We nĩwonaa wĩ ũndũ wĩ vinya kwĩka maũndũ maseo?— Andũ aingĩ monaa ũndũ ũsu wĩ vinya. Mbivilia ĩtũtavĩtye kana ndwaĩ ũndũ wĩ laisi kwa kamwana keetawa Yosia kwĩka maũndũ maseo. Ĩndĩ, kaĩ na anyanya aseo ala makatetheeasya. Eka twĩmanyĩsye maũndũ angĩ ĩũlũ wa Yosia na anyanyae make.

Ĩthe wa Yosia eetawa Amoni na aĩ mũsumbĩ wa Yuta. Amoni aĩ mũndũ mũthũku mũno na athaithaa mĩvw’anano. Ĩla wakwie, Yosia nĩwe watw’ĩkie mũsumbĩ wa Yuta, e na ũkũũ wa myaka nyanya! Wĩona Yosia ta waĩ mũthũku ta ĩthe wake?— Aiee!

Nzevania nĩwamatavisye andũ maeke kũthaitha mĩvw’anano

Kuma e mũnini, Yosia nĩwendete kũmwĩw’a Yeova. Kwoou anyuvie andũ ala mamwendete Yeova methĩwe anyanyae make. Anyanyae asu make nĩmamũtetheeisye kwĩkaa maũndũ maseo. Amwe ma anyanyae asu ma Yosia maĩ aaũ?

Ũmwe wa anyanyae asu eetawa Nzevania. Nzevania aĩ mwathani, na nĩwatavasya andũ ma Yuta kana makakwatwa  nĩ maũndũ mathũku ethĩwa maikaeka kũthaitha mĩvw’anano. Yosia nĩwamwĩthukĩĩisye Nzevania na anyuva kũmũthaitha Yeova, ĩndĩ ti kũthaitha mĩvw’anano.

Yosia aĩ na mũnyanyae ũngĩ weetawa Yelemia. Elĩ masyaĩtwe vakuvĩ ĩvinda yĩmwe, na ĩla maĩ anini mĩsyĩ yoo nĩyathengeanĩe. Yosia na Yelemia nĩmendene mũno vyũ. Kwoou, ĩla Yosia wakwie Yelemia nĩwaandĩkie wathi waĩ mũseo ĩũlũ wa ũndũ weew’aa ĩtina wa Yosia akw’a. Yelemia na Yosia nĩmatetheanĩasya kwĩka maũndũ maseo na nĩmamwĩw’aa Yeova.

Yosia na Yelemia nĩmatetheanĩasya kwĩka maũndũ maseo

Nĩ kyaũ ũtonya kwĩmanyĩsya kumana na Yosia?— O na ĩla Yosia waĩ o kamwana, nĩwendaa kwĩka maũndũ ala maseo. Nĩweesĩ kana anyanyae make maaĩlĩte kwĩthĩwa me andũ mamwendete Yeova. Kwoou o naku no ũtate kũnyuva anyanya ala mamwendete Yeova, na ala matonya ũkũtetheesya wĩke maũndũ ala maseo!

SOMA MBIVILIANĨ YAKU

  • 2 Mavinda 33:21-25; 34:1, 2; 35:25