Bibl tɔm cosuu

 Ɛɛɛ, mbʋ pʋyɔɔ yɔ Ɛsɔ sɔɔlaa se ɛyaa ikpeɣliɣ ɖama nɛ pɛsɛɣ-ɩ. Bibl yɔɔdʋʋ se: «Iyele nɛ ɖɩmaɣzɩ ɖama yɔɔ nɛ ɖiseɣti ɖama nɛ ɖɩwɛɛnɩ sɔɔlɩm nɛ ɖɩla tʋma kɩbana, ɖitaayeki ɖama kpeɣluu.»—Ebree mba 10:24, 25.

 Yesu wɩlaa se ɛ-wayɩ tɩŋɩyaa kaɣ wɛʋ Ɛsɔ sɛtʋ ɛgbɛyɛ kʋɖʋmɖɩyɛ naɖɩyɛ taa; ɛyɔɔdaa se: «Ye sɔɔlɩm ɛwɛ mɩ-hɛkʋ taa yɔ, piyeki nɛ ɛyaa tɩŋa tɩlɩ se ɩkɛ mɔn-tɔmkpɛlɩkɩyaa.» (Yohanɛɛsɩ 13:35) Nʋmɔŋ sɔsɔŋ weyi ɩ-yɔɔ Krɩstʋ tɔmkpɛlɩkɩyaa tɩŋɩɣna nɛ pawɩlɩɣ ɖama sɔɔlɩm yɔ ɩ-taa nakʋyʋ lɛ se pekpeɣliɣ ɖama. Pakaɣ kpeɣluu agbaa taa, nɛ pakaɣ katʋʋ ɖoŋ ɖoŋ nɛ pɛsɛɣ Ɛsɔ. (1 Kɔrɛntɩ mba 16:19) Pa-tɩŋa pakaɣ kɛʋ ɛjaɖɛ kpeekpe yɔɔ koobiya hɔʋ.—1 Pɩyɛɛrɩ 2:17.

Ye ɛyʋ ɛwɛ Ɛsɔ sɛtʋ ɛgbɛyɛ naɖɩyɛ taa yɔ pi-ɖeke pɩtɩmaɣ

 Pɩkɛ toovenim se Bibl wɩlɩɣ se pɩpɔzʋʋ se ɛyaa ikpeɣli ɖama nɛ pɛsɛɛ Ɛsɔ, ɛlɛ kɩɩwɩlɩɣ se ye ɛyʋ ɛñɩtaa nɛ ɛwɛɛ Ɛsɔ sɛtʋ ɛgbɛyɛ naɖɩyɛ taa yɔ, ɛ-tɔm kɛdɩɣnɩ Ɛsɔ. Pʋcɔ nɛ ɛ-tɔm kɛdɩnɩ Ɛsɔ lɛ pɩwɛɛ se ɛ-Ɛsɔ sɛtʋ ɛgbɛyɛ ɛwɛɛnɩ ɖoŋ wezuu ŋgʋ ɛcakɩ paa evemiye nɖɩ yɔ kɩ-yɔɔ. Kɩɖaʋ nakʋyʋ yɔ, Bibl yɔɔdʋʋ se: «Ɛsɔ sɛtʋ ndʋ tɩwɛ kele kele nɛ tɩfɛyɩnɩ azuluma ɖa-Caa Ɛsɔ ɛsɩndaa yɔ ndʋ yɔ: solisi nɛ lelaa pɔ-yɔɔ cɔnʋʋ pa-kʋñɔmɩŋ taa, nɛ pɩwɛɛ se ɛyʋ etaapisi ɛ-tɩ nɛ ɛjaɖɛ.»—Yakubu 1:27.