Kĩla ũthi ũvoonĩ ũla wĩ vo

Ngũsĩ sya Yeova

Nyuva kĩthyomo Kikamba

Ngũsĩ sya Yeova Nitethasya Wĩa Ũla Ũtethaw’a Nĩ Amisonalĩ?

Ngũsĩ sya Yeova Nitethasya Wĩa Ũla Ũtethaw’a Nĩ Amisonalĩ?

Ĩĩ, nĩtũtethasya. O na tũtw’ĩke twĩ va, Ngũsĩ syonthe sya Yeova nitataa syĩthĩwe na wendi o ta ũla wĩthĩawa na amisonalĩ. Wendi ũsu nĩ wa kũtata ĩvinda yonthe tũtavye ala twakomana namo kĩla tũĩkĩĩaa.Mathayo 28:19, 20.

Ũndũ ũngĩ nĩ kana nthĩ imwe syĩ kũndũ kwĩ na andũ mataaĩw’a ũvoo mũseo ũla wĩ Mbivilianĩ. Kwoou kwĩ o Ngũsĩ imwe iendaa kũndũ ta kũu o kwa kavinda, kana o ikathamĩĩa kũu vyũ nĩ kana imatetheesye. Nasyo Ngũsĩ ingĩ nithamĩĩaa nthĩ ingĩ nĩ kana itũmĩe ĩvinda yingangĩ kũu iitavany’a. Ngũsĩ isu syonthe nĩsyĩw’aa mũyo nũndũ syĩthĩawa syakwata mwanya wa kwĩanĩsya wathani ũũ wa Yesũ: “Mũkeethĩwa mwĩ ngũsĩ syakwa . . . kũvika itulu sya nthĩ.”Meko ma Atũmwa 1:8.

Mwakanĩ wa 1943, nĩtwavingũie sukulu ya kũmanyĩasya amwe ma amisonalĩ maitũ. Kuma mwaka ũsu, Ngũsĩ mbee wa 8,000 nisomethew’e vau. Sukulu ĩsu yĩtawa Sukulu ya Mbivilia ya Ngileati.