“We ũla wamombie mbee, amombie mũndũ mũũme na mũndũ mũka.”Mathayo 19:4

Yeova * Ngai nĩwe wakwatanisye andũ elĩ ma mbee nthĩnĩ wa mũtwaano. Mbivilia yaĩtye kana amina kũmba mũndũ mũka wa mbee ‘nĩwamũtwaĩie’ Atamu. Ĩla Atamu wamwonie nĩweewie mũyo mwingĩ mũno na asya: “Ũũ yu nĩ ĩvĩndĩ ya mavĩndĩ makwa, na nyama ya mwĩĩ wakwa.” (Mwambĩlĩlyo 2:22, 23) O ta ũu, Yeova endaa andũ ala matwaanĩte methĩwe na ũtanu.

Ĩla watwaana kana watwawa nũtonya kũsũanĩa kana maũndũ makeethĩawa me o maseo kĩla ĩvinda. Ĩndĩ lilikana kana o na ethĩwa andũ ala matwaanĩte mendanĩte ata, mailea kũkwatwa nĩ mathĩna mana. (1 Akolintho 7:28) Nthĩnĩ wa kavuku kaa nũũkwata myolooto ya Mbivilianĩ ĩla ĩtonya kũũtetheesya wĩthĩwe na ũtanu nthĩnĩ wa mũtwaano waku wamĩatĩĩa.—Savuli 19:8-11.

 1 ĨTĨKĨLA KĨANDA KĨLA YEOVA ŨKŨNENGETE

ŨNDŨ MBIVILIA YAĨTYE: Mũndũũme nĩwe mũtwe wa mũsyĩ.—Aeveso 5:23.

Ethĩwa wĩ na kĩveti, Yeova endaa ũkyony’e wendo na ũikĩsũvĩa. (1 Vetelo 3:7) Akyũmbie kĩthĩwe mũtetheesya waku, na endaa wĩthĩwe ũkyendete na kũkĩnenga ndaĩa. (Mwambĩlĩlyo 2:18) Waĩle kwenda kĩveti kyaku mũno ũkethĩa mawendi makyo nĩmo ma vata mũno kwaku kwĩ ala maku mwene.—Aeveso 5:25-29.

Ethĩwa wĩ mũtwae, Yeova endaa ũnenge mũũme waku ndaĩa nene, na ũimũtetheesya eanĩsye kĩanda kyake. (1 Akolintho 11:3; Aeveso 5:33) Ĩtĩkĩla motwi make, na ũimũkwata mbau na ngoo yonthe nthĩnĩ wa kũmeanĩsya. (Akolosai 3:18) Weeka ũu ũkamwendeesya mũno Yeova, o na mũũme waku.—1 Vetelo 3:1-6.

ŨNDŨ ŨTONYA KWĨKA:

  • Kũlya mũndũ ũla ũtwaanĩte nake ũndũ ũtonya kwĩka nĩ kana wĩthĩwe mũũme kana kĩveti kĩseo. Mwĩthukĩĩsye nesa, na ũitata ũndũ ũtonya waĩlye vala ũkwona ve na thĩna

  • Ĩthĩwa na wũmĩĩsyo nũndũ nĩvendaa ĩvinda kũmanya kĩla kĩtonya kũmũtanĩthya mũndũ ũla ũtwaanĩte nake

2 SŨANĨA MŨNO ŨNDŨ ŨLA ŨTWAANĨTE NAKE ŨKWĨW’A

ŨNDŨ MBIVILIA YAĨTYE: Ethĩwa wĩ mũtwae kana nũtwaanĩte, nĩwaĩle kũsũanĩa ĩũlũ wa mavata ma mũũme waku kana ma kĩveti kyaku, ĩndĩ ti o ala maku oka. (1 Akolintho 10:24) Waĩle kũmwona mũndũ ũla ũtwaanĩte nake e wa vata mũno na ũililikana kana Yeova endaa athũkũmi make methĩwe ‘me auu kwa andũ onthe.’ (2 Timotheo 2:24) Mbivilia yaĩtye: “Ve ũla ũneenaa mĩtũkĩ ateũsũanĩa ta kũtonyanga kwa ũvyũ; ĩndĩ ũĩmĩ wa ũla mũĩ nũvoasya.” Kwoou ĩla ũũneena nĩwaĩle kũnyuva nesa ndeto ila ũũtũmĩa. (Nthimo 12:18) Veva wa Yeova ũkaũtetheesya wĩthĩwe na tei na wendo ĩla ũũneena.—Akalatia 5:22, 23; Akolosai 4:6.

ŨNDŨ ŨTONYA KWĨKA:

  • Mbee wa mũtananeenea maũndũ maito, voya Yeova aũtetheesye wĩthĩwe wĩ mũuu, na wĩyũmbanĩtye kũmwĩthukĩĩsya mũũme kana kĩveti kyaku

  • Sũanĩa mũno ndeto ila ũũneena na ũndũ ũkũineena

 3 SŨANĨAI MAŨNDŨ MWĨ NGWATANĨO

ŨNDŨ MBIVILIA YAĨTYE: Ĩla mwatwaana, mũtw’ĩkaa “mwĩĩ ũmwe.” (Mathayo 19:5) O na vailyĩ ũu, mwĩthĩawa mwĩ andũ elĩ me kĩvathũkany’o, na nĩvatonyeka mũkethĩwa na mawoni me kĩvathũkany’o. Kwoou, nĩmwaĩle kwĩmanyĩsya kwĩthĩwa mwĩ na ngwatanĩo nthĩnĩ wa mosũanĩo na mawoni menyu. (Avilivi 2:2) Kwa ngelekany’o, ĩla mũkwĩka motwi, nĩ ũndũ wa vata mũno kwĩthĩwa na ngwatanĩo. Mbivilia yaĩtye: “Kĩla ũsũanĩo ũlũlũmĩlaw’a nĩ ũtao [kana, “kũoany’a maũndũ,” NWT].” (Nthimo 20:18) Ĩla mũkwĩka motwi ma vata,ekai myolooto ya Mbivilia ĩmũtongoesye.—Nthimo 8:32, 33.

ŨNDŨ ŨTONYA KWĨKA:

  • O vamwe na kũmũelesya ũla ũtwaanĩte nake mawoni maku na maũndũ angĩ, tata ũmũelesye ũndũ we mwene ũkwĩw’a

  • Mbee wa ũtanatw’a kwĩka ũndũ, nũseo ũkaoany’a na ũla ũtwaanĩte nake

^ kal. 4 Mbivilia yonanĩtye kana ĩsyĩtwa ya Ngai nĩ Yeova.