“Ala Ngai ũlũmanĩtye, mũndũ ndakamataan’ye.”Maliko 10:9

Yeova endaa twĩthĩwe ‘twendete ũseo [kana, “ũĩkĩĩku,” NWT].’ (Mika 6:8) Ũĩkĩĩku nĩ wa vata nthĩnĩ wa mũtwaano nũndũ weethĩwa ũte vo, mũndũ akeethĩawa na nzika na ũla ũngĩ. Kwoou, nĩ kana ala matwaanĩte methĩwe mendanĩte, no nginya methĩwe maĩkĩanĩe vyũ.

Ũmũnthĩ andũ aingĩ ala matwaanĩte mayĩĩkĩanĩaa. Nĩ kana wĩthĩwe ũĩkĩanĩe na ũla ũtwaanĩte nake no nginya wĩke maũndũ aa elĩ:

 1 KWONA MŨTWAANO WAKU NE KĨNDŨ KYA VATA MŨNO

ŨNDŨ MBIVILIA YAĨTYE: ‘Metĩkĩlei maũndũ ala maseo mbee.’ (Avilivi 1:10) Mũtwaano waku nĩ ũmwe katĩ wa maũndũ ala maseo, kana ma vata vyũ thayũnĩ waku. Kwoou, nĩwaĩle kũwosa kwa ũito.

Yeova endaa wĩthĩwe ũimũsũanĩĩa mũno ũla ũtwaanĩte nake ‘mũyĩkalany’a na ũtanu.’ (Mũtavan’ya 9:9) Nĩwonanĩtye nesa kana waĩle kwĩthĩwa ũithĩnĩkĩa ũla ũtwaanĩte nake, na ũtonya kwĩka ũu kwa kũtata kwĩka maũndũ ala matonya kũmũtanĩthya. (1 Akolintho 10:24) Nũseo mũndũ ũla ũtwaanĩte nake akamanya kana nũmwonaa e wa vata kwaku.

ŨNDŨ ŨTONYA KWĨKA:

  • Ethĩwa nũtwaanĩte kana wĩmũtwae, tata mũno ũtũmĩe ĩvinda yĩanĩtye vamwe na mũũme waku kana kĩveti kyaku, na ndũketĩkĩle kĩndũ o na kĩmwe kĩtume mũteka ũu

  • Ndũkethĩwe ũisũanĩa ĩũlũ waku o we mwene, ĩndĩ ĩthĩwa ũisũanĩa ĩũlũ wa andũ elĩ, we na ũla ũtwaanĩte nake

 2 SŨVĨA NGOO YAKU

ŨNDŨ MBIVILIA YAĨTYE: “Kĩla mũndũ ũsyaasya mũndũ mũka na kũmwĩw’ĩa mũmeo nĩweka ũlaalai nake ngoonĩ yake.” (Mathayo 5:28) Kwoou, ethĩwa mũndũ asũanĩaa maũndũ mathũku, no twasye kana ti mũĩkĩĩku kwa kĩveti kyake kana mũũme wake.

Yeova aĩtye kana nĩwaĩle ‘kũsũvĩa ngoo yaku.’ (Nthimo 4:23, The Holy Bible in Current Kikamba Language; Yelemia 17:9) Nĩ kana wĩke ũu, no nginya ũsũvĩe metho maku. (Mathayo 5:29, 30) Atĩĩa ngelekany’o ya Yovu, ũla watianĩe ũtianĩo na metho make ndakaasisye mũndũ mũka ũngĩ e na wendi mũthũku. (Yovu 31:1) Ndũketĩkĩle o na vanini kũsisya visa kana kũsoma ũvoo ũkonetye ũlaalai. Tw’a vyũ kuma ngoonĩ ndũkese kwĩthĩwa ũyendeew’a nĩ mũndũ ũtatwaanĩte nake.

ŨNDŨ ŨTONYA KWĨKA:

  • Eka ala angĩ mamanye nesa kana nũlũmanĩtye vyũ na ũla ũtwaanĩte nake

  • Endeew’a nĩ kũmanya ũndũ ũla ũtwaanĩte nake ũkwĩw’a, na ũitila ũnyanya o na wĩva ũla ũtonya kũtuma ew’a ate mwĩanĩe