Kĩla ũthi ũvoonĩ ũla wĩ vo

Kĩla ũthi nthĩnĩ wa ũvoo wa kelĩ wa maũndũ ala me vo

Ngũsĩ sya Yeova

Kikamba

We Nowende Kũmanya Ũla W’o?

We Nowende Kũmanya Ũla W’o?

ŨLA w’o ĩũlũ wa kyaũ? Ĩũlũ wa makũlyo amwe ma vata andũ matwĩe makũlasya. No wĩthĩwe ũseng’aw’a nĩ makũlyo amwe ta aa:

  • We Ngai nũtũthĩnĩkĩaa?
  • Kaũ na mathĩna ikathela?
  • Kwĩthĩawa ata yĩla twakw’a?
  • Ve wĩkwatyo kwa ala akw’ũ?
  • Ndonya kũvoya ata nĩw’ĩke nĩ Ngai?
  • Ndonya kwĩthĩwa na ũtanu ata?

Mosũngĩo ma makũlyo asu ũtonya kũmakwata va? Wakũlya andũ me kĩvathũkany’o, ũkwataa mosũngĩo me kĩvathũkany’o. O na ũkakũlya andũ ala maendaa makanisanĩ kana atongoi ma ndĩni, ũkwata o mosũngĩo meũleana. Mosũngĩo amwe monekaa ta maĩlĩte ĩndĩ ĩtina wa kavinda kanini andũ mayĩthĩa maitethya.

Ĩndĩ ve ĩvuku yĩmwe yĩ mosũngĩo ma kwĩkwatw’a. Ĩvuku yĩtawetaa ũvũngũ. Yesũ Klĩsto aivoya Ngai amwĩie: “Ndeto yaku nĩyo w’o.” (Yoana 17:17) Ũmũnthĩ Ndeto ĩsu nĩ Mbivilia. Ũvoonĩ ũũ ũatĩĩe nũũkwata mosũngĩo ma w’o ma makũlyo asu kwa ũkuvĩ kuma Mbivilianĩ.

We Ngai Nũtũthĩnĩkĩaa?

Mũndũũme ũthyũlũlũkĩtwe nĩ andũ aingĩ

NĨKĨ ANDŨ MAKŨLASYA ĨKŨLYO YĨU?: Nthĩ ĩno tũĩ yusũĩte ũng’endu na sila ũte wa katĩ. Ndĩni mbingĩ imanyĩasya kana nĩ kwenda kwa Ngai tũthĩnae.

KĨLA MBIVILIA ĨMANYĨASYA: Ngai ndaetae ũthũku. Ĩandĩko ya Yovu 34:10 yaĩtye: “Nĩkwĩthĩwe kũasa na Ngai, atĩ eke ũthũku, na kũasa na Mwene Vinya W’onthe, atĩ eke naĩ!” Ngai e na kĩeleelo kyonanĩtye wendo kwa andũ. Nĩkyo kĩtumi Yesũ watũmanyĩisye tũvoyae atĩĩ: “Asa waitũ ũla wĩ ĩtunĩ…ũsumbĩ waku wũke. Kwenda kwaku kwĩke kũũ nthĩ o ta kũya ĩtunĩ.” (Mathayo 6:9, 10) Ngai atũthĩnĩkĩaa mũno vyũ, nĩkyo kĩtumi wĩkĩte maũndũ maingĩ nĩ kana kĩeleelo kyake kĩanĩe.—Yoana 3:16.

Soma Mwambĩlĩlyo 1:26-28; Yakovo 1:13; na 1 Vetelo 5:6, 7.

Kaũ na Mathĩna Ikathela?

Asikalĩ

NĨKĨ ANDŨ MAKŨLASYA ĨKŨLYO YĨU?: Andũ aingĩ maendee kũkw’a nũndũ wa kaũ. Ithyonthe nĩtũthĩnĩkaa ngoonĩ nũndũ wa mathĩna ala makwataa andũ.

KĨLA MBIVILIA ĨMANYĨASYA: Ngai nĩwathanĩte ĩvinda ũkaete mũuo nthĩ yonthe. Ũsumbĩnĩ wake, kana nthĩnĩ wa silikalĩ yake ya ĩtunĩ, andũ ‘matikemanyĩsya kaũ ĩngĩ.’ Ĩndĩ “makatusya mbyũ syoo itw’ĩke maembe.” (Isaia 2:4) Ngai akamina sila ũte wa katĩ na mathĩna onthe. Mbivilia yathanĩte: “[Ngai] akavyaĩa methoi onthe methonĩ moo; na kĩkw’ũ kĩikethĩwa vo ĩngĩ; o na kũikethĩwa ĩngĩ kũmeta, kana kũĩa, kana woo: maũndũ ma mbee [o vamwe na sila ũte wakatĩ na mathĩna] nĩ mavĩtu.”—Ũvuan’yo 21:3, 4.

Soma Savuli 37:10, 11; 46:9; na Mika 4:1-4.

Kwĩthĩawa Ata Yĩla Twakw’a?

Vandũ va kũthika akw’ũ

NĨKĨ ANDŨ MAKŨLASYA ĨKŨLYO YĨU?: Ndĩni mbingĩ sya nthĩ ĩno imanyĩasya kana yĩla mũndũ wakw’a ve kĩndũ kĩtakusaa. Angĩ maĩkĩĩaa kana akw’ũ nĩmatonya kũthĩny’a andũ ala me thayũ, kana Ngai asilĩlaa andũ ĩianĩ ya mwaki tene na tene.

KĨLA MBIVILIA ĨMANYĨASYA: Mũndũ akw’a ethĩawa aeka kwĩthĩwa thayũ. Ĩandĩko ya Mũtavan’ya 9:5 yaĩtye: “Ala akw’ũ matyĩsĩ ũndũ o na wĩva.” Nũndũ akw’ũ matyĩsĩ ũndũ o na wĩva, na mayĩw’aa ũndũ o na wĩva, maitonya kũũmĩsya kana kũtethya ala me thayũ.—Savuli 146:3, 4.

Soma Mwambĩlĩlyo 3:19 na Mũtavan’ya 9:6, 10.

Ve Wĩkwatyo kwa ala Akw’ũ?

Kana ke na kĩmeto nũndũ wa kũkw’ĩĩwa nĩ mũndũ kendete

NĨKĨ ANDŨ MAKŨLASYA ĨKŨLYO YĨU?: Nĩtwendaa kwĩkala na kũtanĩa thayũ vamwe na endwa maitũ. Nĩtwĩthĩawa na mea ma kwona ĩngĩ endwa maitũ ala makwie.

KĨLA MBIVILIA ĨMANYĨASYA: Andũ aingĩ ala makwie makathayũũkw’a. Yesũ athanie kana “ala me mbũanĩ…makauma.” (Yoana 5:28, 29) Kwĩanana na kĩeleelo kya mbee kya Ngai, ala methayũũkw’a matonya kwĩkala valatisonĩ. (Luka 23:43) Ĩvinda yĩu yũkĩte kũkeethĩwa ũima mwĩanĩu wa mwĩĩ na thayũ ũtathela kwa andũ ala ewi. Mbivilia yaasyaa: “Ala alũngalu makatiĩwa nthĩ, na makatũa vo kũvika tene na tene.”—Savuli 37:29.

Soma Yovu 14:14, 15; Luka 7:11-17; na Meko ma Atũmwa 24:15.

Ndonya Kũvoya Ata Nĩw’ĩke nĩ Ngai?

Mũndũũme ũkũvoya

NĨKĨ ANDŨ MAKŨLASYA ĨKŨLYO YĨU?: Andũ ma ndĩni vakuvĩ syonthe nĩmavoyaa. Ĩndĩ aingĩ mew’aa mboya syoo itasũngĩawa.

KĨLA MBIVILIA ĨMANYĨASYA: Yesũ atũmanyĩisye kana tũyaĩle kũsyokeleelaa mboya sitũ ta wathi. Aisye: “Na mũkĩvoya mũikatindĩe ndeto.” (Mathayo 6:7) Twenda Ngai ethukĩĩsye mboya sitũ, twaĩle kũvoyaa ũndũ wĩtĩkĩlaa. Nĩ kana twĩke ũu twaĩle kũmanya kwenda kwa Ngai na tũyĩka kwĩanana nakw’o. Ĩandĩko ya 1 Yoana 5:14 yĩeleetye kana: “Ethĩwa tũkavoya ũndũ kwĩanana na kwenda kwake [Ngai], nũtwĩw’aa.”

Soma Savuli 65:2; Yoana 14:6, 14; na 1 Yoana 3:22.

Ndonya Kwĩthĩwa na Ũtanu Ata?

Mũndũmũka ũkũmantha ũtanu kwa kũsoma Mbivilia

NĨKĨ ANDŨ MAKŨLASYA ĨKŨLYO YĨU?: Andũ aingĩ maĩkĩĩaa kana mbesa, nguma, kana wanake nitonya kũmaetee ũtanu. Nĩkyo kĩtumi mamanthaa syĩndũ isu, ĩndĩ mailea kwĩsa kũkwata ũtanu.

KĨLA MBIVILIA ĨMANYĨASYA: Yesũ nĩwoonanisye kĩla kĩtumaa tũkwata ũtanu yĩla waisye: “Nĩ aathime [“mena ũtanu,” NW] ala me na ũkya wa ngoo.” (Mathayo 5:3) Tũtonya kũkwata ũtanu wa w’o tweeyumya kwĩanĩsya wendi witũ ũla mũnene vyũ wa kĩveva wa kũmanya ũla w’o ĩũlũ wa Ngai na kĩeleelo kyake kwitũ. W’o ũsu wĩ Mbivilianĩ. Kũmanya w’o kũtonya kũtũtethya kũvathũkany’a maũndũ ala ma vata na ala mate ma vata. Kwĩtĩkĩla w’o ũla wĩ Mbivilianĩ ũtũtongoesye maũtwinĩ na mekonĩ maitũ nĩkũtonya kũtuma twĩkala thayũ wĩ na kĩeleelo.—Luka 11:28.

Soma Nthimo 3:5, 6, 13-18 na 1 Timotheo 6:9, 10.

Asu nĩ mosũngĩo makuvĩ ma Mbivilia ma ala makũlyo thanthatũ. Nũkwenda kũmanya mbeange? Ethĩwa wĩ ũmwe wa ala mena “ũkya wa ngoo” no wĩthĩwe ũyenda kũmanya mbeange. Nowĩthĩwe ũyĩkũlya makũlyo angĩ ta: ‘Ethĩwa Ngai nũtũthĩnĩkĩaa nĩkĩ wĩtĩkĩlĩtye ũthũku mwingĩ na mathĩna maendee? Ndonya kwaĩlya mwĩkalĩlye wa mũsyĩ wakwa ata?’ Mbivilia nĩnenganĩte mosũngĩo matoetye ma makũlyo aa na angĩ maingĩ.

Ĩndĩ ũmũnthĩ andũ aingĩ mayendete kũmanya nesa ũndũ Mbivilia yaĩtye. Monaa ta ĩvuku ĩnene mũno na mavinda angĩ yĩ vinya kũelewa. We nowende kũtetheew’a kũkwata mosũngĩo kuma Mbivilianĩ? Ngũsĩ sya Yeova nitonya kũũteetheesya na nzĩa ilĩ.

Ĩvuku yĩtawa Mbivilia Yo Ĩmanyĩasya Ata? yĩandĩkĩtwe nĩ kana yĩtetheesye andũ ala mate na mwanya mwingĩ mesomee mosũngĩo ma Mbivilia ĩũlũ wa makũlyo ma vata. Nzĩa ĩngĩ nĩ mũvango wa kwĩmanyĩsya Mbivilia mũsyĩ kwaku. Ũmwe wa Ngũsĩ sya Yeova ũtonya kũmanyĩsya Mbivilia no oke kwaku kana vandũ vangĩ mwĩw’anĩte, o ĩvinda ĩvũthũ kĩla kyumwa, na mũyĩmanyĩsya ĩmwe vate ndĩvi. Andũ milioni mbingĩ nthĩ yonthe nĩmatethekete nũndũ wa mũvango ũsu. Aingĩ nĩmavikĩĩe kwasya: “Nĩnĩkwatĩte ũla w’o!”

Vaiĩ ũthwii ũthonokete kũmanya w’o ũla wĩ Mbivilianĩ. W’o ũla wĩ Mbivilianĩ nũtũthaasya kumana na maũndũ ma maimũ, ũthokoanu wa akili, na w’ĩa. Nũtũnengae wĩkwatyo, kĩeleelo, na ũtanu. Yesũ aisye: “Mũkamanya ũla w’o, na ũla w’o ũkamũthasya.”—Yoana 8:32.

1. Mũndũũme ũkwĩmanyĩsya kĩla Mbivilia ĩmanyĩasya; 2. Mũndũmũka ũkwĩmanyĩsya kĩla Mbivilia ĩmanyĩasya