Kĩla ũthi ũvoonĩ ũla wĩ vo

Kĩla ũthi nthĩnĩ wa ũvoo wa kelĩ wa maũndũ ala me vo

Kĩla ũthi nthĩnĩ wa ũvoo ũla wĩ vo

Ngũsĩ sya Yeova

Kikamba

What Does the Bible Really Teach?

Judgment Day—What Is It?

Judgment Day—What Is It?

WE WONAA Mũthenya wa Sila ta kyaũ? Andũ aingĩ masũanĩaa kana andũ mbilioni mbingĩ makaetwe mbee wa kĩvĩla kya ũsumbĩ kya Ngai ũmwe kwa ũmwe. Na kĩla ũmwe aisilĩlwa. Na amwe maitw’ĩĩwa kũthi ĩtunĩ na angĩ ĩianĩ ya mwaki wa tene na tene. Ĩndĩ Mbivilia yonanasya ũndũ wĩ kĩvathũkany’o na ũsu ĩũlũ wa Mũthenya wa Sila. Ndeto ya Ngai yonanasya kana mũthenya ũsu ti ĩvinda ya kũtelemya ĩndĩ nĩ ĩvinda ya wĩkwatyo na kũtũnga ũseo kũũ nthĩ.

Nthĩnĩ wa Ũvuan’yo 20:11, 12, mũtũmwa Yoana aandĩkie ũũ ĩũlũ wa Mũthenya wa Sila: “Na noona kĩvĩla kĩnene kyeũ kya ũsumbĩ, na ũla wĩkalĩte ĩũlũ wakyo, nthĩ na ĩtu syakĩa ũthyũ wake; na vaiaaoneka vandũ vasyo. Na noona akw’ũ, anene na anini, maũngeme mbee wa kĩvĩla kyu kyeũ; na mavuku mavuanw’a: na ĩvuku yĩngĩ yavuanw’a, nayo nĩ ĩvuku ya thayũ: na ala akw’ũ masilĩlwa na maũndũ ala maandĩkĩtwe mavukunĩ asu, kwĩanana na meko moo.” Mũsili ũsu ũeleetw’e vau nũũ?

 Yeova Ngai nĩwe Mũsili mũnene vyũ wa andũ onthe. Ĩndĩ nũnenganĩte wĩa wa kũsila. Kwĩanana na Meko ma Atũmwa 17:31, mũtũmwa Vaulo aisye kana Ngai “nĩwiĩte mũthenya ũla ũkasilĩla nthĩ yonthe na ũlũngalu, kwa mũndũ ũla wanyuvie.” Mũsili ũsu mũnyuve nĩ Yesũ Klĩsto. (Yoana 5:22) Ĩndĩ Mũthenya wa Sila ũkaambĩĩa ĩndĩĩ? Na ũasavĩte ata?

Ĩvuku ya Ũvuan’yo yonanasya kana Mũthenya wa Sila ũkaambĩĩa ĩtina wa walany’o wa Satani kũũ nthĩ kwanangwa kaũnĩ wa Ali-Maketoni. * (Ũvuan’yo 16:14, 16; 19:19–20:3) Ĩtina wa Ali-Maketoni Satani na ndaimoni syake makavingĩwa ĩimanĩ yĩte kĩtulu myaka ngili. Ĩvinda yĩu ala 144,000 atiĩwa vamwe na Klĩsto makeethĩwa me asili na ‘makasumbĩka vamwe na Klĩsto myaka ngili.’ (Ũvuan’yo 14:1-3; 20:1-4; Alomi 8:17) Mũthenya wa Sila ti ũndũ ũkekwa nthĩnĩ wa masaa 24. Ũkaendeea kwa myaka ngili.

Ĩvinda yĩu ya myaka ngili Yesũ Klĩsto ‘akasilĩla ala me thayũ na ala akw’ũ.’ (2 Timotheo 4:1) “Ala me thayũ” makeethĩwa ne “ĩkomano ĩnene ya andũ” yĩla yĩkavonoka Ali-Maketoni. (Ũvuan’yo 7:9-17) Mũtũmwa Yoana nĩwoonie “akw’ũ . . . maũngeme mbee wa kĩvĩla kyu kyeũ” kya ũsumbĩ kya sila. O tondũ Yesũ wathanie, “onthe ala me mbũanĩ makew’a wasya wake, namo makauma” ĩvinda ya ũthayũũkyo. (Yoana 5:28, 29; Meko ma Atũmwa 24:15) Ĩndĩ-ĩ andũ makasililwa ĩũlũ wa maũndũ meva?

Mũtũmwa Yoana oonie woninĩ, “mavuku mavuanw’a,” na “ala akw’ũ masilĩlwa na maũndũ ala maandĩkĩtwe mavukunĩ asu, kwĩanana na meko moo.” Mavuku asu maandĩkĩtwe meko ala andũ meekaa matanamba ũkw’a? Tiw’o, nũndũ sila ndũkethĩwa ĩũlũ wa maũndũ ala andũ meekaa matanakw’a. Nĩkĩ tũtonya kwasya ũu? Mbivilia yaĩtye: “Ũla wakwie nũtalĩtwe ta ũte na naĩ.” (Alomi 6:7) Kwoou ala methayũũkw’a makeethĩwa mate na naĩ. Kwoou mavuku asu makeethĩwa maandĩkĩtwe motw’ĩo angĩ ma Ngai. Ala mevonoka Ali-Maketoni  vamwe na ala methayũũkw’a, no nginya mew’e mĩao ya Ngai na motw’ĩo meũ onthe ala Ngai wĩonany’a ĩvindanĩ ya myaka ngili nĩ kana mekale tene na tene. Kwoou andũ makasilĩlwa kwĩanana na meko moo ĩvindanĩ ya Mũthenya wa Sila.

Mũthenya wa Sila ũkanenga andũ mbilioni mbingĩ mwanya wa kwĩmanyĩsya na kwĩka kwenda kwa Ngai. Kwoou kũkeethĩwa na wĩa mwingĩ wa kũmanyĩsya. ‘Ala matwĩe nthĩ makeemanyĩsya ũlũngalu.’ (Isaia 26:9) Ĩndĩ ti onthe meĩthĩwa mayenda kwĩka kwenda kwa Ngai. Isaia 26:10 yaĩtye: ‘Ũseo o na woonanw’a kwa ũla mũthũku, ndakemanyĩsya ũlũngalu; e nthĩ ya ũlũngalu akeekaa naĩ, na ndakona ũnene wa Yeova.’ Ĩvinda ya Mũthenya wa Sila andũ asu athũku makooawa vate wĩkwatyo ũngĩ.Isaia 65:20.

Mũthenya wa Sila ũithela ala meĩthĩwa me avonoku ‘makeethĩwa thayũ’ na me eanĩu vyũ. (Ũvuan’yo 20:5) Ĩvinda ya Mũthenya wa Sila andũ onthe makatw’ĩka eanĩu ũndũ mũndũ wa mbee wailye yĩla woombiwe. (1 Akolintho 15:24-28) Ĩndĩ andũ makatatwa ya mũthya. Satani akathaw’a kuma kolokolonĩ wake na akauma akenge mbaĩ ĩvinda ya mũthya. (Ũvuan’yo 20:3, 7-10) Ala matakakengeka makeethĩwa na ũtanu watho wa Mbivilia weanĩa: “Ala alũngalu makatiĩwa nthĩ, Na makatũa vo kũvika tene na tene.” (Savuli 37:29) Mũthenya wa Sila ũkaete ũathimo kwa andũ onthe alũngalu.

^ kal. 1 Sisya ũvoo ĩũlũ wa Ali-Maketoni, nthĩnĩ wa ĩvuku Mwabudu Mungu wa Pekee wa Kweli kĩlungu kya 20 yĩkyavĩthĩtw’e nĩ Ngũsĩ sya Yeova.