Bibl tɔm cosuu

 Krɩstʋ koyindu tɩkɛ ɛyʋ kʋɖʋm nɔɔyʋ yaa ɛgbɛyɛ kʋɖʋmɖɩyɛ naɖɩyɛ mbʋ pʋyɔɔ yɔ Bibl yɔɔdaa se « Krɩstʋ koyindinaa sakɩyɛ» wɛɛ. (1 Yohanɛɛsɩ 2:18) Tɔm loyaɣ «Krɩstʋ koyindu» lɩnɩ Grɛɛkɩ tɔm piye nɖɩ ɖɩ-tɔbʋʋ lɛ se «weyi ɛkaɖɩɣna (yaa ɛmʋʋ) Krɩstʋ» lone yɔ; nɛ lakasɩ sɩnɛ ɛlakɩ:

•   Eetisiɣ se Yesu kɛnɩ Krɩstʋ (Mesiya) nɛ eetisiɣ ɖɔɖɔ se Yesu kɛ Ɛsɔ Pɩyalʋ.—1 Yohanɛɛsɩ 2:22.

•   Ɛkaɖɩɣnɩ Krɩstʋ weyi ɛkɛ Ɛsɔ tɛ patam num yɔ.—Keɣa 2:1, 2; Luka 11:23.

•   Ɛyɔɔdʋʋ se ɛnʋ kɛnɩ Krɩstʋ.—Maatiyee 24:24.

•   Ɛnazɩɣ Krɩstʋ wayɩ tɩŋɩyaa, mbʋ pʋyɔɔ yɔ Yesu kpakɩɣ se mbʋ palakɩ ɛ-wayɩ tɩŋɩyaa yɔ ɛnʋ palakɩ-pʋ.—Tʋma Labʋ 9:5.

•   Ɛyɔɔdʋʋ se ɛkɛ Krɩstʋ tʋ ɛlɛ ɛmaɣnɩ paɣtʋ yɔɔ nɛ epeɣziɣ ɛyaa.—Maatiyee 7:22, 23; 2 Kɔrɛntɩ mba 11:13.

 Bibl yaɣ ɛyaa mba palakɩ lakasɩ nzɩ yɔ se Krɩstʋ koyindinaa nɛ kɩkpakɩɣ-wɛ ɖɔɖɔ ɛzɩ ɛyʋ kʋɖʋm yɔ nɛ kɩyaɣ-wɛ se «Krɩstʋ koyindu.» (2 Yohanɛɛsɩ 7) Krɩstʋ koyindu calɩ lɩʋ apostoloowaa alɩwaatʋ taa nɛ eɖiɣni tʋmɩyɛ labʋ halɩ nɛ sɔnɔ. Bibl kaayɔɔdaa se mbʋ pɩkaɣ labʋ.—1 Yohanɛɛsɩ 4:3.

Ɛbɛ pɩzɩɣ pɩsɩnɩ-ɖʋ nɛ ɖɩtɩlɩ Krɩstʋ koyindinaa?

•   Posusuu cɛtɩm tɔm Yesu yɔɔ. (Maatiyee 24:9, 11) Kɩɖaʋ nakʋyʋ yɔ: Mba pawɩlɩɣ Trinita wɩlɩtʋ, yaa mba pawɩlɩɣ se Yesu kɛ Ɛsɔ Ðoŋ Tɩŋa Tʋ yɔ pakaɖɩɣnɩ Yesu wɩlɩtʋ; mbʋ pʋyɔɔ yɔ Yesu yɔɔdaa se: «Caa kɩlɩ-m.»—Yohanɛɛsɩ 14:28.

•   Krɩstʋ koyindinaa iitisiɣ tɔm ndʋ Yesu wɩlaa pɩlɩɩnɩ ɛzɩma Ɛsɔ Kewiyaɣ lakɩ tʋmɩyɛ yɔ pɩ-yɔɔ. Kɩɖaʋ nakʋyʋ yɔ: Ɛsɔ sɛtʋ agbaa ñʋndɩnaa nabɛyɛ yɔɔdʋʋ se Krɩstʋ tɩŋɩɣnɩ ɛyaa kominawaa yɔɔ nɛ ɛlakɩ ɛ-tʋmɩyɛ. Ɛlɛ wɩlɩtʋ ndʋ tɩkaɖɩɣnɩ ndʋ Yesu yɔɔdaa yɔ, ɛtɔm se: «Men-Kewiyaɣ tɩkɛ ɛjaɖɛ ɖɩnɛ ɖɩ-hɔɔlʋʋ nakʋyʋ.»—Yohanɛɛsɩ 18:36.

•   Pɔyɔɔdʋʋ se Yesu kɛ pa-Kɩbaɣlʋ, ɛlɛ paañaŋ ɛ-paɣtʋ pɩkpɛndɩnɩ ndʋ tɩtɔŋ se posusi Kewiyaɣ tɔm kɩbandʋ yɔ.—Maatiyee 28:19, 20; Luka 6:46; Tʋma Labʋ 10:42.