Kĩla ũthi ũvoonĩ ũla wĩ vo

Kĩla ũthi nthĩnĩ wa ũvoo wa kelĩ wa maũndũ ala me vo

Kĩla ũthi nthĩnĩ wa ũvoo ũla wĩ vo

Ngũsĩ sya Yeova

Kikamba

Manyĩsya Syana Syaku

 10

Yesũ Nĩwamwĩw’aa Ngai Kĩla Ĩvinda

Yesũ Nĩwamwĩw’aa Ngai Kĩla Ĩvinda

Nĩwĩthĩawa wĩ ũndũ wĩ laisi kũmew’a asyai maku?— Mavinda amwe ũyĩthĩawa wĩ ũndũ wĩ laisi. Nĩwĩsĩ kana Yesũ nĩweew’aa Yeova na asyai make?— Ngelekany’o yake nĩtonya ũkũtetheesya ũmew’e asyai maku o na ethĩwa kwĩka ũu ti ũndũ wĩ laisi. Eka twĩmanyĩsye maũndũ angĩ ĩũlũ wa ũndũ tũtonya kwĩthĩwa twĩ ewi.

Mbee wa kũka kũũ nthĩ, Yesũ ekalaa ĩtunĩ e na Ĩthe wake Yeova. Ĩndĩ ĩla waĩ vaa ĩũlũ wa nthĩ Yesũ aĩ na asyai meetawa Yosevu na Meli. Nĩwĩsĩ ũndũ Yosevu na Meli matw’ĩkie asyai ma Yesũ?—

Yeova nĩwathamisye thayũ wa Yesũ kuma ĩtunĩ na awĩkĩa ĩvunĩ ya Meli nĩ kana asyawe vaa ĩũlũ wa nthĩ. Kĩu kyaĩ kyama! Yesũ ekalile ĩvunĩ ya Meli o ta syana ila ingĩ. Ĩtina wa myei vakuvĩ kenda, Yesũ nĩwasyaiwe. Ũu nĩw’o Meli na mũũme wake Yosevu matw’ĩkie asyai ma Yesũ vaa ĩũlũ wa nthĩ.

Ĩla Yesũ waĩ na myaka 12, nĩweekie ũndũ ũmwe ũla woonanisye kana nĩwamwendete Ĩthe wake Yeova. Eekie ũndũ ũsu ĩla we na asyai make maendie Yelusaleme kwondũ wa sikũkũ ya Vasaka. Yelusaleme nĩ ndũa yaĩ kũasa mũno. Menũkĩte, Yosevu na Meli nĩmamũmanthie Yesũ aa. Nĩwĩsĩ aĩ va?—

Nĩkĩ Yesũ waĩ ĩkalũnĩ?

Yosevu na Meli nĩmasyokie na mĩtũkĩ Yelusaleme na mamũmantha Yesũ kĩla vandũ, na mayaamwona. Ũndũ ũsu nĩwamatelemilye mũno. Ĩndĩ ĩtina wa mĩthenya ĩtatũ, mamwĩthĩa ĩkalũnĩ! Nĩwĩsĩ nĩkĩ Yesũ waĩ ĩkalũnĩ?— Nũndũ vu aĩ atonya kwĩmanyĩsya ĩũlũ wa Ĩthe wake, Yeova. Nĩwamwendete Yeova na endaa emanyĩsye ũndũ ũtonya kũmũtanĩthya. Ĩla Yesũ weanie atw’ĩka mũndũ mũima, nĩwamwĩw’aa Yeova mavinda onthe. Nĩwamwĩw’aa o na ethĩwa kwĩka ũu waĩ ũndũ wĩ vinya, kana ũtonya kũtuma athĩna. Yesũ nĩwamew’aa asyai make, Yosevu na Meli?— Mbivilia yaĩtye nĩwamew’aa.

Ũtonya kwĩmanyĩsya kyaũ kumana na Yesũ?— Nĩwaĩle kũmew’a asyai maku o na ĩla ũte ũndũ wĩ laisi kwĩka ũu. Ũkamew’aa asyai maku?—

SOMA MBIVILIANĨ YAKU

  • Luka 1:30-35; 2:45-52

  • Aeveso 6:1

  • Aevelania 5:8