Ũndũ Mbivilia yaasya

Ĩĩ. Ngai nũthĩnĩkĩaa athũkũmi make ala awau. Mbivilia yaasya ũũ ĩũlũ wa mũthũkũmi mũĩkĩĩku wa Ngai: “Yeova nĩwe ũkamũtethya e ũkomonĩ awaa.” (Savuli 41:3) Ethĩwa wĩ na ũwau mũthũku, kũatĩĩa maũndũ aa atatũ no kũũtetheesye mũno:

  1. Voya ũnengwe vinya wa kũmĩĩsya. No ũkwate “mũuo wa Ngai ũla ũvĩtũkĩte ũmanyi w’onthe.” Mũuo ũsu nĩũkũnenga vinya na kũũtetheesya ũmĩĩsye.Avilivi 4:6, 7.

  2. Ĩthĩwa na woni waĩle. Mbivilia yaasya: “Ngoo ndanu nĩ mũiito mũseo; ĩndĩ ngoo yĩ na ũthatu nĩũtuma mũndũ esa kũkw’a.” (Nthimo 17:22, Good News Translation) Tata wĩthĩawe wĩ mũtanu, nũndũ ũu nĩũtuma ũtemakĩa mũno, o na nĩũtuma wĩthĩwa na mwĩĩ ũte na mathĩna maingĩ.

  3. Ĩthĩwa na wĩkwatyo mũlũmu wa ĩvinda yũkĩte. Wĩkwatyo mũseo nĩũtuma wĩthĩwa na ũtanu ona ĩla wĩ na ũwau mũthũku. (Alomi 12:12) Mbivilia nĩyathanĩte ĩvinda yĩla andũ ‘matakasya nyie nĩ mũwau.’ (Isaia 33:24) Ĩvinda yĩu Ngai akamina mowau onthe mathũku ala mũndũ ũtatonya kũmina. Kwa ngelekany’o, Mbivilia nĩwetete kana ũkũũ ũkathela. Yaĩtye: “Mwĩĩ wake ũkeethĩwa mwololo kwĩ wa kana; Nũsyokaa mĩthenyanĩ ya wana wake.Yovu 33:25.

Lilikana: O na kau Ngũsĩ sya Yeova nĩsyĩsĩ kana Ngai no aitetheesye, nimanthaa ũiiti ĩla syakwatwa nĩ ũwau mũthũku. (Maliko 2:17) Ĩndĩ o na ũu wĩ o vo, vaiĩ ũiiti ũla tũtonya kwasya nĩw’o mũseo. Na nũndũ wa kĩtumi kĩu, kĩla mũndũ nĩwe waĩle kwĩtw’ĩĩa ũiiti ũla ũkwona waĩle.