Kĩla ũthi ũvoonĩ ũla wĩ vo

Ngũsĩ sya Yeova

Nyuva kĩthyomo Kikamba

Kwĩthĩawa Ata Yĩla Mũndũ Wakw’a?

Kwĩthĩawa Ata Yĩla Mũndũ Wakw’a?

Ũndũ Mbivilia yaasya

Mbivilia yaĩtye: “Ala me thayũ mesĩ makakw’a; ĩndĩ ala akw’ũ matyĩsĩ ũndũ o na wĩva.” (Mũtavan’ya 9:5; Savuli 146:4) Kwoou, ĩla twakw’a tũyĩthĩawa vo ĩngĩ. Ala akw’ũ mayĩsa kũsũanĩa, kwĩka, kana kwĩw’a ũndũ o na wĩva.

‘Ũkasyoka kĩtoonĩ’

Ĩla Ngai waneenie na mũndũ wa mbee Atamu, nĩwaeleisye ũndũ vethĩawa yĩla mũndũ wakw’a. Nũndũ Atamu ndaatĩĩa mwĩao ũla wanengetwe, Ngai amwĩie atĩĩ: “Wĩ kĩtoo, na nũkasyoka kĩtoonĩ.” (Mwambĩlĩlyo 3:19) Yeova atanamba kũmũmba Atamu “na kĩtoo kya nthĩ,” Atamu ndaĩ vo. (Mwambĩlĩlyo 2:7) O ta ũu, ĩla Atamu wakwie, asyokie kĩtoonĩ na aeka kwĩthĩwa vo.

Ũu now’o vekĩkaa kwa ala makusaa ũmũnthĩ. Mbivilia ĩineena ĩũlũ wa nyamũ na andũ, yaĩtye ũũ: “Onthe nĩ ma kĩtoo, na onthe masyokaa ĩngĩ kĩtoonĩ.”—Mũtavan’ya 3:19, 20.

Kĩkw’ũ ti kyo mũminũkĩlyo wa andũ

Mavinda maingĩ Mbivilia ĩelekanasya kĩkw’ũ na too. (Savuli 13:3; Yoana 11:11-14; Meko ma Atũmwa 7:60) Mũndũ ũkomete vyũ ndethĩawa esĩ kĩla kĩendeee. No ta ũu, akw’ũ mayĩthĩawa mesĩ ũndũ o na wĩva. Ĩndĩ, Mbivilia ĩmanyĩĩtye kana Ngai no aamũkye ala akw’ũ, o ũndũ mũndũ ũkomete ũamũkaw’a, na aimanenga thayũ ĩngĩ. (Yovu 14:13-15) Kwa ala Ngai ũkathayũũkya, kĩkw’ũ ti mũminũkĩlyo woo.