Kĩla ũthi ũvoonĩ ũla wĩ vo

Kĩla ũthi nthĩnĩ wa ũvoo wa kelĩ wa maũndũ ala me vo

Kĩla ũthi nthĩnĩ wa ũvoo ũla wĩ vo

Ngũsĩ sya Yeova

Kikamba

Ũvoo Mũseo Kuma kwa Ngai!

 Ĩsomo ya 1

Ũvoo Mũseo Nĩ Kyaũ?

Ũvoo Mũseo Nĩ Kyaũ?

1. Twĩ na ũvoo mwaũ kuma kwa Ngai?

Ngai endaa andũ matanĩe thayũ ĩũlũ wa nthĩ. Oombie nthĩ na syĩndũ syonthe ila syĩ nthĩnĩ wayo nũndũ nĩwendete andũ. O mĩtũkĩ nũkwosa ĩtambya ya kũetee andũ onthe ĩvinda ĩseo. Akavetanga maũndũ ala matumaa andũ mathĩna.Soma Yelemia 29:11.

Vaiĩ o na ĩndĩĩ silikalĩ yaatonya kũvetanga kaũ, mowau, kana kĩkw’ũ. Ĩndĩ ve ũvoo mũseo. O mĩtũkĩ, Ngai nũkũvetanga silikalĩ sya andũ na aiũngamya yake. Ala mesumbĩkwa nĩ silikalĩ ĩsu ya Ngai makatanĩa mũuo na ũima wa mwĩĩ.Soma Isaia 25:8; 33:24; Ndanieli 2:44.

2. Nĩkĩ ũvoo mũseo nĩ wa vata mũno ũmũnthĩ?

Thĩna ũkathela ĩla Ngai ũkananga andũ athũku ĩũlũ wa nthĩ. (Nzevania 2:3) Akeeka ũu ĩndĩĩ? Ndeto ya Ngai nĩyathanie ĩũlũ wa maũndũ ala malikĩtye andũ mũisyonĩ ũmũnthĩ. Maũndũ asu maendee kwĩkĩka meonany’a kana ĩvinda ya Ngai ya kwosa ĩtambya nĩthengeeu.Soma 2 Timotheo 3:1-5.

3. Twaĩle kwĩka ata?

Twaĩle kwĩmanyĩsya ĩũlũ wa Ngai kwa kũtũmĩa Mbivilia, Ndeto yake. Mbivilia nĩ ta valũa kuma kwa ĩthe wĩ wendo. Ĩtũtavasya ũndũ tũtonya kũtanĩa thayũ mũseango ũmũnthĩ na ũndũ tũkatanĩa thayũ ũtathela ĩũlũ wa nthĩ ĩvinda yũkĩte. Nĩ w’o, amwe nĩmatonya kũlea kwendeew’a kwona ũitetheew’a ũelewe nĩ Mbivilia. Ĩndĩ kwĩthĩwa na ĩvinda yũkĩte ĩseo nĩ ũndũ mũseo vyũ ũtaĩle kũkosa.Soma Nthimo 29:25; Ũvuan’yo 14:6, 7.