pʋ nɛ ño-ɖoŋ kpeekpe.» (Eklezɩyasɩtɩ 9:10) Kɩyɔɔdʋʋ ɖɔɖɔ se: «Paa pɩɩlabɩ ɛzɩma yɔ, ɛyʋ kpekpeka tʋ ɖʋtʋ ɖɔŋnɩ-ɩ camɩyɛ.»—Aduwa 21:5.

 Tɩ-yɔɔ wɛʋ lɩzʋʋ waɖɛ kɛ kʋjɔʋ kɩbaŋʋ ŋgʋ Ɛsɔ labɩ-ɖʋ yɔ, mbʋ pʋyɔɔ yɔ kɩhaɣ-ɖʋ waɖɛ se ɖa-maɣmaɣ ɖɩlɩzɩ se ‘ɖɩsɔɔlʋʋ-ɩ nɛ ɖa-laŋɩyɛ pilim.’—Maatiyee 22:37.

Ɛzɩ Ɛsɔ fɛyɩnɩ ɖoŋ paa mbʋ lɛ pɩ-yɔɔ?

 Bibl wɩlɩɣ se Ɛsɔ kɛ Ðoŋ Tɩŋa Tʋ nɛ nɔɔyʋ ɖoŋ tɩcɛzɩ e-ɖoŋ. (Yɔɔb 37:23; Izaayii 40:26) Ɛlɛ ɛɛlakɩnɩ e-ɖoŋ ɛnɩ tʋmɩyɛ se ɛwɛɛnɩ ɖoŋ paa mbʋ lɛ pɩ-yɔɔ. Kɩɖaʋ nakʋyʋ yɔ: Paa caanaʋ taa Babilɔɔnɩ kaakɛ Ɛsɔ samaɣ koyindu yɔ, Bibl yɔɔdʋʋ se Ɛsɔ ‘ɖɔkɩ ɛ-tɩ’ alɩwaatʋ natʋyʋ nɛ ɛtɩhɔ kɩ-nɩŋgbaŋʋʋ. (Izaayii 42:14) Mbʋ ɖɔɖɔ sɔnɔ, paa ɛyaa nabɛyɛ ɩɩlakɩnɩ tʋmɩyɛ camɩyɛ pa-tɩ yɔɔ wɛʋ lɩzʋʋ waɖɛ nɛ palakɩ lalaa kɩdɛkɛdɩm yɔ Ɛsɔ lɩzaa se ɛɖɔkʋʋ ɛ-tɩ. Ɛlɛ ɛɛkaɣ-wɛ haʋ nʋmɔʋ se powolo pɩ-yɔɔ nɛ palakɩ mbʋ tam.—Keɣa 37:10, 11.