Kĩla ũthi ũvoonĩ ũla wĩ vo

Kĩla ũthi nthĩnĩ wa ũvoo ũla wĩ vo

Ngũsĩ sya Yeova

Nyuva kĩthyomo Kikamba

 2

Leveka Nĩwendaa Kũmũtanĩthya Yeova

Leveka Nĩwendaa Kũmũtanĩthya Yeova

Leveka aĩ mũndũ mũka wamwendete Yeova. Mũũme wake eetawa Isaka. Isaka o nake nĩwamwendete Yeova. Leveka amanyanie na Isaka ata? Leveka oonanisye ata kana nĩwendaa kũmũtanĩthya Yeova? Eka twĩmanyĩsye maũndũ angĩ ĩũlũ wa Leveka.

Isaka aĩ mwana wa Avalaamu na Sala. Mo mekalaa nthĩ ya Kanaani na andũ ma Kanaani mayamũthaithaa Yeova. Ĩndĩ, Avalaamu endaa mwana wake atwae mũndũ mũka ũmũthaithaa Yeova. Kwoou, nĩwamũtũmie mũthũkũmi wake akamũmanthĩe Isaka mũka vandũ veetawa Aalani, vala amwe ma andũ ma mũsyĩ wa Avalaamu mekalaa. Nĩvatonyeka mũthũkũmi ũla watũmiwe akethĩwa aĩ Elieseli.

Leveka nĩweeyumĩtye vyũ kũnyithya ngamĩle

Elieseli aendie Aalani na athũkũmi angĩ ma Avalaamu. Yaĩ savalĩ ndaasa mũno. Maendie na ngamĩle ĩkũmi ikuĩte lĩu na mĩthĩnzĩo. Elieseli esaa kũmanya ata mũndũ mũka ũla ũkũmũnyuvĩa Isaka? Ĩla Elieseli na athũkũmi asu mavikie Aalani, mambie kũũngama kĩthimanĩ nũndũ Elieseli nĩweesĩ kana andũ nĩmekũka kũuta kĩw’ũ. Kwoou amũvoya Yeova ayasya: ‘Mwĩĩtu ũla ngũmwĩa anenge kĩw’ũ na ayĩtĩkĩla kũnenga na aisyoka ainenge ngamĩle, ngamanya kana mwĩĩtu ũsu nĩwe ũnyuvĩte.’

Na ĩndĩ mwĩĩtu weetawa Leveka ooka kĩthimanĩ. Mbivilia yaĩtye kana Leveka aĩ  mwanake mũno. Elieseli amwĩtisye kĩw’ũ, nake Leveka amwĩa: ‘Nĩngũũtavĩla kĩw’ũ, na ndisyoka nĩnyithye ngamĩle syaku.’ Kwasũanĩa ũndũ ũsu! Ngamĩle syĩ na waũni inyusaa kĩw’ũ kingĩ mũno, na kwoou Leveka aaĩle kũsyokanĩsya kĩthimanĩ mavinda maingĩ mũno. Nũmwene vaa visanĩ ũndũ ũendee kũnenga ngamĩle kĩw’ũ na kĩthito?— Elieseli nĩwatanie mũno kwona ũndũ Yeova wasũngĩie mboya yake.

Elieseli nĩwamũnengie Leveka mĩthĩnzĩo mingĩ myanake. Nake Leveka amũthokya Elieseli e na athũkũmi ala angĩ maende kwoo mũsyĩ. Elieseli avika nĩwaeleisye kĩla kyatumie Avalaamu amũtũma ku Aalani na aelesya ũndũ Yeova wasũngĩie mboya yake. Andũ ma mũsyĩ wa Leveka nĩmatanie mũno, na meetĩkĩla Leveka atwawe nĩ Isaka.

Leveka nĩwaendie Kanaani vamwe na Elieseli na atwawa nĩ Isaka

Ĩndĩ wĩona ata: Leveka nĩwendaa kũtwawa nĩ Isaka?— Leveka nĩwamanyie kana Elieseli atũmĩtwe nĩ Yeova. Kwoou, ĩla andũ ma mũsyĩ mamũkũlilye Leveka kana nũkwenda kũthi akatwawe nĩ Isaka, Leveka nĩweetĩkĩlile na asya: ‘Ĩĩ nĩngũthi.’ Na o vu kwa vu aenda vamwe na Elieseli. Ĩla mavikie Kanaani, Leveka nĩwatwaiwe nĩ Isaka.

Yeova nĩwamũathimie Leveka nũndũ Leveka eekie ũndũ Yeova wendaa. Aathimiwe ata? Ĩtina wa myaka mingĩ, Yesũ nĩwasyaiwe nthĩnĩ wa mũsyĩ wake! O naku Yeova akakũathima weethĩwa ũilyĩ ta Leveka na wamũtanĩthya.

SOMA MBIVILIANĨ YAKU

  • Mwambĩlĩlyo 12:4, 5; 24:1-58, 67