Kĩla ũthi ũvoonĩ ũla wĩ vo

Kĩla ũthi nthĩnĩ wa ũvoo wa kelĩ wa maũndũ ala me vo

Ngũsĩ sya Yeova

Kikamba

Naaũ Maendaa Ĩtunĩ?

Naaũ Maendaa Ĩtunĩ?

Ũndũ Mbivilia ĩsũngĩĩte

Ngai nũnyuvaa Aklĩsto avũthũ aĩkĩĩku ala ĩtina wa kũkw’a mathayũũkaw’a makathi ĩtunĩ. (1 Vetelo 1:3, 4) Manyuvwa, no nginya maendeee kwĩthĩwa na mũĩkĩĩo mũlũmu vamwe na mwĩkalĩle mũseo wa Kĩklĩsto nĩ kana mekwata ĩtuvi yoo.Aeveso 5:5; Avilivi 3:12-14.

Ala manyuvĩtwe kũthi ĩtunĩ makathi kwĩka ata kũu?

Makasumbĩka vamwe na Yesũ me asumbĩ na athembi kwa myaka 1,000. (Ũvuan’yo 5:9, 10; 20:6) Nĩmo makatw’ĩka “matu meũ,” kana silikalĩ ya ĩtunĩ ĩla ĩkasumbĩka “nthĩ nzaũ,” ĩla nĩ andũ alũngalu ala makethĩwa vaa ĩũlũ wa nthĩ. Asumbĩ asu ma ĩtunĩ makatetheesya andũ methĩwe me eanĩu na maitanĩa kwĩkalaa nthĩ tene na tene, o tondũ Ngai wavangĩte.Isaia 65:17; 2 Vetelo 3:13.

Nĩ meana ala methayũũkw’a mathi ĩtunĩ?

Mbivilia yaĩtye kana andũ 144,000 nĩmo methayũũkw’a mathi ĩtunĩ. (Ũvuan’yo 7:4) Nthĩnĩ wa woni ũla wĩ ĩandĩkonĩ ya Ũvuan’yo 14:1-3, mũtũmwa Yoana oonie “kala Katena ka ĩlondu aũngeme kĩĩmanĩ kya Saioni, na vamwe nake andũ ngili ĩana na mĩongo ĩna na inya.” Woninĩ ũũ, “Katena ka ĩlondũ” kaũngamĩe Yesũ e ĩtunĩ ĩtina wa kũthayũũkw’a. (Yoana 1:29; 1 Vetelo 1:19) Nakyo ‘kĩĩma kya Saioni’ kĩũngamĩe kĩanda kĩnene kĩla Yesũ vamwe na ala 144,000, makethĩwa nakyo kya kũsumbĩka ĩtunĩ.Savuli 2:6; Aevelania 12:22.

Ala ‘metĩtwe’ na “anyuve” kũsumbĩka vamwe na Klĩsto Ũsumbĩnĩ wa Ngai metawa “ĩĩthya ĩnini.” (Ũvuan’yo 17:14; Luka 12:32) Ũu nĩ kwonany’a kana makeethĩwa me avũthũ masyaanĩw’a na ũtalo wa malondu onthe ma Yesũ.Yoana 10:16.

Momanyĩsyo ma ũvũngũ ĩũlũ wa ala methi ĩtunĩ

Ũmanyĩsyo wa ũvũngũ: Andũ onthe ala aseo maendaa ĩtunĩ.

Kĩla Mbivilia ĩmanyĩasya: Ngai athĩte andũ aingĩ ala aseo thayũ ũtathela ĩũlũ wa nthĩ.Savuli 37:11, 29, 34.

  • Yesũ aisye atĩĩ: “Vai mũndũ waambata ĩtunĩ.” (Yoana 3:13) Kwoou Yesũ oonanisye kana andũ aseo ala makwie mbee wake ta Avalaamu, Mose, Yovu, na Ndaviti, mayaathi ĩtunĩ. (Meko ma Atũmwa 2:29, 34) Vandũ va ũu, maĩ na wĩkwatyo wa kwĩsa kũthayũũkw’a matanĩe thayũ ĩũlũ wa nthĩ.Yovu 14:13-15.

  • Ũthayũũkyo wa kũthi ĩtunĩ wĩtawa ‘ũthayũũkyo wa mbee.’ (Ũvuan’yo 20:6) Ũu nĩ kwonany’a kana kũkeethĩwa ũthayũũkyo ũngĩ, naw’o nĩ ũthayũũkyo wa kũũ nthĩ.

  • Mbivilia ĩmanyĩasya kana ungu wa Ũsumbĩ wa Ngai, “kĩkw’ũ kĩikethĩwa vo ĩngĩ.” (Ũvuan’yo 21:3, 4) No nginya watho ũsu wĩthĩwe ũineenea vaa ĩũlũ wa nthĩ, nũndũ vai ĩvinda kĩkw’ũ kyaaĩthĩwa ĩtunĩ.

Ũmanyĩsyo wa ũvũngũ: Kĩla mũndũ nĩwe wĩnyuvĩaa vala ũkekala, vethĩwe nĩ ĩtunĩ, kana nĩ ĩũlũ wa nthĩ.

Kĩla Mbivilia ĩmanyĩasya: Ngai nĩwe ũnyuvaa Aklĩsto aĩkĩĩku ala makakwata ‘mũthĩnzĩo ũla meetĩiwe ĩũlũ,’ naw’o nĩ wĩkwatyo wa kũthi ĩtunĩ. (Avilivi 3:14) Ngai ndasiasya wendi wa mũndũ ainyuva akakwata thayũ wa tene na tene e va.Mathayo 20:20-23.

Ũmanyĩsyo wa ũvũngũ: Wĩkwatyo wa kwĩkala kũũ nthĩ tene na tene ti mũseo ta wa ĩtunĩ, na ũnengawe ala mateanĩĩe kũthi ĩtunĩ.

Kĩla Mbivilia ĩmanyĩasya: Ngai ametĩte ala makakwata thayũ ũtathela ĩũlũ wa nthĩ “andũ makwa,” “anyuve makwa,” na “ala aathime ma Yeova.” (Isaia 65:21-23) Makatanĩa kĩanda kya kũtetheesya kwĩanĩsya kĩeleelo kĩla Ngai waĩ nakyo mwambĩĩonĩ, kya andũ eanĩu kũtanĩa kwĩkala ĩũlũ wa nthĩ tene na tene yĩ vandũ vaseo.Mwambĩlĩlyo 1:28; Savuli 115:16; Isaia 45:18.

Ũmanyĩsyo wa ũvũngũ: Namba 144,000 ĩtũmĩĩtwe ta ngelekany’o, ti ũtalo wa w’o.

Kĩla Mbivilia ĩmanyĩasya: O na kau ĩvuku ya Ũvuan’yo yĩ na namba syaĩle kwoswa ta ngelekany’o, namba imwe syonanasya ũtalo wa w’o. Kwa ngelekany’o, nĩyĩwetete ĩũlũ wa “masyĩtwa ĩkũmi na elĩ ma ala atũmwa ĩkũmi na elĩ ma kala Katena.” (Ũvuan’yo 21:14) Ekai tũsisye itumi imwe sya kwasya kana namba 144,000 ndyaĩle kwoswa ta ngelekany’o.

Ũvuan’yo 7:4 nĩyonanĩtye, “ũtalo wa ala meekĩĩtwe ũsiĩlo [kana, ala maĩkĩĩthĩtw’e kũkwata thayũ ĩtunĩ], ngili ĩana na mĩongo ĩna na inya.” Mĩsoa ĩla ĩatĩĩe nĩwetete ĩũlũ wa kĩkundi kĩngĩ kĩtĩtwe “ĩkomano ĩnene ya andũ, yĩla mũndũ o na wĩva ũtatonya kũyĩtalĩkya.” Asu ma “ĩkomano ĩnene,” o namo makwataa ũtangĩĩo kuma kwa Ngai. (Ũvuan’yo 7:9, 10) Ethĩwa namba ĩno 144,000 nĩ ya ngelekany’o na yĩonany’a kĩkundi kĩ na ũtalo ũtesĩkĩwe, vaiĩ vata wa kũelekany’a ikundi isu syelĩ. *

O na eka ũu, andũ asu 144,000 maeleetw’e ta “mathooetwe kumw’a andũnĩ, methĩwe ũsyao wa mbee.” (Ũvuan’yo 14:4) Ndeto “ũsyao wa mbee” syĩonany’a kana kĩu no kĩkundi kĩnini kĩnyuvĩtwe kuma andũnĩ. Na nĩ ndeto ieleetye nesa ala makasumbĩka ĩtunĩ vamwe na Klĩsto masumbĩkĩte ũtalo ũtesĩkĩwe wa andũ ala makethĩwa ĩũlũ wa nthĩ.—Ũvuan’yo 5:10.

^ kal. 21 Nake mũsomi ũmwe wĩtawa Robert L. Thomas aineenea ũtalo wa 144,000 ũla wĩ nthĩnĩ wa Ũvuan’yo 7:4, aandĩkie ũũ: “Nĩ ũtalo wa w’o, kĩvathũkany’o na ũtalo ũtesĩkĩwe ũla wĩ nthĩnĩ wa 7:9. Namba ĩsu ĩkoswa ta ngelekany’o, vai namba yĩthĩwa yĩ ũtalo wa w’o ĩvukunĩ ya Ũvuan’yo.”Revelation 1-7: An Exegetical Commentary, ĩthangũ ya 474.