Wĩa witũ wa kũtavany’a ũendeeaw’a na mĩvothi ĩla yumaw’a nĩ Ngũsĩ sya Yeova. Vaiĩ mbesa ikolanaw’a maũmbanonĩ maitũ na vaiĩ ũmwe wĩtaw’a kĩlungu kya ĩkũmi. (Mathayo 10:7, 8) Ĩndĩ kũla tũmbanĩaa kwĩthĩawa kwiĩtwe masandũkũ ma kwĩkĩa mĩvothi nĩ kana ethĩwa ve mũndũ ũkwenda kumya mũvothi eke ũu. Mũndũ ũla waumya mũvothi ndamanyĩkaa.

Twĩthĩawa tũtonya kũũngamĩa ngalama sitũ nũndũ tũi na atongoi maĩvawa. O na ĩngĩ, ngũsĩ iĩĩvawa nĩ kana itavany’e, na kũla tũmbanĩaa kwĩthĩawa kũte kwa ngalama mbingĩ.

Mĩvothi ĩla ĩtũmawa movisinĩ ma ũvonge ma Ngũsĩ sya Yeova ĩtũmĩawa kũtetheesya ala makwatwa nĩ mĩisyo, amisonalĩ maitũ na asyaĩĩsya ala matembeleaa ikundi, kwaka nyũmba sya ũthaithĩa nthĩ ila ite ũkwati mwingĩ, na kũtumbĩthya na kũtũma Mbivilia na mavuku me na ũvoo wa Mbivilia.

Kĩla ũmwe nĩwe ũtusaa kana nũkwenda kumya mũvothi wa kũĩvĩa ngalama sya kĩkundi kĩla wĩthĩawa, kũtetheesya wĩa wa kũtavany’a wa nthĩ yonthe, kana o kũtetheesya i ngalĩ syelĩ. Kĩla kĩkundi nĩkĩsomeaa athaithi livoti ya ĩsavu kĩla mwei nĩ kana mamanye ũndũ mbesa itũmĩkĩte.