Kĩla ũthi ũvoonĩ ũla wĩ vo

Kĩla ũthi nthĩnĩ wa ũvoo wa kelĩ wa maũndũ ala me vo

Kĩla ũthi nthĩnĩ wa ũvoo ũla wĩ vo

Ngũsĩ sya Yeova

Kikamba

Manyĩsya Syana Syaku

 7

Waaĩthĩwa na Wia na Ũyona ta Vate Mũndũ Ũkwendete?

Waaĩthĩwa na Wia na Ũyona ta Vate Mũndũ Ũkwendete?

Kwasisya kamwana kaa ke visanĩ ũũ. Kailyĩ ta ke na wia na ta keona ta vate mũndũ ũkendete. Wĩona ata? We waaĩw’a ũu?— Mavinda angĩ ithyonthe nĩtwĩw’aa ũu. Mbivilia nĩwetete andũ amwe maĩ anyanyae ma Yeova ala maĩ na wia na moonaa ta vate mũndũ ũmendete. Ũmwe woo nĩ Eliya. Eka twĩmanyĩsye ĩũlũ wake.

Yeseveli endaa kũaa Eliya

Eliya ekalaa nthĩ ya Isilaeli tene mũno mbee wa Yesũ ate mũsyae. Mũsumbĩ wa nthĩ ĩsu eetawa Aavu na ndamũthaithaa Yeova, Ngai ũla wa w’o. Aavu na mũka wake Yeseveli mathaithaa ngai ya ũvũngũ yeetawa Mbaali. Ũndũ ũsu watumie Aisilaeli aingĩ mambĩĩa kũthaitha ngai ĩsu. Yeseveli aĩ mũthũku mũno na endaa kũaa athaithi onthe ma Yeova, o vamwe na Eliya! Nĩwĩsĩ ũndũ Eliya weekie?—

 Eliya nĩwasembie akĩa! Aendie kwĩvitha ngunganĩ, kũndũ kũasa vyũ na kũmũ. Wĩona nĩkĩ weekie ũu?— Nũndũ aĩ na wia. Ĩndĩ ndaaĩlĩte kwĩthĩwa na wia. Nĩkĩ? Nũndũ nĩweesĩ Yeova nũtonya kũmũtetheesya. Yeova nĩwamwonetye Eliya kana e vinya. Ĩvinda yĩmwe nĩwasũngĩie mboya ya Eliya kwa kũtũma mwaki kuma ĩtunĩ. Ũu wĩonany’a kana ĩvindanĩ yĩu Eliya wakĩĩte, Yeova aĩ atonya kũmũtetheesya.

Yeova amũtetheeisye Eliya ata

Ĩla Eliya waĩ ngunganĩ, Yeova nĩwaneenie nake na amũkũlya: ‘Wĩĩka ata vaa?’ Nake Eliya amũsũngĩa: ‘Katĩ wa athaithi maku no inyie nĩ weka ndiele. Vaiĩ mũndũ ũngĩ, na nĩngũkĩa kũawa.’ Eliya oonaa athaithi ala angĩ onthe ma Yeova ta mooaiwe. Ĩndĩ Yeova amwĩa: ‘Ũu ti w’o. Ve andũ angĩ 7,000 matiele ala manthaithaa. Ndũkethĩwe na wia. Ve wĩa ũngĩ ũtiele ngwenda ũtethye!’ Wĩona Eliya ta watanie ĩla weewie ũu?—

Ũtonya kwĩmanyĩsya kyaũ kumana na maũndũ ala mamũkwatie Eliya?— Ndwaĩle kwĩw’a wia na kwona ta vate mũndũ ũkwendete. Wĩ na anyanya makwendete na mamwendete Yeova. O na ĩngĩ, Yeova e vinya mwingĩ, na ĩvinda yonthe akaũtetheeasya! Nĩwatana kũmanya kana ve andũ makwendete?—

SOMA MBIVILIANĨ YAKU

  • 1 Asumbĩ 19:3-18

  • Savuli 145:18

  • 1 Vetelo 5:9