Kĩla ũthi ũvoonĩ ũla wĩ vo

Kĩla ũthi nthĩnĩ wa ũvoo wa kelĩ wa maũndũ ala me vo

Ngũsĩ sya Yeova

Kikamba

We Yesũ Ambiwe Ngelany’onĩ?

We Yesũ Ambiwe Ngelany’onĩ?

Ũndũ Mbivilia yaasya

Andũ aingĩ monaa ngelany’o ne yo ũvano ũla mũnene wa Aklĩsto. Ĩndĩ, Mbivilia ndĩeleetye mũtĩ ũla Yesũ wooaĩiwe ũndũ wailyĩ, kwoou vai mũndũ wĩsĩ nesa vyũ ũndũ mũtĩ ũsu wailyĩ. Ĩndĩ o na ũu wĩ o vo, Mbivilia nĩĩkĩĩthĩtye kana Yesũ ndaambwa ngelany’onĩ ĩndĩ aathĩĩiwe mũtĩnĩ.

Mbivilia ĩtũmĩaa ndeto ya Kĩkiliki stau·rosʹ ĩla ĩkũweta ĩũlũ wa mũtĩ ũla Yesũ wooaĩiwe. (Mathayo 27:40; Yoana 19:17) O na kau mavinda maingĩ Mbivilia mbingĩ ialyũũlĩte ndeto stau·ros ta “ngelany’o,” asomi aingĩ nĩmetĩkĩlanaa kana ndeto ĩsu yonanasya “mũtĩ kana kĩting’ĩ kĩlũngalu kĩnzĩlĩtwe nthĩ.” * Ĩvuku yĩtawa A Critical Lexicon and Concordance to the English and Greek New Testament yaĩtye kana ndeto stau·rosʹ “ĩyonanasya ilungu ilĩ sya mbwaũ ikwatanĩtw’e.”

Mbivilia nĩtũmĩĩte ndeto ya Kĩkiliki xyʹlon ĩla no ũndũ ũmwe na ndeto stau·rosʹ. (Meko ma Atũmwa 5:30; 1 Vetelo 2:24) Ndeto xyʹlon ĩalyũlĩtwe ta “ũvwaũ,” “kĩting’ĩ,” kana “mũtĩ.” * Mbivilia yĩtawa The Companion Bible yaĩtye ũũ: ‘Vaiĩ ndeto o na ĩmwe ya Kĩkiliki nthĩnĩ wa Ũtianĩo Mweũ yonanĩtye ilungu ilĩ sya mũtĩ ikwatanĩtw’e.’

Ngai nĩwendaa andũ matũmĩe ngelany’o ũthaithinĩ?

Ndeto ya Kĩlatinĩ ĩla ĩtũmĩĩtwe kwonany’a kĩtuĩ kana mũtĩ ũla watũmĩawa kwamba ing’ei nĩ crux simplex

O na ethĩwa Yesũ ooaĩiwe mũtĩnĩ ũilyĩ ata, maũndũ aa me vaa ĩtheo ma w’o na maandĩko ma Mbivilia nĩmekwonany’a kana tũyaĩle kũtũmĩa ngelany’o ũthaithinĩ.

  1. Ngai ndendeeaw’a nĩ andũ ala matũmĩaa mĩvw’anano ũthaithinĩ vamwe na ala matũmĩaa ngelany’o. Ngai ameie Aisilaeli maikaatũmĩe mũvw’anano wa “kĩndũ o na kĩva” ũthaithinĩ woo. Namo Aklĩsto meĩtwe ‘makĩe kũthaitha mĩvw’anano.’Kũtũngĩlĩlwa Kwa Mĩao 4:15-19; 1 Akolintho 10:14.

  2. Aklĩsto ma ĩvinda ya atũmwa mayatũmĩaa ngelany’o ũthaithinĩ. * Atũmwa ma Yesũ nĩmatiĩie Aklĩsto onthe ngelekany’o nzeo kwĩsĩla momanyĩsyo moo.2 Athesalonika 2:15.

  3. Kũtũmĩa ngelany’o ũthaithinĩ kwambĩĩiw’e nĩ andũ mathaithaa mĩvw’anano. * Myaka maana maingĩ ĩtina wa Yesũ kũkw’a, makanisa nĩmambĩĩie kwelelũkya momanyĩsyo ala Yesũ wamanyĩasya, na andũ ala mambĩĩie kũthi makanisanĩ asu “nĩmeetĩkĩlilw’e kũtũmĩa mĩvw’anano ĩla matũmĩaa ũthaithinĩ woo matanatw’ĩka Aklĩsto,” mĩvw’anano ĩsu nĩ vamwe na ngelany’o. (The Expanded Vine’s Expository Dictionary of New Testament Words) Ĩndĩ Mbivilia ndyaĩtye kana nĩ kenda mũndũ aalyũke ethĩwe Mũklĩsto, no etĩkĩlw’e aendeesye maũndũ ala ũneekaa matosanĩte na Mbivilia ta kũtũmĩa mĩvw’anano.2 Akolintho 6:17.

^ kal. 4 Sisya New Bible Dictionary, Third Edition, edited by D. R. W. Wood, ĩthangũ ya 245; Theological Dictionary of the New Testament, Volume VII, ĩthangũ ya 572; The International Standard Bible Encyclopedia, Revised Edition, Volume 1, ĩthangũ ya 825; na The Imperial Bible-Dictionary, Volume II, ĩthangũ ya 84.

^ kal. 5 Sisya The Expanded Vine’s Expository Dictionary of New Testament Words, ĩthangũ ya 1165; A Greek-English Lexicon, yĩla yĩandĩkĩtwe nĩ Liddell na Scott, Ninth Edition, ĩthangũ ya 1191-1192; na Theological Dictionary of the New Testament, Volume V, ĩthangũ ya 37.

^ kal. 9 Sisya Encyclopædia Britannica, 2003, entry “Cross”; The Cross—Its History and Symbolism, ĩthangũ ya 40; na The Companion Bible, Oxford University Press, appendix 162, ĩthangũ ya 186.

^ kal. 10 Sisya The Encyclopedia of Religion, Volume 4, ĩthangũ ya 165; The Encyclopedia Americana, Volume 8, ĩthangũ ya 246; na Symbols Around Us, ĩthangũ ya 205-207.