Kĩla ũthi ũvoonĩ ũla wĩ vo

Kĩla ũthi nthĩnĩ wa ũvoo wa kelĩ wa maũndũ ala me vo

Kĩla ũthi nthĩnĩ wa ũvoo ũla wĩ vo

Ngũsĩ sya Yeova

Kikamba

Mũsyĩ Waku No Wĩthĩwe na Ũtanu

 Kĩlungu Kya 9

Mũthaithe Yeova wĩ na andũ ma mũsyĩ waku

Mũthaithe Yeova wĩ na andũ ma mũsyĩ waku

“Mũthaithei ũla wombie ĩtu na nthĩ.”—Ũvuan’yo 14:7

Kwĩanana na ũndũ twĩmanyĩĩtye kavukunĩ kaa, nĩtwonete kana Mbivilia yĩ na myolooto ĩtonya ũkũtetheesya vamwe na mũsyĩ waku. Yeova endaa wĩthĩwe na ũtanu. Atwathĩte kana twavĩtya mbee ũthaithi wake, syĩndũ ila ingĩ ‘syonthe tũkongeleelwa.’ (Mathayo 6:33) Endaa twĩthĩwe twĩ anyanyae make. Tũmĩa mwanya ũla wakwata nĩ kana ũlũlũmĩĩlye ũnyanya waku na Ngai. Ũsu nĩw’o ũndũ ũla wa vata vyũ mũndũ ũtonya kwĩka.—Mathayo 22:37, 38.

 1 LŨLŨMĨĨLYAI NGWATANĨO YENYU NA YEOVA

ŨNDŨ MBIVILIA YAĨTYE: “Ngeethĩwa ĩthe wenyu, na inyw’ĩ mũkeethĩwa ana makwa, aũme na eĩtu, eneena ũu Mwĩaĩi.” (2 Akolintho 6:18) Ngai endaa wĩthĩwe wĩ mũnyanyae. Kũvoya nĩ nzĩa ĩmwe ya kũũtetheesya wĩthĩwe mũnyanyae wa Ngai. Yeova atwĩĩte ‘tũmũvoyae tũte kũeka.’ (1 Athesalonika 5:17) Nĩwĩthĩawa eyũmbanĩtye kũtwĩthukĩĩsya ĩla tũũmũtavya maũndũ ala meũtũthĩny’a ngoonĩ sitũ. (Avilivi 4:6) Ĩla wavoya na andũ ma mũsyĩ waku, nĩmamanyaa kana Ngai nĩ mũnyanyau.

Ũndũ ũngĩ waĩlĩte kwĩka nĩ kũmwĩthukĩĩsya Ngai. Ũtonya kwĩka ũu kwa kwĩmanyĩsya Ndeto yake na mavuku ala maeleetye Mbivilia. (Savuli 1:1, 2) Sũanĩĩa mũno kĩla weemanyĩsya. (Savuli 77:11, 12) O na ĩngĩ, nĩ kana tũmwĩthukĩĩsye Ngai, no nginya tũthi maũmbanonĩ ma Kĩklĩsto tũteũtĩĩa.—Savuli 122:1-4.

Kũneena na andũ ala angĩ ĩũlũ wa Yeova nĩ nzĩa ĩngĩ ya vata ya kũlũlũmĩĩlya ũnyanya witũ nake. O ũndũ waendeea kwĩka ũu, now’o ũnyanya waku na Yeova ũendeeaa kwĩthĩwa wĩ mũlũmu.—Mathayo 28:19, 20.

ŨNDŨ MŨTONYA KWĨKA:

  • Manthai ĩvinda ya kũvoya na kũsoma Mbivilia kĩla mũthenya

  • Ekai maũndũ ma kĩ-veva methĩwe ne mo mavata vyũ nthĩnĩ wa mũsyĩ wenyu kwĩ maũndũ ma kwĩtanĩthya

2 TANĨAI ŨTHAITHI WA MŨSYĨ

ŨNDŨ MBIVILIA YAĨTYE: “Mũthengeei Ngai, nake akamũthengeea inyw’ĩ.” (Yakovo 4:8) Mwaĩle kwĩthĩwa na mĩvango mĩseo ya ũthaithi wa mũsyĩ, na mũimĩatĩĩaa kĩla ĩvinda. (Mwambĩlĩlyo 18:19) Ĩndĩ kwĩthĩwa na mĩvango kũitoetye. No nginya mũmwĩkwatye Ngai ĩvinda yonthe. Wĩ mũtwe wa mũsyĩ nĩwaĩle kũtetheesya andũ maku methĩwe na ngwatanĩo nzeo na Ngai. Ũtonya kwĩka ũu ata? Ũtonya kwĩka ũu kwa kũneenaa ĩũlũ wa Ngai “yĩla ũilyĩ nyũmbanĩ yaku, na yĩla ũendaa nzĩanĩ, na yĩla ũkomaa, na yĩla wũkĩlaa.” (Kũtũngĩlĩlwa Kwa Mĩao 6:6, 7) Tata ũndũ ũtonya wĩke ta Yosua, ũla waisye atĩĩ: “Ũndũ wakwa na nyũmba yakwa, tũkathũkũmaa Yeova.”—Yosua 24:15.

ŨNDŨ ŨTONYA KWĨKA:

  • Ĩthĩwa na mũvango ũte kũalyũkanga wa kwĩmanyĩsya Mbivilia na andũ ma mũsyĩ waku. Mũvango ũsu waĩle kwĩthĩwa ũtonya kwĩanĩsya mavata ma kĩla ũmwe wa mũsyĩ