Maũndũ mate ma w’o mawetawa nĩ andũ

Ũvũngũ: Ngũsĩ sya Yeova iinyusaa ndawa na iyĩendaa sivitalĩ.

Ũw’o: Ithyĩ nĩtũtataa ũndũ tũtonya tũkwate ũiiti ũla mũseo vyũ, na tũiitĩthye syana na iveti sitũ nesa vyũ. Ĩla twawaa tũmanthaa matakĩtalĩ ala mesĩ wĩa woo nesa na matonya kũtũthĩnza vate kũtwongela nthakame. Nĩtũtanĩthaw’a mũno nĩ maendeeo ala mekĩtwe maũndũnĩ ma ũiiti. O na nzĩa ila syaseũviw’e itetheesye kũiita Ngũsĩ sya Yeova vate kũtũmĩa nthakame, matukũ aa nikee kũtũmĩwa kũiita andũ ala angĩ onthe. Ũsu nĩ ũndũ mũseo nũndũ nthĩnĩ wa nthĩ mbingĩ, mũndũ o na wĩva nũtonya kũtw’a kũiitwa ate kwongelwa nthakame na ayĩvathana na mathĩna ala matonya kũkwata mũndũ nũndũ wa kwongelwa nthakame. Mathĩna asu nĩ ta mowau ala makwatanaw’a kwĩsĩla nthakame, mwĩĩ kũleana na nthakame ĩte yaw’o, kana o thĩna ũtonya kumĩla nũndũ wa mavĩtyo ma ndakĩtalĩ.

Ũvũngũ: Ngũsĩ sya Yeova iĩkĩĩaa kana mũndũ avoaw’a nĩ mũĩkĩĩo wĩ w’oka.

Ũw’o: Ithyĩ tũivoasya andũ kwa nzĩa ya syama.

Ũvũngũ: Kũiitwa vate nthakame kwĩ ngalama nene mũno.

Ũw’o: Kũiita mũndũ ate kwongelwa nthakame kũtũmĩaa mbesa nini.

Sisya ĩvuku Transfusion and Apheresis Science, Volume 33, No. 3, ĩthangũ ya 349.

Ũvũngũ: Ngũsĩ mbingĩ mũno o na syana nikusaa kĩla mwaka nũndũ wa kũlea kwongelwa nthakame.

Ũw’o: Ũndũ ũsu ti wa w’o o na vanini. Matakĩtalĩ maingĩ ma kũthĩnza nĩmatemaa awau me na mowau manene ta ũwau wa ngoo, ũwau wa mavĩndĩ na malenyũ, na mowau ala wĩthĩaa mũndũ no ekĩawa mamutha angĩ. Makũnaa wĩa ũsu w’onthe mateũtũmĩa nthakame o na vanini. Andũ awau na syana ndwau ala maiitawa vate nthakame maendeeaa nesa o ta ala mongelawa nthakame kana o na makaendeea nesanga kũte ala mongelawa nthakame. Ĩndĩ o na kũkatw’ĩka kũilyĩ ata, vai mũndũ ũtonya kũĩkĩĩthya kana mũwau nũkũkw’a nũndũ wa kũlea nthakame na kana nũkũvĩta nũndũ wa kwĩtĩkĩla ongelwe nthakame.

Sisya ĩvuku The Journal of Thoracic and Cardiovascular Surgery, Volume 134, No. 2, ĩthangũ ya 287-288; Texas Heart Institute Journal, Volume 38, No. 5, ĩthangũ ya 563; Basics of Blood Management, ĩthangũ ya 2; na ĩvuku Continuing Education in Anaesthesia, Critical Care & Pain, Volume 4, No. 2, ĩthangũ ya 39.

Sisya ĩvuku The Journal of Thoracic and Cardiovascular Surgery, Volume 89, No. 6, ĩthangũ ya 918; na ĩvuku Heart, Lung and Circulation, Volume 19, ĩthangũ ya 658.

Nĩkĩ Ngũsĩ sya Yeova itetĩkĩlaa kwongelwa nthakame?

Kĩla kĩtumaa Ngũsĩ sya Yeova ilea kwongelwa nthakame nĩ mũĩkĩĩo woo ĩndĩ ti atĩ syĩthĩawa iilea ũiiti. Mavuku ma Mbivilia ala me nthĩnĩ wa ũtianĩo mũkũũ na ala me nthĩnĩ wa ũtianĩo mweũ onthe nĩmatũtavĩtye sanzũ kana twaĩle kwĩvathana na nthakame. (Mwambĩlĩlyo 9:4; Alivai 17:10; Kũtũngĩlĩlwa Kwa Mĩao 12:23; Meko ma Atũmwa 15:28, 29) O na ĩngĩ Ngai onaa nthakame ĩanene na thayũ. (Alivai 17:14) Kwoou tũleaa nthakame nũndũ nĩtũmwĩw’aa Ngai. Ti ũu wĩ w’oka, tũmĩleaa nũndũ nĩtũnengete Ngai ndaĩa ũla nĩwe ũtũnengaa thayũ.

Kũvĩndũa woni

Awau nĩmathĩnzawa masaa maingĩ matekwongelwa nthakame na maivĩta

Ve ĩvinda matakĩtalĩ moonaa nzĩa sya kũiita ala maleete nthakame syĩ nthũku mũno na itonya kũtuma mũndũ akw’a, ĩndĩ myakanĩ ya mĩtũkĩ nĩmaekete kwĩthĩwa na woni ũsu. Kwa ngelekany’o mwakanĩ wa 2004, ve ũvoo waandĩkiwe ĩkasetinĩ yĩmwe ya kũmanyĩsya maũndũ ma ũiiti waisye kana “myaka yũkĩte nzĩa mbingĩ sya ũiiti ila syaseũviw’e itetheesye Ngũsĩ sya Yeova ikatũmĩawa kũiita andũ onthe.” Nakyo kĩlungu kĩngĩ nthĩnĩ wa ĩkaseti yĩmwe (Heart, Lung and Circulation) mwakanĩ wa 2010 kyaisye kana “ndakĩtalĩ ala mathĩnzaa maĩle kũtũmĩaa ‘mũthemba wa ũiiti ũla ũtatũmĩaa nthakame’ kĩla ĩvinda maithĩnza awau ĩndĩ mayaĩle kũtw’a atĩ no Ngũsĩ sya Yeova syĩ syoka syaĩle kũiitwa ũu.”

Ĩvuku Continuing Education in Anaesthesia, Critical Care & Pain, Volume 4, No. 2, ĩthangũ ya 39.

Ngili mbingĩ sya matakĩtalĩ nithĩnzaa awau iitũmĩa nzĩa ila isũvĩaa mũwau ndakasye nthakame mbingĩ mũno. Itũmĩaa nzĩa isu o na ĩla iũtema awau mekwenda kũtemwa masaa maingĩ mũno na iyĩsaa kũmongela nthakame. Mĩthemba ĩsu ya ũiiti nĩtũmĩawa o na nthĩ ila ite nthwii na awau mate Ngũsĩ nĩmakũlasya maiitwe ũu.