Kĩla ũthi ũvoonĩ ũla wĩ vo

Kĩla ũthi nthĩnĩ wa ũvoo wa kelĩ wa maũndũ ala me vo

Ngũsĩ sya Yeova

Kikamba

Mbivilia Yaĩtye Ata Ĩũlũ wa Kũsisya Kana Kũsoma Maũndũ Makonetye Ngomany’o? Nĩ Ũthũku Kũtũmanĩa Mesengyi Ikonetye Maũndũ ma Ngomany’o Nthĩnĩ wa Indaneti?

Mbivilia Yaĩtye Ata Ĩũlũ wa Kũsisya Kana Kũsoma Maũndũ Makonetye Ngomany’o? Nĩ Ũthũku Kũtũmanĩa Mesengyi Ikonetye Maũndũ ma Ngomany’o Nthĩnĩ wa Indaneti?

Ũndũ Mbivilia yaasya

Mbivilia ndĩwetete ĩmwe kwa ĩmwe ĩũlũ wa kũsisya kana kũsoma maũndũ makonetye ngomany’o, kũtũmanĩa mesengyi ikonetye maũndũ ma ngomany’o nthĩnĩ wa indaneti, kana maũndũ angĩ ma mũthemba ũsu. Ĩndĩ o na ũu wĩ o vo, Mbivilia nĩyonanĩtye ũtheinĩ ũndũ Ngai wĩw’aa ĩũlũ wa meko ala matonya kũtuma andũ mathi nza wa mũtwaano, kana methĩwa na woni ũtaĩle ĩũlũ wa ngomany’o. Kwoona ũndũ mĩsoa ĩno ya Mbivilia yaĩtye:

  • “Ũaai mamutha menyu ala me kũũ nthĩ: ũlaalai, na ũvuku, na mĩmeo mĩthũku.” (Akolosai 3:5) Vandũ va kũaa mĩmeo mĩthũku, kũsisya kana kũsoma maũndũ makonetye ngomany’o kũkĩlasya mĩmeo ĩsu. Kwĩka ũu kũtumaa mũndũ ethĩwa e mũvuku methonĩ ma Ngai.

  • “Kĩla mũndũ ũsyaasya mũndũ mũka na kũmwĩw’ĩa mũmeo nĩweka ũlaalai nake ngoonĩ yake.” (Mathayo 5:28) Kũsisya mavisa makonetye ũlaalai kũtumaa mũndũ ethĩwa na mesilya mathũku ala matonya kũtuma eka maũndũ mataĩle.

  • “Ĩndĩ ũlaalai, na ũvuku w’onthe, na wendi, maikawetwe katĩ wenyu.” (Aeveso 5:3) Tũyaĩle kũwetanga ĩũlũ wa ngomany’o, kũsisya, kana kũsoma ĩũlũ wasyo nĩ kana twĩtanĩthye.

  • “Mawĩa ma mwĩĩ nĩ moneku, na nĩmo aa: ũlaalai, ũvuku, . . . na maũndũ angĩ mailyĩ ta asu; kũla kwĩ maũndũ asu nĩmũtaa mbee, o ũndũ namũtaie, kana ala mekaa maũndũ ta asu maikatiĩwa ũsumbĩ wa Ngai.” (Akalatia 5:19-21) Andũ ala masiasya kana kũsoma maũndũ makonetye ngomany’o, ala matũmanĩaa mesengyi kana kũneenany’a ĩũlũ wa maũndũ makonetye ngomany’o indanetinĩ, ala matũmĩaa simũ kũneenea kana kwĩthukĩĩsya maũndũ mataĩle ĩũlũ wa ngomany’o, na ala matũmanĩaa mesengyi kana mavisa makonetye ngomany’o simũnĩ, Ngai amonaa me avuku. Kwĩka maũndũ asu nĩũtuma twananga vyũ ngwatanĩo yitũ na Ngai.