Kĩla ũthi ũvoonĩ ũla wĩ vo

Kĩla ũthi nthĩnĩ wa ũvoo wa kelĩ wa maũndũ ala me vo

Ngũsĩ sya Yeova

Kikamba

Ngũsĩ sya Yeova Syonaa Mathiko Ata?

Ngũsĩ sya Yeova Syonaa Mathiko Ata?

Mawoni maitũ ĩũlũ wa mathiko na maũndũ ala twĩkaa mathikonĩ methĩawa mosanĩte na momanyĩsyo ma Mbivilia. Momanyĩsyo amwe nĩ ta aa maatĩĩe:

  • Ti ũthũku kũmeta mwendwa witũ akw’a. Amanyĩw’a ma Yesũ nĩmametaa ĩla makw’ĩĩwa nĩ endwa moo. (Yoana 11:33-35, 38; Meko ma Atũmwa 8:2; 9:39) Kwoou, tũyosaa mathiko ta ĩvinda ya kwĩtanĩthya. (Mũtavan’ya 3:1, 4; 7:1-4) Vandũ va ũu, twosaa ĩvinda yu kũĩa vamwe na ala makw’ĩĩwe.Alomi 12:15.

  • Ala akw’ũ matyĩsĩ ũndũ o na wĩva. O na ethĩwa tumĩte va kana tũeetwe ata, nĩtũtataa mũno twĩsiĩanĩe na syĩthĩo kana meko ala andũ maatĩĩaa nũndũ wa kũĩkĩĩa kana akw’ũ no matethye kana makathĩny’a ala me thayũ. (Mũtavan’ya 9:5, 6, 10) Syĩthĩo imwe nĩ ta andũ kũlea ũkoma nĩkwĩthĩwa nĩmakw’ĩĩwe, kwĩthĩwa na mboka nene ĩvinda ya mathiko na ĩvinda ya kũlilikana mũthenya ũla mũndũ wakwie, kũthembea ala akw’ũ, kũea ngewa na ala akw’ũ, na syĩthĩo ila iveti iatĩĩaa aa-mũũme makw’a. Tũleaa kwĩka maũndũ asu nũndũ tũatĩĩa mwĩao ũũ wa Mbivilia: “Umai katĩ woo, . . . na mũikakiite kĩndũ kĩvuku.”2 Akolintho 6:17.

  • Ve wĩkwatyo kwa ala akw’ũ. Mbivilia ĩmanyĩasya kana kũkeethĩwa na ũthayũũkyo, na kana ve ĩvinda kĩkw’ũ kĩtakethĩwa vo ĩngĩ. (Meko ma Atũmwa 24:15; Ũvuan’yo 21:4) Wĩkwatyo ũũ ũtũtetheeasya tũikaatĩĩe syĩthĩo itaĩle sya kũmeta, o ũndũ watetheeisye Aklĩsto ma ĩvinda ya atũmwa.1 Athesalonika 4:13.

  • Mbivilia ĩtũtaĩte twĩkae maũndũ na kĩthimo. (Nthimo 11:2) Tũyonaa ĩvinda ya mathiko ta ĩvinda ya mũndũ ‘kwĩyonany’a nũndũ wa kwĩthĩwa na ũthwii,” kana nũndũ wa kĩlasi kyake. (1 Yoana 2:16, BCK) Tũivangaa mathiko me na nguma ala kĩeleelo kyamo nĩ kũtanĩthya andũ, kana kũthooa masandũkũ ma mbesa mbingĩ na ngũa sya kwĩyonany’a kũla kwĩ andũ angĩ.

  • Tũilasimĩthasya ala angĩ meke ũndũ twĩkaa ĩvinda ya mathiko. Nĩ kana tũikalasimĩthye angĩ, tũatĩĩaa mwolooto ũũ wa Mbivilia: “Kĩla ũmwe waitũ akaumya ũvoo wake mbee wa Ngai”. (Alomi 14:12) Ĩndĩ twakwata mwanya, nĩtũeleasya angĩ mũĩkĩĩo witũ twĩ na “ũuu na w’ĩa [kana, ndaĩa nene].”1 Vetelo 3:15.

Mathiko ma Ngũsĩ sya Yeova methĩawa mailyĩ ata?

Vala mathiko mekĩawa: Ĩla ala makw’ĩĩwe meũvanga mathiko, no mavange methiko asu mekĩwe kũndũ ta Nyũmbanĩ ya Ũsumbĩ, nyũmbanĩ ya kũsũvĩa akw’ũ, mũsyĩ kwa ũla ũkwie, kũla akw’ũ mavĩvĩaw’a, kana o ũtee wa mbũa.

Ũndũ matwaĩĩaw’a: Ũvoo ũkũelesya kĩla Mbivilia ĩmanyĩasya ĩũlũ wa kĩkw’ũ na wĩkwatyo wa ũthayũũkyo nĩumaw’a nĩ kana ũkiakisye ala makw’ĩĩwe. (Yoana 11:25; Alomi 5:12; 2 Vetelo 3:13) Vulongulamu ya mathiko no ĩelesye ndaĩa nzeo sya mũndũ ũla ũkwie, na maũndũ ala tũtonya kwĩmanyĩsya kuma kwake e mũthũkũmi wa Yeova mũĩkĩĩku.—2 Samueli 1:17-27.

Wathi wĩ na kyongo kyumanĩte na Maandĩko no winwe. (Akolosai 3:16) Mathiko nĩmaminĩĩawa na mboya ya ũkiakisyo.Avilivi 4:6, 7.

Mbesa/Ndĩvi: Tũyĩĩvĩthasya kwondũ wa kũtwaĩĩsya mathiko, o na tũyĩtasya nthembo maũmbanonĩ maitũ.Mathayo 10:8.

Naaũ methĩawa vo: Andũ ala mate Ngũsĩ nĩmatonya kũka kwĩthukĩĩsya ũvoo wa mathiko Nyũmbanĩ ya Ũsumbĩ. O ta maũmbano ala angĩ, andũ onthe methĩawa matonya kũka mathikonĩ ma Ngũsĩ.

Ngũsĩ sya Yeova niendaa mathikonĩ ma ndĩni ingĩ?

Kĩla ũmwe wa Ngũsĩ sya Yeova nĩwe wĩtw’ĩaa ũndũ ũkwĩka atongoew’e nĩ wasya wake wa ngoo ũla ũmanyĩĩtw’e nĩ Mbivilia. (1 Timotheo 1:19) Ĩndĩ, tũyĩthĩawa na kĩanda o na kĩmwe maũndũnĩ ma ndinĩ ingĩ ala tũkwona maleanĩte na momanyĩsyo ma Mbivilia.2 Akolintho 6:14-17.