Ũndũ Mbivilia ĩsũngĩĩte

Ngai e o ĩsyĩtwa yĩmwe. Ĩsyĩtwa yĩu yĩandĩkawa יהוה kwa kĩthyomo kya Kĩevelania na kwa Kĩkamba yĩandĩkawa “Yeova.” * Kwĩsĩla mwathani wake Isaia, Ngai aisye atĩĩ: “Ninyie Yeova, nĩyo syĩtwa yakwa.” (Isaia 42:8) Ĩsyĩtwa yĩu yonekaa mavinda ta 7,000 mavukunĩ ma tene ma Mbivilia. Ũu nĩ kwasya kana yonekaa mavinda maingĩ mũno kwĩ ĩsyĩtwa yĩngĩ yĩtũmĩĩtwe kwondũ wa Ngai, o na kwĩ ĩsyĩtwa ya mũndũ ũngĩ o na wĩva.

Yeova e masyĩtwa angĩ?

O kau Mbivilia yonanasya kana Ngai e ĩsyĩtwa o yĩmwe, ĩtũmĩaa masyĩtwa maingĩ ma ndaĩa na ma kũmũelesya. Amwe ma masyĩtwa asu ma ndaĩa na ma kũmũelesya nĩmonanĩtw’e vaa ĩtheo. Kĩla ĩsyĩtwa yonanĩtye ndaĩa sya Ngai.

Ĩsyĩtwa

Vala yonekaa

Ũndũ yonanasya

Mwene Vinya W’onthe

Mwambĩlĩlyo 17:1

E vinya mwingĩ ũte maela. Ndeto ya Kĩevelania ʼEl Shad·daiʹ, “Ngai Mwene Vinya W’onthe,” yonekaa mavinda mũonza Mbivilianĩ.

Aliva na Omeka

Ũvuan’yo 1:8; 21:6; 22:13

“Wa mbee na wa ĩtina,” kana “mwambĩlĩlyo na mũminũkĩlyo,” kwonany’a kana vayaaĩthĩwa ĩngĩ na Ngai Mwene Vinya W’onthe eka Yeova na vaikethĩwa ũngĩ ĩtina wake. (Isaia 43:10) Aliva nĩyo ndeto ya mbee, nayo Omeka nĩyo ndeto ya mũthya nthĩnĩ wa nthoo sya Kĩkiliki.

Mũtumĩa wa Matukũ

Ndanieli 7:9, 13, 22

Ndaĩ na mwambĩlĩlyo, na kwoou atwĩe kw’o kuma tene na tene o na vate mũndũ waaĩthĩwa kana kĩndũ kĩngĩ kwĩthĩwa vo.​—Savuli 90:2.

Mũmbi

Isaia 40:28

Nĩwe watumie syĩndũ syonthe syĩthĩwa.

Asa

Mathayo 6:9

Nĩwe ũtũnengae thayũ.

Ngai

Mwambĩlĩlyo 1:1

Ũla waĩle kũthaithwa, na wĩ vinya mwingĩ. Ndeto ya Kĩevelania ʼElo·himʹ ĩandĩkĩtwe kwa wingĩ kwonany’a kana Yeova nĩ mũnene, na nĩwaĩle kũnewa ndaĩa.

Ngai wa i ngai

Kũtũngĩlĩlwa Kwa Mĩao 10:17

Nĩwe Ngai ũla menene vyũ, na wĩ kĩvathũkany’o na “mĩvw’anano” ĩla ĩthaithawa nĩ andũ amwe.​—Isaia 2:8.

Mũmanyĩsya Mũnene

Isaia 30:20, 21

Nũtũmanyĩasya na aitũtongoesya kwa nzĩa ĩla yaĩle.​—Isaia 48:17, 18.

Ngai mũtanu

1 Timotheo 1:11

Ethĩawa e mũtanu mavinda onthe.​—Savuli 104:31.

Mwĩthukĩĩsya wa mboya

Savuli 65:2

We mwene nĩwĩthukĩĩasya andũ onthe ala mamũvoya na mũĩkĩĩo.

Ninyie Ũla Ninyie

Kuma 3:14

Atw’ĩkaa kyonthe kĩla kĩkwendeka nĩ kana eanĩsye kĩeleelo kyake. Ndeto isu syĩtũtetheesya kũelewa ĩsyĩtwa ya Ngai, Yeova, yĩla yonanĩtw’e mũsoanĩ ũla ũatĩĩe.​—Kuma 3:15.

Wĩ-kĩwĩu

Kuma 34:14

Ndetĩkĩlasya andũ mathaithe ngai ingĩ maimũthaitha.

Mũsumbĩ wa tene na tene

Ũvuan’yo 15:3

Ũsumbĩki wake ndwĩ mwambĩlĩĩlyo kana mũminũkĩlyo.

Mwĩaĩi

Savuli 135:5

Nĩwe mũnene kana wĩ ĩũlũ wa kĩla kĩndũ, kwa Kĩevelania nĩ ʼA·dhohnʹ na ʼAdho·nimʹ.

Yeova wa nguthu, Mwĩaĩi wa Savaothi

Isaia 1:9; Alomi 9:29

Mũnene wa nguthu sya alaĩka.

Ũla wĩ Ĩũlũ wa Onthe

Savuli 47:2

Nĩwe wĩ ũkũmũ ũla mũnene vyũ.

Ũla Mũtheu

Nthimo 9:10

Nĩ mũtheu vyũ maũndũnĩ onthe kwĩ kyũmbe o na kĩmwe.

Mũmbi waitũ

Isaia 64:8

E na ũkũmũ ĩũlũ wa kĩla mũndũ na mbaĩ, o tondũ mũmbi wĩthĩawa na ũkũmũ ĩũlũ wa yũmba.​—Alomi 9:20, 21.

Mwovosya

Isaia 41:14

Nĩwovoasya andũ kuma naĩnĩ na kĩkw’ũnĩ kwĩsĩla nthembo ya wovosyo ya Yesũ Klĩsto.​—Yoana 3:16.

Ĩvia

Savuli 18:2, 46

Nĩ wĩvitho mũlũmu na nũtangĩĩaa.

Mũtangĩĩi

Isaia 45:21

Nũtangĩĩaa ĩla kweethĩwa na mĩisyo kana wanangĩko.

Mũĩthi

Savuli 23:1

Nũsũvĩaa athaithi make.

Mwĩaĩi Mũsumbĩ Mũnene

Mwambĩlĩlyo 15:2

E ũkũmũ ũla mũnene vyũ, kwa kĩthyomo kya Kĩevelania nĩ ʼAdho·naiʹ.

Kũndũ kũla kwĩtanĩw’e na ĩsyĩtwa ya Yeova nthĩnĩ wa Maandĩko ma Kĩevelania

Masyĩtwa ma kũndũ kũmwe kũwetetwe Mbivilianĩ metanĩw’e na ĩsyĩtwa ya Ngai, ĩndĩ asu ti masyĩtwa angĩ ma Ngai.

Ĩsyĩtwa ya vandũ

Vala yonanĩtw’e

Ũndũ yonanasya

Yeova-yile

Mwambĩlĩlyo 22:13, 14

“Yeova Nĩwĩanĩasya Mavata.”

Yeova-nisi

Kuma 17:15

“Yeova Nĩ Kĩtuĩ kya Ũsindi Wakwa.” Yeova nĩ Ngai ũla andũ make matonya kũmwĩkwatya amasũvĩe na aimatethya.​—Kuma 17:13-16.

Yeova-salomu

Asili 6:23, 24

“Yeova Nĩ Mũuo”

Nĩkĩ waĩle kũmanya ĩsyĩtwa ya Ngai na kũyĩtũmĩa?

  • No nginya Ngai ethĩwe onaa ĩsyĩtwa yake, Yeova, yĩ ya vata nũndũ nũyĩkĩĩte Mbivilianĩ mavinda ngili mbingĩ.​—Malaki 1:11.

  • Mwana wa Ngai, Yesũ, nĩwakindĩlĩĩile mavinda maingĩ vata wa ĩsyĩtwa ya Ngai. Kwa ngelekany’o ve ĩvinda wavoyie Yeova asya atĩĩ: “Syĩtwa yaku yĩtaĩwe.”​—Mathayo 6:9; Yoana 17:6.

  • Mũndũ ũla wĩmanyĩasya ĩsyĩtwa ya Ngai na aiyĩtũmĩa ethĩawa oosa matambya ma mbee ma kũseũvya ngwatanĩo yake na Yeova. (Savuli 9:10; Malaki 3:16) Ngwatanĩo isu nĩtumaa atetheka kumana na watho ũũ wa Ngai: ‘Nĩkwĩthĩwa nũlũlũmĩlĩtye wendo wake vala nĩĩ, kwondũ wa ũu ngamũvonokya: ngamũtũlya, nĩkwĩthĩwa nũmanyĩte syĩtwa yakwa.’​Savuli 91:14.

  • Mbivilia yaĩtye atĩĩ: “Kwĩ ingĩ syĩtawa ngai, syethĩwa syĩ ĩtunĩ, o na syethĩwa syĩ nthĩ; o ũndũ kwĩ ngai nyingĩ, na eaĩi aingĩ.” (1 Akolintho 8:5, 6) Ĩndĩ o na vamwe na ũu, nĩyonanasya kana ĩsyĩtwa ya Ngai wa w’o weka nĩ Yeova.​—Savuli 83:18.

^ kal. 3 Asomi amwe ma Kĩevelania mendete mũno kũtũmĩa “Yahweh” tayo ĩsyĩtwa ya Ngai.