Kĩla ũthi ũvoonĩ ũla wĩ vo

Kĩla ũthi nthĩnĩ wa ũvoo wa kelĩ wa maũndũ ala me vo

Ngũsĩ sya Yeova

Kikamba

Ndonya Kwĩka Ata Ĩla Neew’a ta Vate Mũndũ Ũkũũngana Nakwa?

Ndonya Kwĩka Ata Ĩla Neew’a ta Vate Mũndũ Ũkũũngana Nakwa?

Ũndũ ũtonya kwĩka

1. Sũanĩa ĩũlũ maũndũ ala wĩ na ũtonyi wa kwĩka. (2 Akolintho 11:6) O na kau nĩ ũseo kũmanya wĩ o mawonzu maku, wĩ o maũndũ ala ũtonya kwĩka nesa. Kũmanya nguma syaku nzeo nĩkũtonya kũũnenga ũkũmbaũ na kũituma ũvetanga mawoni mataĩle kwĩyelekela na ũyĩeka kwona ta vate mũndũ ũkũũngana naku. Ĩkũlye, ‘Nĩ maũndũ mekũ ndonya kwĩka nesa?’ Sũanĩa ĩũlũ wa nguma nzeo na ndaĩa nzeo syaku.

2. Endeew’a kuma ngoonĩ nĩ angĩ. Ambĩĩa kwendeew’a no andũ anini. “O ũndũ laisi ta kwenda o kũmanya andũ maendeee ata kana kũmakũlya ĩũlũ wa wĩa woo nĩũkũtetheesya kũmamanya nesa mũnango,” ou nĩw’o waĩtye mwanake ũmwe wĩtawa Jorge.

Waaka kĩao nũtonya kũlinda ĩtw’ĩku yĩla yĩkũaanĩtye na andũ angĩ ma mũika

Ũndũ ũtonya kwĩka: Ndũkaneenae tũ na andũ ma ũkũũ waku oka. Andũ amwe maĩ anyanya mawetetwe Mbivilianĩ maĩ na ũkũũ wĩ kĩvathũkany’o mũno. Amwe ma anyanya asu nĩ Luthi na Naomi, Ndaviti na Yonathani, na Timotheo na Vaulo. (Luthi 1:16, 17; 1 Samueli 18:1; 1 Akolintho 4:17) Ĩngĩ, lilikana kana ĩla ũkũneena na mũndũ ũngĩ no nginya ũkamwĩthukĩĩsya nake ayĩka o ta ũu. Kwoou, ti mũndũ ũmwe waĩle o kũneena ate kũnenga ũla ũngĩ mwanya wa kũneena. Andũ nĩmendete andũ ala mamethukĩĩasya. Kwoou, ethĩwa nĩwĩw’aa nthoni, manya kana ndwaĩle o kũneena ũte kwĩthukĩĩsya ala angĩ!

3. Ĩmanyĩsye ‘kwĩw’ĩa angĩ tei.(1 Vetelo 3:8) O na ethĩwa ndũkwĩtĩkĩlana na kĩla mũndũ ũla ũngĩ ũkũũtavya, ĩthĩwa na weteelo na ũyĩeka aneene. Endeew’a nĩ ũndũ ũla mũkwĩtĩkĩlana. Ethĩwa nũkwenda kũelesya woni waku ĩũlũ wa kĩla mũtekwĩtĩkĩlana, elesya ũu wĩ mũuu na kwa ũĩ.

Ũndũ ũtonya kwĩka: Ĩla ũũneena na angĩ, neena namo kwa nzĩa ĩla we ũkwenda maneene naku. Kũnyungunyĩsya vate kĩtumi kana kĩvũthya, kũthatya angĩ, kana kwona angĩ mataĩle, kũtumaa andũ mevathana naku. Makakwenda mũno ethĩwa ũkaatĩĩa ũtao ũũ waĩtye atĩĩ: “Ndeto syenyu syĩthĩwe na mumo mavinda onthe”Akolosai 4:6.