Kĩla ũthi ũvoonĩ ũla wĩ vo

Kĩla ũthi nthĩnĩ wa ũvoo wa kelĩ wa maũndũ ala me vo

Kĩla ũthi nthĩnĩ wa ũvoo ũla wĩ vo

Ngũsĩ sya Yeova

Kikamba

Ũvoo Mũseo Kuma kwa Ngai!

 Ĩsomo ya 2

Ngai Nũũ?

Ngai Nũũ?

1. Nĩkĩ twaĩle kũmũthaitha Ngai?

Ngai wa w’o nĩwe Mũmbi wa syĩndũ syonthe. Ndaĩ na mwambĩlĩlyo na ndakethĩwa na mũminũkĩlyo nongi. (Savuli 90:2) Nĩwe Mwambĩlĩlya wa ũvoo mũseo ũla wĩ Mbivilianĩ. (1 Timotheo 1:11) Nũndũ Ngai nĩwe watũnengie thayũ, no we weka twaĩle kũmũthaitha.Soma Ũvuan’yo 4:11.

2. Ngai ailyĩ ata?

Nũndũ Ngai nĩ Veva vaiĩ mũndũ waamwona o na ĩndĩĩ, ũu nĩ kwonany’a we ti ũndũ ũmwe na andũ, ala me mwĩĩ wa nyama na nthakame. (Yoana 1:18; 4:24) Ĩndĩ o na ũu wĩ o vo, nĩtũtonya kũmanya ũndũ Ngai ũilyĩ kwĩsĩla syĩndũ ila woombie. Kwa ngelekany’o, matunda na malaa ma mĩthemba mingĩ matũtavasya Ngai e wendo na nĩ mũĩ. Ũnene wa nthĩ ũtwonasya ũtonyi wake.Soma Alomi 1:20.

Nĩtũtonya kwĩmanyĩsya mũno ĩũlũ wa ũndũ Ngai ũilyĩ kwa kũsoma Mbivilia. Kwa ngelekany’o, Mbivilia nĩtũtavasya kĩla Ngai wendete na kĩla ũmenete, ũndũ wĩkanaa na andũ, na ũndũ wĩkaa ĩla andũ meeka ũseo kana meeka ũthũku.Soma Savuli 103:7-10.

3. Ngai e syĩtwa?

Yesũ aisye: “Inyw’ĩ ĩndĩ voyaai atĩĩ: Asa waitũ ũla wĩ ĩtunĩ, syĩtwa yaku yĩtaĩwe.” (Nithyĩ tweeketye ndeto; Mathayo 6:9) Ngai e syĩtwa o yĩmwe, o na kau e masyĩtwa maingĩ ma ũnene. Syĩtwa yĩu yĩtamũkawa kwa nzĩa syĩ kĩvathũkany’o nthĩnĩ wa kĩla kĩthyomo. Kwa Kĩkamba yĩtamũkawa “Yeova.”Soma Savuli 83:18.

Syĩtwa yĩu nĩyumĩtw’e Mbivilianĩ mbingĩ na vandũ vayo vakekĩwa masyĩtwa ma ũnene ta Mwĩaĩi kana Ngai. Ĩndĩ ĩla Mbivilia yaandĩkiwe, syĩtwa yĩu yakwatĩkanaa nthĩnĩ  wayo mbee wa mavinda 7,000. Yesũ nĩwamanyĩthisye syĩtwa ya Ngai ĩla wamanyĩasya andũ ĩũlũ wa Ngai.Soma Yoana 17:26.

4. Yeova nũtũthĩnĩkĩaa?

O ta ĩthe wĩ wendo, Ngai nũtũtetheesya tũkwate moathimo matakathela

Nĩkwĩthĩwa andũ aingĩ nĩmathĩnaa, ũu nĩkwonany’a kana Yeova nĩ Ngai ũtatũthĩnĩkĩaa? Andũ amwe maasya atũeteae mathĩna nĩ kana atũtate, ĩndĩ ũu ti w’o.Soma Yakovo 1:13.

Ngai nĩwonaa andũ me ma vata kwake na nĩkyo kĩtumi ũmanengete ũthasyo wa kũnyuva. Nĩtwaĩle kũtũnga mũvea nũndũ wa ũthasyo witũ wa kũnyuva kũmũthũkũma Ngai. (Yosua 24:15) Ĩndĩ andũ aingĩ manyuvaa kwĩka angĩ mothũku, na kwondũ wa ũu kũyĩthĩwa na mathĩna maingĩ. Mothũku asu matumaa Yeova ew’a woo.Soma Mwambĩlĩlyo 6:5, 6.

Yeova nĩ Ngai ũtũthĩnĩkĩaa. Endaa tũtanĩe thayũ. O mĩtũkĩ akamina mathĩna na ayananga ala mamaetae. Ĩvindanĩ yĩĩ, e na kĩtumi kĩseo kya kwĩtĩkĩlya mathĩna kwa kavinda. Nthĩnĩ wa Ĩsomo ya 8, tũkeemanyĩsya nĩkĩ wĩtĩkĩlĩtye mathĩna methĩwe.Soma 2 Vetelo 2:9; 3:7, 13.

5. Tũtonya kũendeea kũmũthengeea Ngai ata?

Yeova nũtũthoketye tũmũthengeee kwĩsĩla mboyanĩ. Nĩwendeeaw’a nĩ kĩla ũmwe witũ. (Savuli 65:2; 145:18) E wendi wa kũekea. O na ethĩwa mavinda angĩ nĩtũemawa nĩkũmwendeesya, nũmanyaa ĩla tweekĩa kĩthito kya kwĩka ũu. Kwoou o na kau tũi eanĩu, kwa w’o nĩtũtonya kũtanĩa ũnyanya wa vakuvĩ vamwe na Ngai.Soma Savuli 103:12-14; Yakovo 4:8.

Nũndũ Yeova nũtũnengete thayũ, twaĩle kũmwenda mũno kwĩ mũndũ o na wĩva. (Maliko 12:30) O ũndũ ũendeee kwonany’a wendo waku kwa Ngai kwa kwĩmanyĩsya maũndũ maingĩ ĩũlũ wake na kwĩka ũndũ ũkwenda twĩke, now’o ũkaendeeaa kũmũthengeea ĩvinda yonthe.Soma 1 Timotheo 2:4; 1 Yoana 5:3.