ŨTETHYO KWONDŨ WA ANDŨ MA MŨSYĨ | MŨTWAANO
Nĩtwaĩlĩte Kwĩkalanyʼa Ĩmwe Tũtambĩte Kũtwaana?
Andũ aingĩ nĩmekalanasya matambĩte kũtwaana. Amwe mekaa ũu mayenda kũmanya kana nĩmaĩlanĩte, na mayona kana kĩu no kĩmatetheesye makethĩwa na mũtwaano mũseo. Yo nĩ ũndũ mũseo andũ kwĩkalanyʼa ĩmwe matambĩte kũtwaana?
Kĩlungunĩ kĩĩ nĩtũkwona
Kwĩkalanyʼa ĩmwe no kũũtetheesye kũthĩnĩkĩa mathĩna ma mbesa?
Kwĩkalanyʼa ĩmwe no kũũtetheesye ndũkatwaane na mũndũ mũtaĩlanĩte?
Mbivilia ĩmanyĩasya ata?
Mbivilia nĩvatanĩte kũmanyana kĩ-mwĩĩ andũ matambĩte kũtwaana. Kwa ngelekanyʼo, yaĩtye atĩĩ: ‘Ĩvathanei na ũlaalai.ʼ (1 Athesalonika 4:3; 1 Akolintho 6:18) Kĩu kĩkonetye kũmanyana kĩ-mwĩĩ katĩ wa andũ mekalanasya ĩmwe, o na ethĩwa me na mũvango wa kwĩsa kũtwaana. a Myolooto ya Mbivilia nĩtetheeasya andũ mesiĩanĩe na maũndũ mathũku ala mokaa nũndũ wa kwĩkalanyʼa ĩmwe matatwaanĩte ta kwa ngelekanyʼo, mũndũ kũitava atambĩte kũtwawa.
Mũvango wa mũtwaano wumĩte kwa Ngai. Yĩla wambĩĩisye mũvango ũsu aisye ũũ: ‘Mũndũũme akatia ĩthe na inyia na ailũmanyʼa na mũka, namo makeethĩwa mwĩĩ ũmwe.’ (Mwambĩlĩĩlyo 2:24) Yĩla mũndũũme na mũndũ mũka meethĩwa meyumĩtye vyũ kwĩkala mũtwaanonĩ, mũsyĩ woo ũkeethĩwa na wendo na ũyĩthĩwa wĩ mũlũmu.
Kwĩkalanyʼa ĩmwe no kũũtetheesye kwĩyũmbanĩsya mũtwaano?
Andũ amwe masũanĩaa ũu. Monaa kana yĩla mekalanyʼa ĩmwe matatwaanĩte nĩmemanyĩasya maũndũ maingĩ yĩla meũtethya wĩa me vamwe na maimanyana nesanga. Ĩndĩ nĩ kana mũtwaano wĩthĩwe wĩ na ũtanu, no nginya andũ methĩwe meyumĩtye.
Mũũme na mũka matonya kwĩmanyĩsya ata kwĩkala malũmanĩtye yĩla maũndũ ne maseo kana mathũku? Ti kwa kwĩkalanyʼa ĩmwe kwa kavinda masũanĩĩte kana nĩmeũtiana vaemela. Vandũ va ũu, ngwatanĩo yoo ĩkaendeea nesa ethĩwa elĩ makeethĩwa meyumĩtye kũthũkũma na kũthĩnĩkĩa mathĩna ala maumĩla me ngwatanĩo.
Manya ũndũ ũũ: Vandũ va kwĩyũmbanyʼa kwondũ wa mũtwaano, andũ ala manyuvaa kwĩkalanyʼa ĩmwe matatwaanĩte, nĩvatonyeka makethĩwa mayĩyũmbanĩsya kũtaanĩsya.
Mwolooto wĩ Mbivilianĩ: “O kĩla mũndũ ũvandaa, nokyo ũkaketha.”—Akalatia 6:7.
Kwĩkalanyʼa ĩmwe no kũũtetheesye kũthĩnĩkĩa mathĩna ma mbesa?
Andũ amwe masũanĩaa ũu. Kĩkundi kĩmwe kya kwĩka ũkunĩkĩli kĩtawa Pew Research Center nĩkyamanyie kana nthĩ ya Amelika, andũ ana katĩ wa ĩkũmi ala mekalanasya ĩmwe ta matwaanĩte methĩawa kĩeleelo kyoo no kũkwata mbesa. Ĩndĩ ĩtina wa kwĩkalanyʼa ĩmwe kwa ĩvinda yĩana ũna, amwe moo maasya kana mayĩyũmbanĩtye kwondũ wa mũtwaano, na kĩtumi kĩnene nĩ mathĩna ma mbesa.
Kwĩkalanyʼa ĩmwe mũtatwaanĩte no kumĩlye mathĩna angĩ, na mũno mũno kwa aka. Kwa ngelekanyʼo, mavinda maingĩ aka nĩmo matiĩawa kĩanda kya kũea syana yĩla andũ matiana.
Manya ũndũ ũũ: Maũndũ mathũku ala makwataa andũ ala mekalanasya vamwe matatwaanĩte methĩawa me maingĩ vyũ kwĩ moseo ala makwataa.
Mwolooto wĩ Mbivilianĩ: “Ninyie Yeova Ngai waku, ũla ũkũmanyĩasya kwaĩla.”—Isaia 48:17, BK.
Kwĩkalanyʼa ĩmwe no kũũtetheesye ndũkatwaane na mũndũ mũtaĩlanĩte?
Andũ amwe masũanĩaa ũu. Ĩndĩ ĩvuku Fighting for Your Marriage yaĩtye, “andũ ala mekalanasya vamwe matatwaanĩte kaingĩ maimanyaa kana kwĩkalanyʼa ĩmwe kũtumaa wĩthĩwa wĩ ũndũ wĩ vinya kũtiana.” Nĩkĩ? Andũ amwe mekalanasya matatwaanĩte no mese kũmanya kana mayaĩlanĩte o na vanini. Ĩndĩ nũndũ wa maũndũ mekaa ĩmwe ta, kũĩva nyũmba ĩla mekalaa, kana kũitava mũndũ atataĩĩe mayona kavala maendeee kwĩkala ĩmwe vandũ va kũtiana, na kĩu nĩkĩkwatĩtwe mbau nĩ andũ ala mekaa ũkunĩkĩli. b Ĩvuku yĩu yĩendeee kwasya, “andũ amwe ala maĩ matonya kũtaanĩsya matanamba kũtwaana monaa kũtwaana newʼo ũndũ ũla wĩ laisi kwĩ kũtiana.”
Manya ũndũ ũũ: Kwĩkalanyʼa ĩmwe mũtatwaanĩte no kũtume ũemwa nĩ kũtaanĩsya na mũndũ mũtaĩlanĩte, vandũ va kũũtetheesya wĩke ũtwi mũseo.
Mwolooto wĩ Mbivilianĩ: “Ũla mũĩ nĩwonaa mũisyo na ayĩvitha, ĩndĩ ala mate na ũmanyi maendeeaa kũthi na mbee na maikwatwa nĩ mathĩna.”—Nthimo 22:3.
Nĩ ũndũ wĩva waĩlĩte?
No wĩsiĩanĩe na mathĩna ala maumanaa na kwĩkala ĩmwe mũtatwaanĩte na ũyĩthĩwa na mũtwaano wĩ na ũtanu. Ũtonya kwĩka ũu ata? Kwa kũlũmanyʼa vyũ na myolooto ya Mbivilia ĩũlũ wa mũtwaano. Osa ĩvinda yĩanĩtye ya kũmanyana na ũla ũkwenda kũtwaana nake mũtanambĩĩa kwĩkalanyʼa ta mũũme na mũka. Nĩ kavaa kũnyuva ũla ũũtwaana nake kwa kũsisya ethĩwa myolooto na maũndũ ala mũĩkĩĩaa nĩmavwʼanene vandũ va kũsisya wũmbe wake.
Mbivilia yĩ na ũtao ũtonya kũũtetheesya kwambĩĩsya mũtwaano mũlũmu na wĩ na ũtanu. c Kwa ngelekanyʼo, Mbivilia yĩ na myolooto ĩtonya kũũtetheesya . . .
kwĩthĩwa wĩ mũĩkĩĩku
kwĩthĩwa na nguma nzeo ila mũndũ ũkwenda kũtwaana kana kũtwawa waĩle kwĩthĩwa nasyo
kwĩthĩwa wĩ metho kwona ethĩwa mũndũ ũla mũkwĩvaanyʼa nĩmwaĩlanĩte
Nĩ kana wĩmanyĩsye maũndũ maingangĩ ĩũlũ wa ilungu ii, sisya kyongo “Mũtwaano na Mũsyĩ” nthĩnĩ wa jw.org.
Mwolooto wĩ Mbivilianĩ: “Maandĩko onthe nĩmaveveeiwe nĩ Ngai na nĩmaĩlĩte kwondũ wa kũmanyĩsya.”—2 Timotheo 3:16.
a Sisya kĩlungu kĩ na kyongo, “Je, Ni Sawa Kufanya Ngono Kabla ya Ndoa Ikiwa Mnapendana?”
b Kuma kĩlungunĩ kĩ na kyongo, “Sliding Versus Deciding: Inertia and the Premarital Cohabitation Effect,” kyaandĩkiwe nĩ Scott M. Stanley, Galena Kline Rhoades, na Howard J. Markman, na kyatumbĩthwa ĩkasetinĩ ya Family Relations.
c Syĩthĩonĩ imwe, asyai mũno mũno nĩmo manyuvĩaa mwana woo ũla meũtwaana nake. Ethĩwa ũu nĩwʼo vailye, Mbivilia no ĩtetheesye asyai kũmanya nguma ila maĩle kũsisya.
No Wendeewʼe Nĩ Ii
MOSŨNGĨO MA MAKŨLYO MA MBIVILIA
Mbivilia Yaĩtye Ata Ĩũlũ wa Mũndũũme na Mũndũ Mũka Kwĩkalanyʼa Vamwe Matatwaanĩte Kĩ-Mĩao?
Ũtao wa Ngai nũtũtavasya kĩla tũtonya kwĩka nĩ kana twĩthĩwe na mĩsyĩ mĩseo, na ala maatĩĩa myolooto yake nĩmatethekaa ĩvinda yonthe.
MOMANYĨSYO MA VATA MA MBIVILIA
Ngai Ethĩawa na Woni Wĩva Ĩũlũ wa Mũtwaano?
Ngai endaa mũtwaano wenyu waĩle. Ũtao mũseo ũla wĩ Mbivilianĩ nũtetheesye andũ aingĩ matwaanĩte.
VITIO SYA KATUNI ŨVWAŨNĨ
Ũtonya Kũmanya Ata Kana Nĩ Wendo wa Wʼo?
Vathũkanyʼa wendo wa wʼo na wendo ũte wa wʼo.
ĨŨLŨ WITŨ
Kũlya Ũthokewe
Kwata ũsũngĩo wa ĩkũlyo yĩkonetye Mbivilia, kana wĩmanyĩsye mũnango ĩũlũ Ngũsĩ sya Yeova.