Wolo ɖenɖe tɔm wɛɛ yɔ

Tɔm ndʋ Bibl yɔɔdɩ kɩmɩyɛ kpaʋ yɔɔ?

Tɔm ndʋ Bibl yɔɔdɩ kɩmɩyɛ kpaʋ yɔɔ?

Tɔm ndʋ Bibl cosuu yɔ

 Paa nɔɔyʋ ɛmaɣzɩɣ se ɛwɛnɩ toovenim se ɛkpaɣ kɩmɩyɛ yɔ, ye ɛlabɩ mbʋ yɔ, ɛmaɣnɩ Bibl paɣtʋ tʋnɛ tɩ-yɔɔ: “Taatɔ se: ‘Ɛzɩ ɛlabʋʋ-m yɔ, mbʋ ɖɔɖɔ mankaɣ-ɩ labʋ, mankaɣ ɛyʋ hɛyʋʋ ɛ-lakasɩ yɔɔ.’” (Aduwa 24:29) Lɔŋ tasʋʋ sakɩyɛ wɛ Bibl taa, nɛ pɩpɩzɩɣ pɩsɩnɩ ɛyaa sakɩyɛ nɛ pekizi kɩmɩyɛ kpaʋ.

Tɔ ñʋʋ kʋnɛ kɩ-taa, ɖɩkaɣ cosuu tɔm tʋnɛ tɩ-yɔɔ

 Ɛbɛ yɔɔ kɩmɩyɛ kpaʋ fɛyɩ ɖeu?

 Ye nɔɔyʋ ɛlabɩ-ŋ kɩwɛɛkɩm nabʋyʋ yɔ, ŋpɩzɩɣ nɛ ŋkɔ pana nɛ ŋñɩnɩ se pɔhɔ ɛyʋ ɛnʋ ɛ-nɩŋgbaaŋ mbʋ ɛlaba yɔ pɩ-yɔɔ. Ɛlɛ kɩmɩyɛ kpaʋ ɛɛlakɩ nɔɔ kʋɖʋmaɣ nɛ Bibl wɩlɩtʋ. Ɛbɛ yɔɔ?

 Weyi ɛñɩnɩɣ se ɛkpa kɩmɩyɛ yɔ, ɛ-tɔm ɛɛkɛdɩɣnɩ Yehowa. Yehowa a Ɛsɔ yɔɔdɩ Bibl taa se: “Matɩnɩ kɩmɩyɛ kpaʋ; makaɣnɩ hɛyʋʋ.” (Roma mba 12:19) Bibl seɣtiɣ mba palabɩ-wɛ kɩwɛɛkɩm yɔ se pataakpa kɩmɩyɛ, ɛlɛ pɔñɔɔzɩ tɔm laŋhɛzɩyɛ taa ye pɩsaŋ yɔ. (Roma mba 12:18) Ɛlɛ ɛbɛ ŋpɩzɩɣ nɛ ŋla ye ŋŋpɩzɩɣ se ŋtɩŋnɩ nʋmɔʋ nakʋyʋ yɔɔ nɛ ŋñɔɔzɩ tɔm laŋhɛzɩyɛ taa yɔ? Masɩ heyiɣ-ɖʋ se ɖɩtaa liu Yehowa se ɛkaɣ ñɔɔzʋʋ mbʋ pɩwɛɛkaa yɔ.—Keɣa 41:11, 12.

 Ɛzɩma ɖeyi ɖeyi Ɛsɔ hɔŋ ɛyaa nɩŋgbaaŋ?

 Sɔnɔ, Yehowa ha nʋmɔʋ ɛyaa kominawaa se pɔhɔ kɩwɛɛkɩm laɖaa nɩŋgbaaŋ. (Roma mba 13:1-4) Ɛlɛ alɩwaatʋ natʋyʋ kaɣ kɔm nɛ ɛkaɣ yebu se nɔɔyʋ ɛtaala kʋñʋŋ.—Izaayii 11:4.

 Ɛzɩma manpɩzɩɣ nɛ mɔlɔ kɩmɩyɛ kpaʋ lɩmaɣza?

  •   Taayele nɛ pana tuyi-ŋ nɛ ŋla nabʋyʋ. (Aduwa 17:27) Ðoŋ ɖoŋ lɛ, ɛyaa mba peyeki se pana ɛwɛɛnɩ ɖoŋ pɔ-yɔɔ yɔ, palakɩ mbʋ pekpiɖiɣ pɩ-yɔɔ pʋwayɩ yɔ. Ɛlɛ mba pakpakɩɣ alɩwaatʋ nɛ pamaɣzɩɣ camɩyɛ yɔ, pakpakɩɣ lɩmaɣza kɩbana.—Aduwa 17:27.

  •   Ñɩnɩ nɛ ŋtɩlɩ toovenim. (Aduwa 18:13) Weyi ɛlabɩ-ŋ kɩwɛɛkɩm yɔ, ɛzɩ ɛwɛ wɛtʋ natʋyʋ taa nɛ pʋyɔɔ lɛ, ɛtɩpɩzɩ nɛ ɛmaɣzɩ mbʋ ɛlaba yɔ pɩ-yɔɔ camɩyɛ na? Ɛzɩ ɛɛwɛ ɛsɩñɩŋɩyɛ naɖɩyɛ taa? Yaa etiɖiɣzina se mbʋ ɛlaba yɔ pɩfɛyɩ ɖeu? Nabʋyʋ taa, ɖɩpɩzɩɣ nɛ ɖɩmaɣzɩ se nɔɔyʋ ɖʋ ɛ-taa faɖaɖa nɛ ɛlabɩ-ɖʋ kɩwɛɛkɩm, ŋgʋ toovenim taa lɛ, piyiɣdiɣ kiyiɣduu.

 Cɛtɩm tɔm ndʋ ɛyaa yɔɔdʋʋ kɩmɩyɛ kpaʋ yɔɔ yɔ

 Cɛtɩm tɔm: Bibl seɣtiɣ-ɖʋ se ɖɩkpa kɩmɩyɛ, mbʋ pʋyɔɔ yɔ kɩyɔɔdaa se “ɛsɩyɛ ɛsɩyɛ” lone taa.—Levitiki 24:20.

 Toovenim: Paɣtʋ ndʋ paaɖʋ caanaʋ taa Izrayɛɛlɩ mba se “ɛsɩyɛ ɛsɩyɛ” lone taa yɔ, tɩwɩlaɣ-wɛ se pɩfɛyɩ se pakpa kɩmɩyɛ. Ðoŋ ɖoŋ lɛ, paɣtʋ ndʋ tɩsɩɣaɣnɩ tɔm hʋyaa se pɔhɔ kɩwɛɛkɩm laɖʋ nɩŋgbaaŋ nɛ pɩmʋna kɩwɛɛkɩm mbʋ ɛlaba yɔ ɖeyi ɖeyi. bWayɩ Wayɩ Paɣtʋ 19:15-21.

 Cɛtɩm tɔm: Ɛzɩma Bibl ɛɛhaɣ-ɖʋ nʋmɔʋ se ɖɩkpaɣ kɩmɩyɛ yɔ, pɩwɩlɩɣ se ɖɩɩpɩzɩɣ nɛ ɖɩlʋ ɖa-taa yɔɔ, ye pacaɣ-ɖʋ labʋ kɩwɛɛkɩm nabʋyʋ yɔ.

 Toovenim: Ye pacaɣ se pala nɔɔyʋ kɩwɛɛkɩm nabʋyʋ yɔ, ɛwɛnɩ waɖɛ se ɛlʋ ɛ-tɩ yɔɔ yaa ɛñɩnɩ sɩnʋʋ ñʋndɩnaa cɔlɔ. Ɛlɛ Bibl yɔɔdaa se pɩwɛɛ se ɖɩla mbʋ payɩ ɖɩpɩzɩɣ yɔ nɛ ɖise puuyaɣ lakasɩ.—Aduwa 17:14.

a Bibl taa lɛ, Ɛsɔ hɩɖɛ lɛ Yehowa.

b Ye ŋsɔɔlaa se ŋtɩlɩ nɛ pɩkpaɖɩ pɩlɩɩnɩ paɣtʋ tʋnɛ tɩ-yɔɔ yɔ, kalɩ tɔm ñʋʋ “Que signifie l’expression ‘œil pour œil’”?