Kĩla ũthi ũvoonĩ ũla wĩ vo

Kĩla ũthi nthĩnĩ wa ũvoo wa kelĩ wa maũndũ ala me vo

Ngũsĩ sya Yeova

Kikamba

Ũtonya Ata Kũmĩelewa Mbivilia?

Ũtonya Ata Kũmĩelewa Mbivilia?

Ũndũ Mbivilia yaasya

Mbivilia nĩyonanĩtye ũndũ mũndũ ũtonya kwĩka nĩ kana amĩelewe. O na ethĩwa umĩte va, no ũmanye ũvoo ũla wĩ Mbivilianĩ nũndũ “ti mũito mũno kwaku, o na ndwĩ kũasa.”—Kũtũngĩlĩlwa Kwa Mĩao 30:11.

Maũndũ ala matonya kũũtetheesya ũelewe Mbivilia

  1. Ĩthĩwa na woni waĩle. Mĩtĩkĩle Mbivilia ta Ndeto ya Ngai. Ĩthĩwa na wĩnyivyo nũndũ Ngai nũleanĩte na mĩng’athĩlĩlyo. (1 Athesalonika 2:13; Yakovo 4:6) Ĩndĩ o na vailyĩ ũu, ndũkaĩkĩĩe kĩla ũndũ ũtamanyĩte ũw’o. Ngai endaa ũtũmĩe ‘ũtonyi waku wa kũsũanĩa.’—Alomi 12:1, 2, New World Translation.

  2. Voya ũnengwe ũĩ. Ĩandĩko ya Nthimo 3:5 yaĩtye, “Ndũkekwatye ũmanyi waku mwene.”. Ĩndĩ vandũ va ũu, endeea ‘kũmũvoya Ngai’ aũnenge ũĩ wa kũelewa Mbivilia.—Yakovo 1:5.

  3. Mĩsomae kĩla ĩvinda. Ũkatetheka mũnango weemanyĩsya Mbivilia kĩla ĩvinda kũte ĩla wamĩsoma ũitĩĩa.—Yosua 1:8.

  4. Ĩmanyĩsye kyongo kwa kyongo. Nzĩa nzeo ya kwĩmanyĩsya kĩla maandĩko meũmanyĩsya nĩ kũkunĩkĩla kwa ũliku ũndũ Mbivilia ĩmanyĩasya ĩũlũ wa kyongo kĩna kana ũvoo mũna. Ambĩĩa na “momanyĩsyo ma mbee,” na ĩndĩ ‘ũithi na mbee ũkavikĩe maũndũ ma ũima.’ (Aevelania 6:1, 2, The Holy Bible in Current Kikamba Language) Weeka ũu, ũkeethĩa no ũsyaanĩsye maandĩko, na ũyĩmanyĩsya kana mĩsoa ĩmwe ya Mbivilia nĩyĩeleasya ĩngĩ, o na ĩla yĩ “vinya kũmanya.”—2 Vetelo 3:16.

  5. Kũlya angĩ maũtetheesye. Mbivilia ĩtwĩkĩaa vinya twĩtĩkĩle ũtethyo kuma kwa andũ angĩ ala maeleawa Mbivilia. (Meko ma Atũmwa 8:30, 31) Ngũsĩ sya Yeova nĩsyĩmanyĩasya Mbivilia na andũ vate ndĩvi. O ta Aklĩsto ma ĩvinda ya atũmwa, matũmĩaa maandĩko kũtetheesya andũ mamanye yo Mbivilia ĩmanyĩasya ata.—Meko ma Atũmwa 17:2, 3.

Maũndũ ala mate ma lasima kwĩthĩwa namo

  1. Ũĩ mwingĩ kana kĩsomo. Atũmwa ma Yesũ me 12 nĩmaeleetwe maandĩko na nĩmamanyĩasya andũ angĩ o na kau aingĩ mamonaa me andũ “matamanyĩĩtw’e, na mate na ũmanyi.”—Meko ma Atũmwa 4:13.

  2. Mbesa. Nũtonya kwĩmanyĩsya Mbivilia vate ndĩvi. Yesũ eeie atũmwa make atĩĩ: “Nĩmwosete mana, nenganai mana.”—Mathayo 10:8.