Kĩla ũthi ũvoonĩ ũla wĩ vo

Kĩla ũthi nthĩnĩ wa ũvoo wa kelĩ wa maũndũ ala me vo

Kĩla ũthi nthĩnĩ wa ũvoo ũla wĩ vo

Ngũsĩ sya Yeova

Kikamba

Mũsyĩ Waku No Wĩthĩwe na Ũtanu

 Kĩlungu Kya 5

Ũndũ Ũtonya Kwĩkalany’a na Mũuo Vamwe na Andũ ma Mũsyĩ

Ũndũ Ũtonya Kwĩkalany’a na Mũuo Vamwe na Andũ ma Mũsyĩ

“Ĩvw’ĩkei ngoo . . . ya kwĩw’anĩa tei, wĩnyivyo, ũuu, wũmĩĩsyo.”Akolosai 3:12

Mũtwaano wĩthĩawa new’o mwambĩlĩĩlyo wa mũsyĩ, na ũla ũtwaanĩte nake nĩwe waĩle kwĩthĩwa e mũndũ wa vata mũno kwaku. Ĩndĩ ũu ti kwasya kana ndũkethĩawa ũimenda na kũmanenga asyai maku ndaĩa. Nũtonya kwĩthĩwa wĩ ũndũ wĩ vinya kwa andũ amwe ma mũsyĩ kwĩtĩkĩla kana ũla ũtwaanĩte nake nĩwe mũndũ ũla wa vata vyũ kwaku. Ĩndĩ myolooto ya Mbivilia nĩtonya kũũtetheesya ũkamanya ũndũ waĩle kwĩka nĩ kana wĩthĩwe na mũuo na andũ asu ma mũsyĩ, o ũendeee kũlũlũmĩĩlya ngwatanĩo yaku vamwe na ũla ũtwaanĩte nake na syana syenyu.

 1 ĨTHĨWA NA WONI ŨLA WAĨLĨTE ĨŨLŨ WA ANDŨ MENYU MA MŨSYĨ

ŨNDŨ MBIVILIA YAĨTYE: “Taĩa au na mwenyu.” (Aeveso 6:2) O na ethĩwa wĩ na ũkũũ wĩana ata, no nginya ĩvinda yonthe ũmanengae ndaĩa asyai maku. O na ĩngĩ manya kana mũndũ ũla ũtwaanĩte nake e na asyai, na nĩwaĩle kũmathĩnĩkĩa. Mbivilia yaĩtye kana ‘wendo ndwĩ kĩwĩu,’ kwoou ndũkethĩwe na wia, ũisũanĩa kana ngwatanĩo yaku na mũndũ ũla ũtwaanĩte nake nĩtonya kwanangwa nĩ ũndũ ta ũsu.—1 Akolintho 13:4; Akalatia 5:26.

ŨNDŨ ŨTONYA KWĨKA:

  • Ti ũseo kũtũmĩa ndeto ta, “Andũ menyu mainengae ndaĩa o na vanini,” kana “Inyia waku ndendeeaw’a nongi nĩ maũndũ ala nĩkaa”

  • Tata wone maũndũ ũndũ mũndũ ũla ũtwaanĩte nake ũmonaa

 2 TW’A MAŨNDŨ KWA ŨLŨMU ĨLA VE VATA WA KWĨKA ŨU

ŨNDŨ MBIVILIA YAĨTYE: “Mũndũ mũũme akatia ĩthe na nyinyia, na akalũmany’a na mũka wake: nao makeethĩwa mwĩĩ ũmwe.” (Mwambĩlĩlyo 2:24) Ĩla watwaana kana watwawa, asyai maku nĩmatonya kwĩw’a maĩle ũkũtongoesya maũndũnĩ mana, na nĩvatonyeka makenda kũmwĩyĩaĩa ũndũ mũkwĩka.

We na ũla ũtwaanĩte nake nĩmwaĩle kwĩtĩkĩlana nĩ maũndũ meva asyai mataĩle kũlikĩlĩĩla, na ĩndĩ mũimaelesya maũndũ asu kwa nzĩa nzeo. Nĩmũtonya kũmaelesya kĩla kĩndũ nesa mũteũmony’a kĩvũthya. (Nthimo 15:1) Mweethĩwa na wĩnyivyo, ũuu, na wũmĩĩsyo, mũkeethĩwa na ngwatanĩo ndũmu na andũ ma mũsyĩ, na mũiendeea ‘kũmĩanĩsya inyw’ĩ kwa inyw’ĩ nthĩnĩ wa wendo.’—Aeveso 4:2.

ŨNDŨ ŨTONYA KWĨKA:

  • Ethĩwa nũũthĩnĩka nĩ ũndũ andũ ma mũsyĩ malikĩlĩĩle mũsyĩ waku, mantha ĩvinda yĩla yaĩlĩte mũneenee ũndũ ũsu wĩ na mũũme waku kana kĩveti kyaku

  • Ĩw’ana na mũũme waku kana kĩveti kyaku ĩũlũ wa ũndũ mũtonya kũthĩnĩkĩa ũndũ ũsu