1. Ngai nĩwĩthukĩĩasya mboya syonthe?

Ngai athoketye andũ ma mbaĩ syonthe mamũthengee mboyanĩ. (Savuli 65:2) Ĩndĩ, ndethukĩĩasya kana kwĩtĩkĩla mboya syonthe. Kwa ngelekany’o, mboya sya mũndũ ũla ũthĩnasya kĩveti kyake no isiĩĩwe. (1 Vetelo 3:7) Ĩngĩ, ĩla Aisilaeli maendeeie kwĩka naĩ, Ngai ndaaĩthukĩĩsya mboya syoo. Vate nzika, mboya nĩ ũndũ wa mwanya. Ĩndĩ o na ũu wĩ o vo, Ngai nĩwĩtĩkĩlaa mboya sya andũ mekĩte naĩ ngito ethĩwa nĩmeelila.Soma Isaia 1:15; 55:7.

2. Twaĩle kũvoya ata?

Mboya nĩ nzĩa ĩmwe ya kũthaitha, kwoou twaĩle kũmũvoya Mũmbi witũ, Yeova, e weka. (Mathayo 4:10; 6:9) Ĩngĩ, tũi eanĩu, kwoou nĩtwaĩle kũvoya kwĩsĩla syĩtwanĩ ya Yesũ nũndũ akwie kwondũ wa naĩ sitũ. (Yoana 14:6) Yeova ndendaa tũtindĩe kũtũngĩlĩĩla ndeto o imwe ĩla tũũvoya, kana kũsoma mboya mbandĩke. Endaa tũvoye kuma ngoonĩ sitũ.Soma Mathayo 6:7; Avilivi 4:6, 7.

Mũmbi witũ no atwĩw’e o na twavoya tũvindĩtye. (1 Samueli 1:12, 13) Atũthoketye tũvoyae kĩla ĩvinda. Kwa ngelekany’o, no tũvoye kwakya, wĩoo, mbee wa kũya, na ĩla twĩ thĩnanĩ.Soma Savuli 55:22; Mathayo 15:36.

3. Nĩkĩ Aklĩsto mombanaa vamwe?

Kũmũthengeea Ngai nĩ ũndũ wĩ vinya nũndũ tũtwĩe katĩ wa andũ matamũĩkĩĩa Ngai na mavũthasya watho wake wa kũete mũuo kũũ nthĩ. (2 Timotheo 3:1, 4; 2 Vetelo 3:3, 13) Kwoou, twĩ na vata wa kwĩthĩwa na ngwatanĩo na athaithi ala angĩ nĩ kana twĩkĩane vinya.Soma Aevelania 10:24, 25.

 Kwĩthĩwa twĩ ngwatanĩo na andũ mamwendete Ngai nĩkũtũtetheeasya kũmũthengeea Ngai. Mawũmbano ma Ngũsĩ sya Yeova matũnengae myanya mĩseo ya kwĩkĩwa vinya nĩ mũĩkĩĩo wa ala angĩ.Soma Alomi 1:11, 12.

4. Ũtonya kũmũthengeea Ngai ata?

Ũtonya kũmũthengeea Yeova kwa kũsũanĩĩa maũndũ ala weemanyĩsya kuma Ndetonĩ yake. Sũanĩa kĩla ũtonya kwĩmanyĩsya kwĩsĩla mawĩa make, ũtao wake, na mawatho make. Mboya na kũsũanĩĩa maũndũ kũtũtetheeasya kũelewa kana Ngai e wendo na ũĩ mwingĩ.Soma Yosua 1:8; Savuli 1:1-3.

Ũndũ ũla ũtonya kũtuma ũmũthengeea Ngai no kũmwĩkwatya, kana kũmũĩkĩĩa. Mũĩkĩĩo nĩ ta kĩndũ kĩ thayũ kĩla kyaĩle kũĩthw’a. No nginya ũendee kũĩthya mũĩkĩĩo waku kwa kũsũanĩĩa kĩla kĩtumĩte wĩthwa na mũĩkĩĩo ũsu.Soma Mathayo 4:4; Aevelania 11:1, 6.

5. Kũmũthengeea Ngai kũkaũtethya ata?

Yeova nũthĩnĩkĩaa ala mamwendete. No amasũvĩe maikakwatwe nĩ ũndũ ũtonya kũlikya mũĩkĩĩo woo na wĩkwatyo woo wa thayũ ũtathela mũisyonĩ. (Savuli 91:1, 2, 7-10) Nũtũkanasya tũikaatĩĩe nzĩa itonya kũmina ũtanu na kwananga ũima witũ wa mwĩĩ. Yeova atũmanyĩasya nzĩa ĩla nzeo vyũ ya thayũ.Soma Savuli 73:27, 28; Yakovo 4:4, 8.