Nthĩnĩ wa Mbivilia, ndeto ya Kĩkiliki ĩla mavinda angĩ ĩalyũlawa “ĩkanisa” yonanasya kĩkundi kya athaithi ĩndĩ ti vala mombanĩaa.

Kwa ngelekany’o: Ĩla Vaulo waandĩkĩie Aklĩsto ma Lomi valũa, akethisye Akwila na Vilisika na asya: ‘Ngethesyai ĩkanisa ĩla yĩ nyũmba kwenyu.’ (Alomi 16:5) Vaulo ndatũmanaa akakethew’e mwako. Ĩndĩ atũmanaa akethew’e andũ ala mombanĩaa nyũmbanĩ ĩsu.

Kwoou vandũ va kwĩta mwako ũla tũmbanĩaa ĩkanisa tũwĩtaa “Nyũmba ya Ũsumbĩ.”

Nĩkĩ Mwako Ũsu Wĩtawa “Nyũmba ya Ũsumbĩ ya Ngũsĩ sya Yeova”?

Ĩsyĩtwa yĩu nĩyaĩle nũndũ wa itumi kauta:

  • Mwako ũsu nĩ nyũmba, kana vandũ va kũmbanĩa.

  • Tũmbanaa nĩ kana tũmũthaithe Yeova, Ngai ũla ũwetetwe Mbivilianĩ, na tũyumya ũkũsĩ ĩũlũ wake.Savuli 83:18; Isaia 43:12.

  • O na ĩngĩ tũmbanaa nĩ kana twĩmanyĩsye ĩũlũ wa Ũsumbĩ wa Ngai ũla wawetiwe nĩ Yesũ.Mathayo 6:9, 10; 24:14; Luka 4:43.

Wĩmũthokye mũno ũke Nyũmbanĩ ya Ũsumbĩ ĩla yĩ vakuvĩ na vala wĩkalaa nĩ kana wĩyonee ũndũ Ngũsĩ sya Yeova syĩkaa maũmbano.

No ũsome maũndũ angĩ ta asu ĩandĩkonĩ ya 1 Akolintho 16:19; Akolosai 4:15; na ya Vilemona 2.