Ũndũ Mbivilia ĩsũngĩĩte

Ĩvindanĩ ya ũla thĩna mũnene, kũkeethĩwa na thĩna ũtaaĩthĩwa kuma nthĩ yoombwa. Kwosana na wathani wa Mbivilia, thĩna ũsu ũkeethĩwa “mĩthenyanĩ ya mũminũkĩlyo,” kana “ĩvinda ya mũminũkĩlyo” (2 Timotheo 3:1; Ndanieli 12:4) Ũsu nĩ ‘thĩna ũtaaĩthĩwa kuma mwambĩlĩlyo wa kũmbwa kwa syĩndũ ila Ngai wombie kũvika na yu, o na kũikethĩwa ũngĩ nongi.’Maliko 13:19; Ndanieli 12:1; Mathayo 24:21, 22.

Maũndũ ala makekĩka ĩvindanĩ ya ũla thĩna mũnene

  • Kwanangwa kwa ndĩni sya ũvũngũ. Ndĩni sya ũvũngũ ikaanangwa kwa ĩvinda ĩkuvĩ mũno. (Ũvuan’yo 17:1, 5; 18:9, 10, 21) Mosumbĩ ma nthĩ ĩno ala mongamĩwe nĩ Ngwatanĩo ya Nthĩ (United Nations) nĩmo makananga ndĩni sya ũvũngũ maitũmĩwa nĩ Ngai kwĩanĩsya kwenda kwake.—Ũvuan’yo 17:3, 15-18. *

  • Kũvithũkĩwa kwa athaithi ma w’o. Mbaĩ ikooka vamwe syĩ ngwatanĩo iyenda kũmina vyũ athaithi ma w’o, na nĩsyo syĩtĩtwe woninĩ wa Esekieli ‘Ngoki wa nthĩ ya Makoki.’ Ĩndĩ Ngai akasũvĩa andũ make.Esekieli 38:1,2, 9-12, 18-23.

  • Kũsilĩlwa kwa andũ ĩũlũ wa nthĩ. Yesũ akasilĩla andũ onthe na ‘kũmavathany’a aa na aya, tondũ mũĩthi ũvathanasya malondu na mbũi.’ (Mathayo 25:31-33) Andũ makasilĩlwa kwosana na ũndũ mamekie “ana-a-asa” ma Yesũ, namo nĩ ala makasumbĩka vamwe nake ĩtunĩ.Mathayo 25:34-46.

  • Kũmbanw’a kwa ala mesumbĩka Ũsumbĩnĩ wa Ngai. Aĩkĩĩku ala manyuvĩtwe mesumbĩka vamwe na Klĩsto makakw’a na maithayũũkw’a na mĩĩ ya veva mathi ĩtunĩ.Mathayo 24:31; 1 Akolintho 15:50-53; 1 Athesalonika 4:15-17.

  • Ali–Maketoni. Ũũ nĩ ‘kaũ wa mũthenya mũnene wa Ngai, Mwene Vinya W’onthe’ na ĩngĩ wĩtawa “mũthenya wa Yeova.” (Ũvuan’yo 16:14, 16; Isaia 13:9; 2 Vetelo 3:12) Ala makasilĩlwa ta athũku nĩ Klĩsto makaanangwa. (Nzevania 1:18; 2 Athesalonika 1:6-10) O na mosumbĩ onthe ma nthĩ ĩno ala Mbivilianĩ maelekanĩtw’e na nyamũ yĩ mĩtwe mũonza makaanangwa.—Ũvuan’yo 19:19-21.

Maũndũ ala makekĩka ĩtina wa ũla thĩna mũnene

  • Kwovwa kwa Satani na ndaimoni. Mũlaĩka wa Yeova akamwĩkya Satani na ndaimoni syake ĩimanĩ yĩte kĩtulu na ũu nĩ kwasya kana maikethĩwa matonya kwĩka ũndũ o na ũmwe. (Ũvuan’yo 20:1-3) Satani e ĩimanĩ yĩu, akeethĩwa nĩ ta mũvingĩe vandũ, na kwoou ndakethĩwa atonya kwasya andũ ĩũlũ wa nthĩ.—Ũvuan’yo 20:7.

  • Kwambĩĩa kwa Ũsumbĩki wa Myaka Ngili. Ũsumbĩki wa Myaka Ngili waambĩĩa, andũ makakwata moathimo maingĩ. (Ũvuan’yo 5:9, 10; 20:4, 6) “Ĩkomano ĩnene” ya andũ “maumĩte thĩnanĩ ũla mũnene” makoona Ũsumbĩki wa Ngai wa Myaka Ngili ũyambĩĩa vaa ĩũlũ wa nthĩ.—Ũvuan’yo 7:9, 14; Savuli 37:9-11.

^ kal. 5 Nthĩnĩ wa ĩvuku ya Ũvuan’yo, ndĩni sya ũvũngũ syĩtĩtwe Mbaviloni Ĩla Nene, “yĩla ĩlwaya ĩnene.” (Ũvuan’yo 17:1, 5) Nyamũ ndune mũno ĩla ĩkwoneka ĩyananga Mbaviloni Ĩla Nene nĩ ũseũvyo mũna wa nthĩ ũla kĩeleelo kyaw’o nĩ kũmbany’a mosumbĩ onthe ma nthĩ vamwe na kũmongamĩa. Mbeenĩ ũseũvyo ũsu weetawa Wovano wa Mbaĩ (League of Nations) na yu wĩtawa Ngwatanĩo ya nthĩ (United Nations).