Kĩla ũthi ũvoonĩ ũla wĩ vo

Kĩla ũthi nthĩnĩ wa ũvoo wa kelĩ wa maũndũ ala me vo

Ngũsĩ sya Yeova

Kikamba

Nĩkĩ Ayuti Aingĩ Mooaiwe Ĩvinda ya Hitler? Nĩkĩ Ngai Ũtaasiĩĩa Ũaani Ũsu?

Nĩkĩ Ayuti Aingĩ Mooaiwe Ĩvinda ya Hitler? Nĩkĩ Ngai Ũtaasiĩĩa Ũaani Ũsu?

Andũ aingĩ ala makũlasya makũlyo asu nĩmathĩnĩte mũno na makakwata wasyo mũnene na kwoou maimanthaa mosũngĩo me moka, ĩndĩ nĩmendaa kũkwata ũkiakisyo. Angĩ monaa kũawa kwa Ayuti asu ne ũthũku mũnene vyũ, na nũndũ wa ũu, wĩthĩawa wĩ ũndũ wĩ vinya mũno kwoo kũmũĩkĩĩa Ngai.

Maũndũ mate maw’o ĩũlũ wa Ngai na ũaani ũsu weekiwe nĩ Hitler

Ũvũngũ: Ti ũseo kũkũlya nĩkĩ Ngai waekie ũaani ũsu wĩthĩwe.

Kĩla kya w’o: Andũ me na mũĩkĩĩo mũlũmu nĩmekũlĩtye nĩkĩ Ngai wĩtĩkĩlĩtye ũthũku ũendeee. Kwa ngelekany’o, mwathani Avakuki akũlilye Ngai atĩĩ: “Nĩkĩ ũekete ũng’endu, ũtũli wa mĩao, ũng’endilĩ, na ũthũku ũendeee kĩla vandũ?” (Avakuki 1:3, Contemporary English Version) Vandũ va kũmũkany’a Avakuki, Ngai nĩweetĩkĩlilye makũlyo asu maandĩkwe Mbivilianĩ nĩ kana andũ mamasome.

Ũvũngũ: Ngai ndamakaa ĩla andũ meũthĩna.

Kĩla kya w’o: Ngai nũmenete ũthũku na mathĩna ala ũetae. (Nthimo 6:16-19) Ĩvindanĩ ya Noa Ngai ‘nĩweew’ĩthiw’e woo ngoonĩ yake’ nũndũ wa ũng’endu ũla waĩ ĩũlũ wa nthĩ. (Mwambĩlĩlyo 6:5, 6) Kwoou, vaiĩ nzika kana Ngai nĩweewie woo mwingĩ mũno ĩla Ayuti asu aingĩ mooaiwe.—Malaki 3:6.

Ũvũngũ: Ngai atũmĩie ũaani ũsu kũkany’a Ayuti.

Kĩla kya w’o: Ngai nĩweetĩkĩlilye Yelusaleme yanangwe nĩ Alomi ĩvindanĩ ya atũmwa. (Mathayo 23:37–24:2) Ĩndĩ kuma ĩvindanĩ yĩu, Ngai ndanyuvaa mbaĩ ĩmwe noyo yĩthĩwe yake kana akamĩnyuva nĩ kana amĩkany’e. Methonĩ ma Ngai, “kũi kĩvathũkany’o katĩ wa Ayuti na Andũ ma mbaĩ ingĩ.”—Alomi 10:12, Good News Translation.

Ũvũngũ: Kethĩwa kwĩ Ngai mwene vinya w’onthe na wĩ wendo, ethĩwa asiĩĩie ũaani ũsu wa ĩvinda ya Hitler.

Kĩla kya w’o: O na kau Ngai ndaetae mathĩna, mavinda amwe nũekaa methĩwe o kwa kavinda.—Yakovo 1:13; 5:11.

Nĩkĩ Ngai waekie Ayuti aingĩ moawe ĩvinda yu?

Ngai aekie ũaani ũsu wĩthĩwe nũndũ wa kĩtumi o kĩla kĩtumĩte aeka mathĩna maendeee ũmũnthĩ. Kĩtumi kĩu nĩ kũsũngĩa maũndũ ala maumĩlilw’e nĩ Satani. Mbivilia nĩyonanĩtye nesa vyũ kana ĩvindanĩ yĩĩ tũĩ, Ngai tiwe ũsumbĩkĩte nthĩ ĩndĩ nĩ Satani. (Luka 4:1, 2, 6; Yoana 12:31) O na kau ungu wa kyongo kĩĩ ve ũvoo ũeleetye mũnango nĩkĩ Ngai ũekete mathĩna methĩwe, ve itumi ilĩ nzeo kuma Mbivilianĩ itonya kũtũtetheesya kũelewa nĩkĩ Ngai waekie ũaani ũsu wĩthĩwe.

  1. Nũũ watumie ũaani ũsu mũthũku ũu wĩthĩwa? Ngai nĩwatavisye asyai maitũ ma mbee Atamu na Eva kĩla wendaa meke, ĩndĩ ndaamalasimĩthya. Nĩmanyuvie kwĩtw’ĩaa kĩla kĩseo na kĩla kĩthũku. Ũtwi woo mũthũku, vamwe na motwi ala mekawa nĩ andũ kuma ĩvindanĩ yĩu, nĩmatumĩte andũ makwatwa nĩ maũndũ mathũku. (Mwambĩlĩlyo 2:17; 3:6; Alomi 5:12) No ta ũndũ ĩvuku Statement of Principles of Conservative Judaism yaĩtye: “Mathĩna maingĩ ala makwataa andũ maumanĩte na andũ kũtũmĩa naĩ ũthasyo wa kwĩnyuvĩa ũla manengetwe.” Vandũ va kũvena andũ ũthasyo ũsu, Ngai amanengete ĩvinda metongoesye ateũmalikĩlĩĩla.

  2. Ngai nũtonya, na akatũngĩĩa wanangĩko w’onthe ũla waumĩlile ĩvindanĩ yĩu ya ũaani mũnene. Ngai nĩwathanĩte kũthayũũkya andũ milioni mbingĩ ala makw’ĩte, ala nĩ vamwe na Ayuti asu aingĩ mooaiwe. O na akamina woo ũla ala mavonokie ĩvinda yĩu mew’aa malilikana maũndũ mathũku ala meekiwe. (Isaia 65:17; Meko ma Atũmwa 24:15) Tũi na nzika kana Ngai akeanĩsya mawatho asu onthe nũndũ nĩwendete andũ.—Yoana 3:16.

Andũ aingĩ ala mavonokie ĩvindanĩ yĩu, maĩ na mũĩkĩĩo mũlũmu na nĩmaendeeie kwĩkala me atanu nũndũ nĩmaeleetwe nĩkĩ Ngai ũekete mathĩna methĩwe, na nĩmeesĩ kana akamina mathĩna asu vyũ.