Kĩla ũthi ũvoonĩ ũla wĩ vo

Kĩla ũthi nthĩnĩ wa ũvoo wa kelĩ wa maũndũ ala me vo

Ngũsĩ sya Yeova

Kikamba

Yo Mũklĩsto no Etĩkĩle Kũiitwa?

Yo Mũklĩsto no Etĩkĩle Kũiitwa?

Ũndũ Mbivilia yaasya

Ĩĩ. Yesũ oonanisye kana aatĩĩi make nĩmaĩle kũiitwa ĩla waisye: “Ala mate awau mati vata wa mũiiti, ĩndĩ no ala awau.” (Mathayo 9:12) O na kũtw’ĩka Mbivilia ti ĩvuku ya ũiiti, yĩ na myolooto ĩtonya kũtetheesya ala me na wendi wa kũmwendeesya Ngai.

Makũlyo ala waĩle kwĩkũlya

1. Yo nĩnĩsĩ nesa ũiiti ũla ngũiitwa? Mbivilia ĩtwĩkĩaa vinya twĩke ũkunĩkĩli tũkwate ũvoo w’onthe nesa vandũ va ‘kwĩtĩkĩla kĩla ndeto.’—Nthimo 14:15.

2. Nĩnaĩle kũkũlya matakĩtalĩ angĩ woni woo ĩũlũ wa ũiiti ũsu? Kwĩthĩwa na “wingĩ wa atai” nĩ ũndũ wa vata na mũno mũno ethĩwa ũwaĩte ũwau mũthũku mũno.—Nthimo 15:22.

3. Ũiiti ũsu nũtonya kũtuma nĩtũla mwĩao wa Ngai ĩũlũ wa ‘kwĩvathana na nthakame’?—Meko ma Atũmwa 15:20.

4. Ũiiti ũsu nũkonanĩtye na maveva mavuku? Mbivilia nĩleanĩte na “ũoi.” (Akalatia 5:19-21) Nĩ kana ũmanye ethĩwa ũiiti mũna nũkonanĩtye na maveva mavuku ĩkũlye makũlyo aa:

  • Ũla ũkũkũiita etũmĩa vinya wa maveva mavuku?

  • Ũla ũkũkũiita aĩkĩĩaa kana ũwau ũsu wumanĩte na ũoi kana nĩ ngai ithatĩte?

  • Ve nthembo syĩkumw’a, kana ve syĩthĩo ingĩ ikonetye maveva mavuku ikwĩkwa ũiseũvĩw’a ndawa kana ũimĩnyw’a?

5. Nĩnĩthĩnĩkĩaa mũno ũima wakwa wa mwĩĩ? Mbivilia yaĩtye: “Wũmĩĩsyo wenyu ũmanyĩke nĩ andũ onthe.” (Avilivi 4:5) Wũmĩĩsyo ũkaũtetheesya ũatĩĩe “maũndũ ala maseo mbee,” kwa ngelekany’o, maũndũ ma kĩ-veva.—Avilivi 1:10; Mathayo 5:3.