Kĩla ũthi ũvoonĩ ũla wĩ vo

Kĩla ũthi nthĩnĩ wa ũvoo wa kelĩ wa maũndũ ala me vo

Kĩla ũthi nthĩnĩ wa ũvoo ũla wĩ vo

Ngũsĩ sya Yeova

Kikamba

Mũsyĩ Waku No Wĩthĩwe na Ũtanu

 Kĩlungu Kya 4

Ũndũ Mũtonya Kũtũmĩa Mbesa

Ũndũ Mũtonya Kũtũmĩa Mbesa

“Kĩla ũsũanĩo ũlũlũmĩlaw’a nĩ ũtao [kana, “kũoany’a maũndũ,” NWT].”Nthimo 20:18

Ithyonthe nĩtwendaa kwĩthĩwa na mbesa nĩ kana twĩanĩsye mavata ma andũ ma mũsyĩ. (Nthimo 30:8) Ũsu nĩ ũndũ waĩle nũndũ “mbesa nĩ ũsũvĩo.” (Mũtavan’ya 7:12) Nĩvatonyeka mũndũ na mũka makew’a ne ũndũ wĩ vinya kũneenea maũndũ ma mbesa, ĩndĩ mayaĩle kwĩtĩkĩla mbesa iete thĩna mũtwaanonĩ woo. (Aeveso 4:32) Andũ ala matwaanĩte maĩle kwĩthĩwa maĩkĩanĩe, na me na ngwatanĩo ĩla meũvanga ũndũ meũtũmĩa mbesa syoo.

 1 VANGAI MAŨNDŨ NESA

ŨNDŨ MBIVILIA YAĨTYE: “Nũũ kwenyu, akyenda kwaka nyũmba yĩ mũnyoolo ũtambaa kwĩkala nthĩ na kũtala mbesa sya kũmyakĩthya, nĩ kana amanye ethĩwa e nasyo sya kũmĩmina?” (Luka 14:28) Nĩ ũndũ wa vata mũno kũvanga mwĩ vamwe ũndũ mũũtũmĩa mbesa syenyu. (Amosi 3:3) Nũseo mũkew’ana kĩla mũkwenda kũũa, na mũisisya kana mwĩ na mbesa sianĩtye. (Nthimo 31:16) Ĩndĩ o na ũu wĩ o vo, ti lasima mũũe kĩndũ, nĩ aĩ nũndũ mwĩ na mbesa. Tatai mũikethĩwe na makoani. Thooai syĩndũ kwĩanana na mbesa ila mwĩ nasyo.—Nthimo 21:5; 22:7.

ŨNDŨ MŨTONYA KWĨKA:

  • Ethĩwa mwĩ na mbesa itiele mũthya wa mwei, vangai ũndũ mũkũitũmĩa

  • Ethĩwa ngalama syenyu nivĩtũkĩte mbesa ila mwĩ nasyo, ĩkai mĩvango mũolange ngalama syenyu. Kwa ngelekany’o, nĩmũtonya kũya mũsyĩ vandũ va kũya mũkaawanĩ

 2 NEENAI MŨTEŨVITHANA KĨNDŨ NA MŨYĨTHĨWA NA MAWONI MAĨLE

ŨNDŨ MBIVILIA YAĨTYE: “Kwondũ wa ũu, mũkĩveta ũvũngũ, neenai w’o kĩla mũndũ na ũla ũngĩ: nĩkwĩthĩwa twĩ mamutha ene kwa ene.” (Aeveso 4:25) Ndũkamũvithe ũla ũtwaanĩte nake mbesa ila ũkwataa na ũndũ itũmĩkaa.

Nũseo kĩla ĩvinda ũkasũanĩaa vamwe na ũla ũtwaanĩte nake ũtanamba kwĩka motwi manene makonetye mbesa. (Nthimo 13:10) Kũea ngewa ĩũlũ wa ũndũ mũtonya kũtũmĩa mbesa syenyu nĩkũtonya kũmũtetheesya mũkethĩwa na mũuo mũtwaanonĩ wenyu. Ndwaĩle kwona mbesa ila ũkwataa ta syaku wĩ weka. Ĩndĩ waĩle kũmanya nĩ syenyu inyw’onthe.—1 Timotheo 5:8.

ŨNDŨ MŨTONYA KWĨKA:

  • Ĩw’anai mbesa ila kĩla ũmwe wenyu ũtonya kũtũmĩa maũndũnĩ make ateũkũlya ũla ũngĩ

  • Mũiketeele mwĩsae kũea ngewa ya mbesa o ĩla thĩna waumĩla