Kĩla ũthi ũvoonĩ ũla wĩ vo

Kĩla ũthi nthĩnĩ wa ũvoo wa kelĩ wa maũndũ ala me vo

Ngũsĩ sya Yeova

Kikamba

Andũ ma Mũika Maitetheew’a Mamanye Ũndũ Matonya Kwĩka Ĩla Mathĩnw’a me Sukulu

Andũ ma Mũika Maitetheew’a Mamanye Ũndũ Matonya Kwĩka Ĩla Mathĩnw’a me Sukulu

O mĩtũkĩ kamwana ketawa Hugo, ke na myaka ĩkũmi, nĩkanengiwe mũthĩnzĩo wĩsĩkĩe ta Diana Award nĩ kĩkundi kĩmwe kya kũtetheesya andũ kya Britain, nũndũ wa kũtetheesya syana sya sukulu yoo imanye ũndũ itonya kwĩka ĩla syathĩnw’a.

Hugo aisye atĩĩ: “Nanengwa mũthĩnzĩo ũũ nũndũ wa ĩla vitio ya katuni ya Kĩlya Vinya Mũndũ Ũkũthĩnasya Ĩndĩ ũte Kwĩyũkitĩa. Kĩla neemanyĩisye vitionĩ ĩsu nĩkyo kyandetheeisye nambĩĩa kũtavya syana ũndũ itonya kwĩka syathĩnw’a.”

“Kĩla mũthenya syana mbingĩ ĩũlũ wa nthĩ nithĩnaw’a . . . , ĩndĩ . . . ve ũndũ ũtonya kwĩka ũkaũtetheesya.”

Mbee vyũ, Hugo oonisye alimũ make vitio ĩsu. Nĩmendeeiw’e mũno nginya mavanga syana syonthe ikavingũaa Kĩsese kya jw.org. Yu syana mbingĩ ila syĩ na myaka katĩ wa nyanya na ĩkũmi sukulunĩ ĩsu, nitũmĩaa Kĩsese kya jw.org. Syana isu syaasya kana kĩsese kĩu nĩkĩitetheesye kwona ũndũ itonya kwĩka syathĩnw’a, vamwe na kũkwata mosũngĩo ma makũlyo ta, Ndonya kũkwata anyanya ma w’o ata?

Mĩvango Mĩseo Nĩtetheesye Andũ ma Mũika

Sukulunĩ ĩngĩ yĩ nthĩ ya Britain, kamwana ketawa Elijah, kala ke na myaka nyanya, nĩkathĩnaw’a. Ke na andũ ma mũsyĩ nĩmasyaisye vitio ya Kĩlya Vinya Mũndũ Ũkũthĩnasya. Nĩmaneeneie ũndũ Elijah ũtonya kwasya kana kwĩka ĩla wathĩnw’a. Ũndũ ũsu nĩwatumie ethĩwa na ũkũmbaũ wa kũkitana na thĩna ũsu. Ĩvinda yĩmwe, kyumwa kĩla sukulu ũsu waneeneaa ĩũlũ wa kũthĩnw’a, mwalimũ mũnene nĩwoonisye syana syonthe vitio ĩsu.

Vate nzika andũ ma mũika ma nthĩ ya Britain ti mo mathĩnaw’a me oka. Ũsu nĩ ũndũ wĩkĩkaa kĩla vandũ nthĩ yonthe, na vitio ĩno nĩtethetye andũ aingĩ mũno.

Ivie, ũla nĩ kelĩtu ke na myaka ĩkũmi kuma nthĩ ya United States, nĩwakĩaa mwĩĩtu ũmwe masomaa ĩmwe nũndũ nĩwamũthĩnasya. Ĩtina wa kwĩloela vitio ĩno ya Kĩlya Vinya Mũndũ Ũkũthĩnasya, nĩwakwatie ũkũmbaũ wa kũneena na mwĩĩtu ũsu. O na nĩwaneenie na mwalimũ na amũtetheesya. Mwĩĩtu ũsu nĩwamwĩtisye ũekeo, na yu mekalanasya nesa.

Ngũsĩ sya Yeova nĩsyendaa andũ ma mũika maendeee nesa. Nĩtũkũendeea kumya ũtao mũseo wa kũmatetheesya kũmĩanĩsya na mathĩna ala mamakwataa ta kũthĩnw’a.