Kĩla ũthi ũvoonĩ ũla wĩ vo

Kĩla ũthi nthĩnĩ wa ũvoo ũla wĩ vo

Ngũsĩ sya Yeova

Nyuva kĩthyomo Kikamba

 KĨLUNGU KYA 4

Kũthĩnĩka Nũndũ wa Naĩ Weekie—“Nthesya Naĩ Yakwa”

Kũthĩnĩka Nũndũ wa Naĩ Weekie—“Nthesya Naĩ Yakwa”

“Wĩa wakwa mweũ ũla nakwatie nĩwatumie mũsyĩ witũ wĩkala kĩlasi kĩ ĩũlangũ, ĩndĩ nĩwatumie nĩlikya maũndũnĩ mataĩlĩte. Nĩnambĩĩie kũtanĩaa sikũkũ, kwĩlikya siasanĩ, o na kũthi ĩkanisanĩ. Nĩnavoie, na kwa ĩvinda ya myaka 40 naeka kwĩthĩwa na kĩthito kĩla Ngũsĩ sya Yeova syaĩle kwĩthĩwa nakyo. O ũndũ ĩvinda yaendeeie na kũvĩtũka, now’o naendeeie kwona Yeova atesa kũndekea. O na neew’aa ndesa kwĩyĩekea. Neew’aa ũu nũndũ nĩneesĩ ũla w’o ndyĩlikya maũndũnĩ asu mataĩlĩte.”—Martha.

KŨTHĨNĨKA nũndũ wa naĩ weekie no kũkũũmĩsye vyũ. Mũsumbĩ Ndaviti aandĩkie ũũ: “Mothũku makwa mang’okele mũtwenĩ wakwa: o ta mũio mũito nĩngũemwa nĩ ũito wamo.” (Savuli 38:4) Aklĩsto amwe nĩmaemeewe nĩ woo mwingĩ mayona Yeova ndesa kũmaekea. (2 Akolintho 2:7) Yo nĩ w’o kana Yeova ndesa kũmaekea? O na ethĩwa wĩkĩte naĩ ngito ata, ũu nĩkwonany’a kana wĩvaasa mũno na Yeova ũkethĩa ndesa ũkũekea? Aiee, ũu ti w’o!

“Tũsũanĩe Vamwe”

Yeova ndatiaa ala melilaa nũndũ nĩmekĩte naĩ. Ũw’o nĩ kana nũmamanthaa mamũsyokee! Nthĩnĩ wa ĩla ngelekany’o ya mwana kĩmaamai, Yesũ aelekanĩtye Yeova na ĩthe wĩ wendo ũla mwana wake watiie mũsyĩ na athi kwĩlikya maũndũnĩ mathũku. Ĩtina wa ĩvinda mwana ũsu nĩwatwie kũsyoka mũsyĩ. Mbivilia yaĩtye, ‘Ĩndĩ e kũasa, ĩthe wake amwona, na eew’a ĩnee, asemba, amũkwatĩla ngingonĩ, na amũmumunya.’ (Luka 15:11-20) No wĩthĩwe wendaa kũmũthengeea Yeova ĩndĩ ũyĩthĩa wĩĩw’a wĩ o “kũasa” nake? Lilikana kana o ta ĩthe ũla ũwetetwe ngelekany’onĩ ya Yesũ, Yeova nũkwĩw’ĩaa tei na ĩnee. E na mea ma kũũthokya ũmũsyokee.

Nao nata ethĩwa wĩona naĩ syaku syĩ mbingĩ kana syĩ ngito ũkethĩa Yeova ndesa ũkũekea? Kwasũanĩa ĩũlũ wa ndeto ii sya Yeova syĩ ĩandĩkonĩ ya Isaia 1:18: “Ũkai yu, tũsũanĩe vamwe, easya ũu Yeova: o na ethĩwa naĩ syenyu nĩ ndune mũno, ikeethĩwa nzaũ ta ĩa.” Ĩĩ, o na naĩ ila twonaa tũtaekewa, Yeova no atũekee.

Yeova ndendaa ũtindĩe kũthĩnĩka nũndũ wa ĩvĩtyo weekie. Kwoou ũtonya kũtanĩa ata kũekewa naĩ nĩ Ngai, na kwĩthĩwa na wasya mũtheu wa ngoo? Kwasũanĩa ĩũlũ wa matambya elĩ Mũsumbĩ Ndaviti woosie. Mbee, aisye atĩĩ: “Nĩngũmumbũlĩla Yeova mavĩtyo makwa.” (Savuli 32:5) Lilikana kana Yeova nũkũthoketye ũmũvikĩae mboyanĩ na ‘kũsũanĩa’ vamwe nake. Ndũkalee aikũthokya. Mumbũlĩle Yeova naĩ syaku na ũimũelesya ũndũ ũkwĩw’a. Kumana na maũndũ ala mamũkwatie Ndaviti aĩ atonya kũvoya ũũ na ũkũmbaũ: “Nthesya naĩ yakwa. . . . Ngoo ĩla ndũlĩku na yĩ na wĩlilo, we Ngai, ndũkamĩvũthya.”—Savuli 51:2, 17.

Kelĩ, Ndaviti nĩwatetheeiw’e nĩ mwathani Nathani, ũla wanyuvĩtwe nĩ Yeova. (2 Samueli 12:13) Ũmũnthĩ Yeova nũnenganĩte atumĩa ma kĩkundi ala mamanyĩĩtw’e kũtetheesya andũ ala meelila ĩtina wa kwĩka naĩ, nĩ kana matũngĩĩe  ngwatanĩo yoo na Yeova. Ĩla wĩthi kwona atumĩa ma kĩkundi, makatũmĩa Maandĩko na maivoya mboya itonya kũkiakisya ngoo yaku, ikaolanga woo ũla ũkwĩw’a, kana ikavetanga woo ũsu vyũ na iũtetheesya kũkwata vinya kĩ-veva.—Yakovo 5:14-16.

Yeova endaa ũtanĩe kwĩthĩwa na wasya mũtheu wa ngoo

“Kũathimwa Nĩ Mũndũ Ũla Ũekewe Ĩvĩtyo Yake”

Ũw’o nĩ kana no wĩw’e kũmũelesya Yeova Ngai naĩ syaku na kũmavikĩa atumĩa ne ũmwe katĩ wa maũndũ ala me vinya vyũ. Vate nzika, Ndaviti eew’aa o taku. Ambie ‘kũvindya’ o kwa ĩvinda ĩũlũ wa naĩ syake. (Savuli 32:3) Ĩndĩ ĩtina nĩwesie kwona ũseo wa kwĩthĩwa aumbũlile naĩ syake na alũnga mwĩkalĩle wake.

Ũathimo ũmwe mũnene Ndaviti wakwatie nĩkwĩthĩwa na ũtanu ĩngĩ. Aandĩkie ũũ: “Kũathimwa nĩ mũndũ ũla ũekewe ĩvĩtyo yake, ũla naĩ yake ĩvw’ĩkĩtwe.” (Savuli 32:1) O na ĩngĩ avoyie atĩĩ: ‘Ame Mwĩaĩi, tumũkany’a ilomo syakwa; na kanyw’a wakwa ũkoonany’a ndaĩa syaku.’ (Savuli 51:15) Ĩla Ndaviti waekie kũthĩnĩka ngoonĩ nũndũ wa naĩ syake na oona ũekeo wa Ngai wĩ wa vata, maũndũ asu nĩmatumie atavya angĩ ĩũlũ wa Yeova.

Yeova endaa ũtanĩe kwĩthĩwa na wasya mũtheu wa ngoo. Na endaa ũtavye angĩ ĩũlũ wake na ieleelo syake, ũte kũthĩnĩka nũndũ wa mavĩtyo weekie, ĩndĩ wĩ mũtanu na kuma ngoonĩ. (Savuli 65:1-4) Lilikana kana nũkũthoketye nĩ kana ‘naĩ syaku syanangwe, na nĩ kana kũtonye kũka mavinda ma ũvuũkyo kuma ũthyũnĩ wa Mwĩaĩi.’—Meko ma Atũmwa 3:19.

Ũu nĩw’o veethĩiwe kwa Martha. Aĩtye atĩĩ: “Mwanawa nĩwandũmĩaa makaseti ma Mũsyaĩĩsya na Amkeni! O ũndũ ĩvinda yaendeee na kũvĩtũka, now’o naendeee kũmũsyokea Yeova. Ĩndĩ ũndũ ũla waĩ vinya vyũ waĩ kwĩtya ũekeo kwondũ wa mavĩtyo makwa. Ĩndĩ ĩtina nĩnavoyie Ngai andekee. Ti ũndũ wĩ laisi kũĩkĩĩa kana naminie myaka 40 ndamũsyokea Yeova. Ngelekany’o yakwa yĩonany’a kana mũndũ no akwate mwanya wa kũmũthũkũma Yeova ĩngĩ na kwĩkala wendonĩ wake, o na ethĩwa nĩ ĩtina wa myaka mingĩ.”